Samwere gwauvali 12:1-31
12 Makura Jehova ta tumu Natana kwaNdafita. Natana ta zi kwaNdafita, ta ka mu tantera asi: “Mositata simwe mwa kere vagara vavali, gumwe gongawo ano gumwe goruhepo.
2 Mugara gongawo kwa kere nononzwi dononzi nonongombe;
3 nye mugara goruhepo kwa kere tupu nonzwigona zonkadi ezi ga rende. Age nga zi pakere mbili ntani kwa kulilire membo lyendi kumwe novana vendi wovagara. Nzwigona ozo ngazi li nondya dononsesu edi ga kere nado nokunwa monkinda zendi ntani ngazi rara momawoko gendi. Age nga zi tekura ngwendi munendi gomukadi.
4 Konyima, mugenda ta wiza membo lyomugara gongawo, nye age kapi ga gusire nzwi zendi ndi ngombe zendi yipo a terekere mugenda gwendi. Age kwa gusire nzwigona zomugara goruhepo a zi terekere mugenda gwendi.”
5 Makura Ndafita ta handukire unene mugara ogo, ta tantere Natana asi: “Ame tani gana kwaJehova Karunga goMunamwenyo asi mugara ogo ga rugana yininke oyo ga wapera kumudipaga!
6 Age ga hepa hena kufuta mugara ogo nonzwi ne, morwa yininke eyi ga rugana ntani kapi ga likida nkenda.”
7 Makura Natana ta tantere Ndafita asi: “Mugara ogo nyove! Jehova Karunga goVaisraeli kuna tanta asi: ‘Nyame na ku gwaveka o kare hompa goVaisraeli ntani nyame na ku popera momawoko gaSauru.
8 Ame kwa here kukupa embo lyahekuroge nokugava vakadi vendi momawoko goge ntani ame kwa kuninka o pangere Vaisraeli norudi rwaJuda. Ame hena na liwapaikilire kukuruganena yininke yoyinzi, nsene asi eyi na ku pa kapi ya kugwanena po.
9 Morwasinke nye wa dililire kufumadeka nge ame Jehova pokurugana yininke yoyidona kosipara sange? Ove kwa dipaga Uliya goMuheti norufuro! Yiyo wa gusa mukadendi konyima zokumudipaga norufuro roVaamoni.
10 Yipo nye, vantu vemepata lyoge ngava va dipaga nkenye apa norufuro, morwa kapi wa fumadeka nge apa wa gusire mukadaUliya goMuheti a kare mukadoge.’
11 Jehova kuna kutanta asi: ‘Ame ngani kuninka o ligwanekere noudigu ou ngau tundilira mepata lyoge. Ame ngani gusa vakadi woge ni va gave komugara gwapeke* ove kuna kutara ntani age nga ligwanekera nawo panyama komeho zovantu.
12 Nampili ngomu wa yi rugana mokahorehore, ame ngani rugana yininke eyi komeho zoVaisraeli yipo va yi mone.’”
13 Makura Ndafita ta tantere Natana asi: “Ame na zona kwaJehova.” Natana ta limburura Ndafita asi: “Jehova ana ku gusire po nzo zoge, ove kapi ngo fa.
14 Nampili ngoso, mokumona asi ove kapi wa likida efumadeko kwaJehova moukaro ou, munoge gomugara ogu ka va hampurukire nga fa.”
15 Makura Natana ta tengura kembo lyendi.
Ano Jehova ta ninki munaNdafita ogu ga retere namukadaUliya a vere.
16 Ndafita ta likwambere kwaKarunga gousili kuhamena munona ogo. Age kwa dililire ntani nga rara pevhu masiku mudima.
17 Masimbi gemembo lyendi ngaga zi ga ka mu sikamene nokumutantera a pinduke pevhu, nye age kwa nyokere ntani kapi nga li nawo.
18 Mezuva lyauntambali, munona ta dogoroka, nye vakareli vaNdafita kwa tjilire kumutantera asi munendi ana fu. Awo kwa tente asi: “Apa ga kere munona muzuni, ose kwa uyungire naNdafita, nye kapi nga tu purakene. Ngapi nye omu natu mu tantera asi munona ana fu? Age kuvhura a rugane yininke yoyidona.”
19 Apa ga mwene Ndafita vakareli vendi kuna kuliwowotera, ta dimburura asi munendi ana fu. Ndafita ta pura vakareli vendi asi: “Munange ana fu ndi?” Awo tava mu limburura asi: “Nhi ana fu.”
20 Ndafita ta katuka, ta zogana ta likwita magadi ntani ta tjindji yikoverero yendi makura ta zi kotende zaJehova* a ka mu karere. Konyima, ta zi mombara zendi, ta hundire va mu retere nondya makura ta li.
21 Vakareli vendi tava mu pura asi: “Morwasinke ono ruganene yininke eyi? Apa ga kere munona muzuni ove kwa dililire oku to lili, nye apa ana fu ove yiyo ono katuka o lye nondya.”
22 Age tava limburura asi: “Apa ga kere munona muzuni, ame kwa dililire oku tani lili, morwa ame kwa gazarere asi nampo Jehova na fira nge nkenda a sige munange a paruke.
23 Mokumona asi munange ana fu, morwasinke nye nani dililira? Kuvhura nye ni mu tengwidire keparu ndi? Name ngani fa ngwendi yige, nye age kapi ta vhuru kutengura kwange.”
24 Makura Ndafita ta hengagwida mukadendi Bateseba. Konyima, ta zi kwendi ta ka ligwanekera nage panyama. Konyima zosiruwo, ta hampuruka munona gomumati, makura Ndafita ta mu ruku Saromo.* Ano Jehova kwa mu here,
25 ntani ta tumu mbudi komuporofete Natana yipo a mu ruke Jedidiya,* morwa Jehova kwa mu here.
26 Jowabu kwa twikilire kurwisa sitata saRaba omu va kere Vaamoni dogoro ta kwata ruha rumwe rositata oku za kere mbara zahompa.
27 Makura Jowabu ta tumu vantu kwaNdafita va ka mu tantere asi: “Ame na rwisa sitata saRaba ntani na kwata sitata somema.*
28 Yipo nye, ninka vakwayita navenye wokuhupa ko va ponge mu ka kundurukide sitata, mu si kwate. Nsene kapi ono kuyirugana, ame ngani si kwata makura vantu ngava tante asi nyame na si funda.”*
29 Makura Ndafita ta ninki vakwayita navenye va ponge, tava zi kositata saRaba, tava ka si rwisa ntani tava si kwata.
30 Makura ta gusa nkata ezi za kere komutwe gwaMalikamu.* Mukumo gwazo kwa sikire ponokilograma 34* dongorodo. Nkata ozo kwa kere nomamanya gondiro makura tava zi dwareke Ndafita komutwe. Ndafita kwa ka simbire hena emona lyenzi lyomositata.
31 Age kwa gusire vantu ava va kere mositata, ta va ninki va tete mamanya, va rugane makuva goyivera, yiruganeso yimwe yoyivera youtwe ntani va rugane nondopi. Ndafita kwa rugene yininke eyi koyitata nayinye yoVaamoni. Konyima, Ndafita novakwayita vendi tava tengura koJerusarema.
Nonkango dokonhi
^ Ndi “mukweni.”
^ MoRuhebeli asi “nzugo zaJehova.”
^ Kwa tunda konkango zoRuhebeli ezi azi tanta asi “Mbili.”
^ Kutanta asi “Jehova kwa mu hara.”
^ Nampo kwa tamba komema aga ga kara mositata.
^ MoRuhebeli asi “makura ngava si zigidise kedina lyange.”
^ Kwa tamba kosikarunga soVaamoni.
^ MoRuhebeli asi “talent.” Tara App. B14.
