Samwere gwauvali 11:1-27
11 Ketamekero lyomvhura* posiruwo esi ava zi vahompa koyita, Ndafita kwa tumine Jowabu novakareli vendi ntani novakwayita navenye woVaisraeli va ze va ka dipage Vaamoni. Awo kwa kundurukidire sitata saRaba, ano Ndafita kwa kere moJerusarema.
2 Ezuva limwe kongurova, Ndafita kwa pindukire pombete zendi ta zi a ka gendagure keguru lyombara zendi, makura ta mono mukadi ana kuzogana. Mukadi ogo kwa kere gomuwa unene.
3 Ndafita ta tumu mugara gumwe a ka papare mauzera kuhamena mukadi ogo, makura mugara ogo ta ya tanta asi: “Mukadi ogo yige Bateseba munaEliyamu, ano mugara gwendi Uliya goMuheti.”
4 Ndafita ta tumu vantu va ka mu rete, makura Bateseba ta wiza kwendi ano age ta ligwanekere nendi panyama. (Yininke eyi kwa horokere posiruwo esi ga likuhwire morwa age kwa nyete.*) Konyima, Bateseba ta tengura kembo lyendi.
5 Mukadi ogo ta kara nezimo, makura ta tumu mbudi kwaNdafita va ka mu tantere asi: “Nina kara nomarutu gavali.”
6 Makura Ndafita ta tumu mbudi kwaJowabu asi: “Tuma Uliya goMuheti a wize kwange.” Ano Jowabu ta tumu Uliya kwaNdafita.
7 Apa ga ya sikire Uliya, Ndafita ta mu pura omu ana karere Jowabu nomu vana karere vakwayita ntani nomu yina kugenda po yita.
8 Makura Ndafita ta tantere Uliya asi: “Zende kembo lyoge o ka pwizumuke.”* Apa ga tundire Uliya mombara zahompa, hompa ta mu tumine uhwi.*
9 Nye Uliya kwa rere pevero lyombara zahompa kumwe novakareli vahompa ntani age kapi ga zire kembo lyendi.
10 Ndafita tava mu tantere asi: “Uliya kapi ka zire kembo lyendi.” Makura Ndafita ta pura Uliya asi: “Nani kapisi kosirongo sokoure ono kutunda? Morwasinke nye ko dililire kuza kembo lyoge?”
11 Uliya ta limburura Ndafita asi: “Sikesa segwanekero novagara womoIsraeli nava womorudi rwaJuda kuna kara monotende, ano hompa gwange Jowabu novakareli vahompa, kuna dike notende dawo mezana. Morwasinke nye nani zira kembo lyange ni ka lye nokunwa ntani ni ka rare namukadange? Ame tani gana asi siruwo esi ono kara nomwenyo, ame kapi tani vhuru kurugana yininke oyo.”
12 Makura Ndafita ta tantere Uliya asi: “Kara hena paapa naina, ano mungura ngani kuninka o ze.” Makura Uliya ta kara moJerusarema ezuva olyo nezuva lyokukwama ko.
13 Ndafita ta tumu vantu va ka mu zigide, makura tava li nokunwa dogoro Uliya ta korwa. Nye apa lya tokere ezuva, ta zi a ka rare kumwe novakareli vahompa. Age kapi ga zire kembo lyendi.
14 Ngurangura, Ndafita ta tjangere Jowabu mbilive, ta ninki Uliya a zi piture.
15 Age kwa tjenge mombilive asi: “Tura Uliya komeho zovakwayita oku ayi didi yita, makura ngomu mu sige gelike yipo ngava mu dipage.”
16 Jowabu kwa nomenene sitata ntani kwa tulire Uliya oku ga divire asi yiko kwa kere vakwayita woVaamoni wononkondo.
17 Apa va tundire vagara mositata va ze va ka rwise Jowabu, awo kwa dipagere vakareli vamwe vaNdafita, ano Uliya goMuheti nage kwa mu dipagere kumwe nawo.
18 Jowabu ta tumu mbudi kwaNdafita va ka mu tantere eyi yina horoka moyita.
19 Age kwa tanterere muntu ogu ga tumine asi: “Apa no ka mana kutantera hompa kuhamena eyi yina horoka moyita,
20 age kuvhura a ka handuke, makura a ka ku pure asi: ‘Morwasinke muna hederere pepi nositata mu ka rwe? Ngoso kapi muna yi diva asi kuvhura va mu ponye vantu ava vana kara keguru lyekuma ndi?
21 Yilye ga dipagere Abimereki munaJerubeseti? Nani kapisi mukadi ogu ga kere keguru lyekuma ogu ga mu ganderere emanya lyokugogesa mbuto makura a fe moTebesi? Morwasinke nye komu hederere pepi nekuma?’ Makura ka tante hena asi: ‘Mukareli goge Uliya goMuheti nage ka fire.’”
22 Makura muntu ogu ga tumine ta zi, ta ka tantera Ndafita nayinye eyi ga mu tanterere Jowabu.
23 Ano mugara ogo ta ka tantera Ndafita asi: “Vakwayita vawo ka va kere nononkondo kutupitakana ntani ka va tu wizilire mezana, yiyo ka tu va rwisire dogoro pevero lyositata sawo.
24 Vantu ava ka va kere keguru lyekuma yiyo ka va ponyene vakareli woge, ano vakareli woge vamwe yiyo ka va fire kukwatera mo mukareli goge Uliya goMuheti.”
25 Makura Ndafita ta tantere mugara ogo asi: “Ka tantere Jowabu asi: ‘Wa ha kara nosinka kuhamena yininke eyi, yeeyi nkenye ogu kuvhura a fe moyita. Rwisa sitata oso dogoro ngo si kwate,’ ntani ka mu korangede.”
26 Apa ga zuvhire mukadaUliya asi mugara gwendi ana fu, age kwa lilire mugara gwendi.
27 Apa ga mene kulira mugara gwendi, Ndafita ta tumu vantu va ka mu simbe va mu rete membo lyendi. Makura age ta mu kwara ntani ta mu retere munona gomumati. Nye eyi ga rugene Ndafita kwa guvisire unene Jehova.*
Nonkango dokonhi
^ Kwa tamba posinema somangenyena.
^ Nampo morwa kwa kere kosidira.
^ MoRuhebeli asi “o ka kuhwe nompadi doge.”
^ Ndi “ruha rwendi ronondya,” nampo kwa tamba konondya edi a gava mwenyembo komugenda gomulyo.
^ MoRuhebeli asi “kwa kere yininke yoyidona kosipara saJehova.”
