Samwere gwauvali 10:1-19
-
Ta fundu Vaamoni noVasiliya (1-19)
10 Konyima hompa goVaamoni ta dogoroka, makura munendi Hanuni ta mu kwama mouhompa.
2 Ndafita ta tanta asi: “Ame ngani likida eharo lyanarunye kwaHanuni ngwendi moomu oguhwe Nahasi va likidire nge eharo lyanarunye.” Makura Ndafita ta tumu vakareli vendi va ka mu hengagwide morwa oguhwe kwa dogorokere. Nye apa va ka sikire vakareli vaNdafita mosirongo soVaamoni,
3 vapitisili woVaamoni tava tantere hompa gwawo Hanuni asi: “Wa ha gazara asi Ndafita kuna kutumine vakareli vendi va ya ku hengagwide morwa oguho vana dogoroka. Ndafita kuna tumu vakareli vendi koge va ya tare sitata, yipo ngava si guse.”
4 Makura Hanuni ta gusa vakareli vaNdafita, ta va kurura nonzwedu dawo koruha rumwe ntani ta tetere yikoverero yawo mombunda, tava va ninki va ze.
5 Apa ga yi zuvhire Ndafita, ta tumu vantu va ka va gwane, yeeyi vagara owo kwa swaukire unene. Ndafita kwa va tanterere asi: “Kareni moJeliko dogoro ngadi kure nonzwedu deni ntani nye ngomu tengura.”
6 Konyima, Vaamoni tava dimburura asi Ndafita ana va nyenge, makura Vaamoni tava futu Vasiliya womoBete-rehobu ntani Vasiliya womoSoba va ka rwe kumwe nawo. Sivaro sawo kwa kere 20 000, ano hompa gwaMaka kwa va pere vakwayita 1 000 ntani vakwayita 12 000 kwa tundire koIsitoba.*
7 Apa ga yi zuvhire Ndafita, ta tumu Jowabu novakwayita vendi navenye, kukwatera mo vakwayita vendi wononkondo unene va ka va rwise.
8 Makura Vaamoni tava zi va ka sikame pevero lyositata yipo va ka rwe yita, ano Vasiliya womoSoba nava womoRehobu novakwayita womoIsitoba* nava womoMaka, kwa kere velike mezana.
9 Jowabu apa ga mwene vakwayita kuna kumutundilira konyima nokomeho, ta horowora vakwayita wononkondo moIsraeli, ta va ninki va ze va ka rwe noVasiliya.
10 Ta ninki mukurwendi Abisayi a pitisire vakwayita wokuhupa ko, yipo va ze va ka rwe noVaamoni.
11 Makura Jowabu ta tanta asi: “Nsene Vasiliya nava kara nononkondo kupitakana nge, wa hepa kuwiza o ya vatere nge. Nye nsene Vaamoni nava kara nononkondo kukupitakana, nani wiza ni ya ku vatere.
12 Twa hepa kukara nononkondo nouradi, yipo tu popere vantu vetu noyitata yaKarunga gwetu, ano Jehova nga rugana eyi nga mona asi yiwa.”
13 Makura Jowabu novakwayita vendi tava zi va ka rwise Vasiliya, ano Vasiliya tava duka.
14 Apa va mwene Vaamoni asi Vasiliya vana duka, nawo tava dukire mositata va sige Abisayi. Konyima zokurwisa Vaamoni, Jowabu ta tengura koJerusarema.
15 Apa va dimbwilire Vasiliya asi Vaisraeli vana va fundu, awo tava lipongaike.
16 Makura Hadadesere ta zigida Vasiliya ava va kara pepi nomukuro,* ano awo tava zi moHeramu. Awo kwa va pitisilire Sobaka mukurona govakwayita vaHadadesere.
17 Apa ga yi zuvhire Ndafita, ta ninki Vaisraeli navenye va ponge, makura tava rutu mukuro gwaJorodana va ze koHeramu. Vasiliya tava zi va ka gwane Ndafita va ka mu rwise.
18 Nye Vasiliya tava duka va tjwayuke Vaisraeli; Ndafita kwa dipagere vantu 700 ava va rondere momatemba novarondi wononkambe woVasiliya 40 000 ntani age hena kwa dipagere Sobaka mukurona govakwayita vawo.
19 Apa va yi dimbwilire vahompa navenye ava ngava ruganene Hadadesere asi Vaisraeli vana va fundu, makura tava tulisa po usimbu mbili noVaisraeli ntani tava tameke kuvaruganena; Vasiliya kapi va here hena kuvatera Vaamoni morwa awo kwa kere noutjirwe.
