Mbilive zauvali zaPeturusa 2:1-22
2 Nye nampili ngoso, ngwendi moomu tupu mwa kere nare vaporofete woyimpempa mokatji kovantu vaKarunga, mokatji keni namo nga mu kara varongi woyimpempa. Awo ngava reta mokahore-hore tumbunga tosiponga tomaukarelikarunga ntani ngava nyoka ogu* ga va zowora nokuliretera vene ezonauko usimbu.
2 Sinzi sovantu ngava kwama nkareso zokunyata,* ano eyi ngayi ninkisa vantu va uyunge usili momudona.
3 Ntani hena, awo ngava mu ninkilira mo pokumukumbagera. Nye mpanguro zawo ezi va tokora nare kapi ngazi liranga ntani ngava va zonagura po.
4 Karunga kapi ga sigilire vaengeli ava va zonene ga hana kuvatengeka, nye age kwa va zuguminine modorongo ava tumbura asi Tatarusi* nokuvamanga* momundema gomunene va ndindire mpanguro.
5 Ntani age kwa tengekere uzuni wanare, nye age kwa parwire Nowa, ogu nga zuvhisa uhungami kumwe novantu ntambali, apa ga reterere ruhanzo uzuni wovadinikarunga.
6 Age hena kwa tengekere sitata saSodoma nesi saGomora pokuyihwika nomundiro. Apa ga yi rugene oyo, age kwa likidire eyi ngayi ka horokera vadinikarunga komeho.
7 Age kwa parwire Roto mugara gomuhungami, ogu za guvisire nkareso zokunyata* zovantu wovadona.
8 Mugara ogu gomuhungami kwa parukire mokatji kovantu wovadona. Age nga mono omu ngava paruka nokuzuvha eyi ngava uyunga, ano eyi kwa mu guvisire unene nkenye ezuva.
9 Yipo nye, Jehova ga diva omu a parura vantu wovahungami momaudigu gawo ntani age kuna kundindira a ka zonagure po vantu ava ava dili kulimburukwa mezuva lyompanguro,
10 unene po ava ava ligwanekere panyama novakwawo yipo vava nyateke, nava va nyenga upangeli.
Awo ndino ntani kwa linenepeka, awo kapi va tjira kuuyunga momudona vantu ava ga zerura* Karunga,
11 nye vaengeli nampili ngomu vava pita ntani nonkondo, awo kapi ava uyunga vantu owo momudona, morwa vaengeli kwa fumadeka Jehova.
12 Nye vantu owo kuuyunga momudona yininke eyi va dira kudiva, awo ngava va zonagura po ngwendi yikorama eyi ya dira nondunge, eyi ava vhara nokuyikwata va yi dipage.
13 Vantu owo ngava va tengeka morwa yirugana yawo yoyidona.
Awo kwa hara kuhafesa madowo gawo nampili mutenya, awo kwa kara ngwendi nyata mokatji keni, awo kuhafera kupukisa wopeke nomarongo goyimpempa.
14 Awo kwa hara kuhondera,* kapi ava vhuru kuhageka nonzo ntani awo kupukisa ava va dira kukara nepuro lyokupama. Monomutjima dawo kwa zura udumbe ntani Karunga ngava tengeka.
15 Awo kwa siga nzira zouhunga yiyo va puka. Awo kukwama Baramu munwaBeyoro ogu ga here kurugana yoyidona yipo va mu fute,
16 nye age kwa mu handukilire, morwa kwa here kurugana yoyidona. Sindongi esi sa uyungire yiso sa konderere muporofete ogo mokurugana ugova.
17 Awo kwa fana ngwendi marunone gokupwira ntani ngwendi maremo aga a zi rerura mpepo zonene, awo kuna kuvandindira endema lyenene.
18 Awo kuuyunga nonkango donongwa nye ado kwato mulyo. Awo kurugana yirugana yokunyata* nokuninkisa vantu va kare hena nomadowo gomadona, ano eyi kuvaninkisa va tengwire koyininke yoyidona eyi va hageka.
19 Nampili ngomu ava tumbwidire vakwawo umanguruki, awo vene vapika wononzo. Yeeyi nkenye ogu ava pangere, age mupika.*
20 Nampili va sige yininke yokunyata youzuni ou morwa kukara nediwo lyousili kuhamena Hompa Jesus Kristusa Muzowoli gwetu, awo kutengwira koyininke eyi va siga ntani ayo kuvapangera, ukaro wawo wokuhulilira kudonapa unene kupitakana wokuhova.
21 Ngano kapi va divire nawa-nawa nzira zouhunga, ngano hansa kupitakana kweyi va zi diva nokusiga veta zokupongoka ezi va gwana.
22 Awo kwava horokera eyi sa tanta sisewe esi asi: “Mbwa zina tengwire poyirusi yazo, ano singuru sosikadi esi vana kuhu, kuna kuligarumuna metata.”
Nonkango dokonhi
^ MoRugereka asi “mwene,” kwa tamba Jesus.
^ Ndi nampo asi “nokuvazugumina momakero.”
^ Kwa tamba kwava va kara noyitumbukira yoyinene mombungakriste.
^ Ndi “Meho gawo kwa zura ruhonda.”
^ Ndi “ogu a si pangere sininke, age mupika gwaso.”
