Samwere gwauvali 1:1-27
1 Konyima zonomfa daSauru, Ndafita kwa ka tengwire kokukafunda* Vaamareki, makura ta kara moSikiragi mazuva gavali.
2 Mezuva lyautatu, mugara gumwe kwa tundire mokamba zaSauru age ana taura yikoverero yendi ntani ana litura evhu momutwe. Apa ga hederere pepi naNdafita, ta tongamene makura ta linyongamene.
3 Ndafita ta mu pura asi: “Kupi ono kutunda?” Makura age ta mu limburura asi: “Ame kuna hene mokamba zoVaisraeli.”
4 Ndafita ta mu pura asi: “Yisinke yina horoka? Na kanderere tantera nge.” Makura ta mu tantere asi: “Vantu ka va dukire ko koyita ntani sinzi sovantu ka va fire. Sauru namunendi Jonatana nawo ka va fire.”
5 Makura Ndafita ta pura mugara ogu ga mu tanterere mbudi asi: “Ngapi omu ono yi diva asi Sauru namunendi Jonatana ka va fire?”
6 Mugara ogo ta mu limburura asi: “Ame kani kere koNdundu zaGiliboa, makura yipo kani mwene Sauru kuna korere kegonga lyendi. Ano vakwayita ava ka va rondere momatemba ntani novarondi wononkambe, ka va kere pepi nendi.
7 Apa ka mwene nge yiyo ka zigidire nge, makura yipo kani mu pulire asi: ‘Yisinke nani ku ruganena?’
8 Age yiyo ka pulire nge asi: ‘Nyove yilye?’ Makura yiyo kani mu limbwilire asi: ‘Ame Muamareki.’
9 Makura yiyo ka uyungire asi: ‘Dipaga nge, yeeyi ame kuna kuzuvha kukora kokunene nye simpe ni muzuni.’
10 Makura yiyo kani mu dipagere, morwa kani yi divire asi kapi na paruka mokumona asi age ka remanene unene, yiyo kani gusire nkata zendi zosiuhompa ezi ka dwere komutwe gwendi ntani nosiranda esi ka dwere mokuwoko kwendi. Yiyo nina yi ku retere hompa gwange.”
11 Makura Ndafita ta taura yikoverero yendi, ano vakwayita ava ga kere nawo tava rugana yokulifana.
12 Awo kwa lilire unene ntani kwa dililire dogoro kongurova, morwa Sauru namunendi Jonatana ntani vantu vaJehova noVaisraeli kwa va dipagere norufuro.
13 Ndafita ta pura mugara ogu ga mu tanterere mbudi asi: “Kupi wa tundilira?” Mugara ogo ta mu limburura asi: “Ame muna goMuamareki ogu ga tunga moIsraeli.”
14 Makura Ndafita ta mu pura asi: “Morwasinke ko dililire kutjira kudipaga muntu ogu ga gwaveka Jehova?”
15 Makura Ndafita ta zigida mukwayita gwendi gumwe, ta mu tantere asi: “Mu dipaga.” Makura ta mu dipaga.
16 Ndafita ta tanta asi: “Nomfa doge nyamoge ono di liretere morwa nyamoge ono tanta asi: ‘Nyame kani dipagere muntu ogu ga gwaveka Jehova.’”
17 Makura Ndafita ta dimbire Sauru naJonatana rusumo rweguwo
18 ntani kwa tente asi va ronge vantu womorudi rwaJuda rusumo oru ava tumbura asi “Uta wonkanza.” Aro kwa ru tjanga mobuke zaJasara asi:
19 “Ove Israeli, vagara woge womulyo unene kuna gwire konondundu doge.
Vakwayita woge wononkondo vana fu!
20 Mwa ha yi tantera vantu womoGata;mwa ha yi divisa mononzira domoAsikeroni,ndi vakadona woVafilisiti ngava hafa,ndi vakadona owo ngava linenepeka, awo kwa va reta vagara ava va dira kurugana yovamba.
21 Ano konondundu domoGiliboa,ngano kapisi nga ku kare eme ndi mvhura,mapya gako kapisi ngaga kare nomuzangu ogu ngava gava kwaKarunga,morwa yiko va nyatekerere yilikandwiso yovakwayita wononkondo,kwato hena ogu ana kugwaveka silikandwiso saSauru.
22 Uta wonkanza waJonatana ntani norufuro rwaSauru kwa tjisanga honde zononkore,ntani kwa tetagura vakwayita,awo kwa va tompokere nkenye apa.
23 Sauru naJonatana kwa va here eparu lyawo nalinye,nampili monomfa, awo kapi va ligaunukire.
Awo ngava genderere kupitakana makuvi,awo kwa kere nonkondo kupitakana vanyime.
24 One vakadi womoIsraeli, lireni Sauru,ogu nga mu dwareke makehe gomageha gomawa,ogu ga tulire yininke yongorodo yoyiwa poyikoverero yeni.
25 Vakwayita wononkondo vana fu moyita!
Jonatana kuna fire konondundu doge!
26 Ame nina guwu unene morwa mukwetu Jonatana;ame kwa ku here unene.
Ove kwa here nge unene kupitakana omu va hara nge vakadi.
27 Vakwayita wononkondo vana funtani yirwiso yawo yina zumbana!”
Nonkango dokonhi
^ Ndi “kokukadipaga.”
