Samwere gwauvali 13:1-39
13 Abisaromo munaNdafita kwa kere nampanzendi gomuwa unene gedina Tamara, ano Amunoni munaNdafita kwa here unene Tamara.
2 Amunoni kwa guvire unene morwa kwa here unene mpanzendi Tamara, yeeyi age kapi ga ligwanekera rumwe panyama nomugara ntani ayo kwa digoperere Amunoni kumurugana yuma.
3 Amunoni kwa kere nakaume kendi gedina Jehonadabu, age kwa kere munaSimeya mukurwaNdafita. Jehonadabu kwa kere mugara gokukotoka unene.
4 Makura ta pura Amunoni asi: “Morwasinke ove munahompa, o guvire nkenye ngurangura? Tantera nge.” Amunoni ta limburura asi: “Ame kwa hara Tamara mpanzaAbisaromo.”
5 Jehonadabu ta mu tantere asi: “Ngo rare pombete zoge o lininkise asi kuna kuvera. Apa ngava wiza oguho va ya ku dingure, ngo va tantere asi: ‘Na kanderere ninkeni mumbyange Tamara a wize kwange a ya pe nge nondya. Nsene na ya tereka komeho zange nondya edi ava terekere vaveli* makura a di pe nge, ame nani ya di lya.’”
6 Makura Amunoni ta rara, ta lininkisa asi kuna kuvera, ano hompa ta wiza a ya mu tare. Amunoni ta tantere hompa asi: “Ninkeni mumbyange Tamara a wize a ya kangere nge yikuki* komeho zange, yipo a ya yi pe nge.”
7 Ndafita ta tumu vantu kembo va ka tantere Tamara asi: “Ninka o ze kembo lyamukuroge Amunoni, o ka mu terekere nondya.”*
8 Makura Tamara ta zi kembo lyamukurwendi Amunoni, ta ka mu gwana ana rara. Ta gusa yiduva ta yi wapaike makura ta yi kanga yikuki.
9 Konyima Tamara ta gusa yikuki, ta yi gava kwaAmunoni. Nye Amunoni ta nyoka kuyilya, ta tantere vantu asi: “Namuvenye tundeni mo apa!” Makura navenye tava tundu mo.
10 Amunoni ta tantere Tamara asi: “Reta nondya* monzugo ezi ani rara, yipo o ya di pe nge ni ya lye.” Makura Tamara ta gusa yikuki,* ta yi twara kwamukurwendi Amunoni monzugo ezi a rara.
11 Apa ga yi mu pere a lye, Amunoni ta mu kwata, ta mu tantere asi: “Wiza tu ya ligwanekere panyama mumbyange.”
12 Nye Tamara ta mu tantere asi: “Hawe mukurwange! Wa ha retera nge eswau, yeeyi yininke yangoso kapi a yi horoka moIsraeli. Wa ha rugana yininke yoyidona ngoso.
13 Ngapi omu ngani paruka neswau lyange? Ove ngava kutara ngwendi gumwe govagara wovadona moIsraeli. Na kanderere ka uyunge tupu nahompa, yeeyi age kapi na nyoka kugava nge koge.”
14 Nye Amunoni kapi ga mu purakenene, mokumona asi age kwa kere nononkondo, ta mu swaukisa pokumukwatera kononkondo.
15 Makura Amunoni ta tameke kunyenga unene Tamara. Age kwa mu nyengere unene kupitakana omu ga mu here pomuhowo. Amunoni ta mu tantere asi: “Katuka o tunde po apa!”
16 Konyima, Tamara ta mu tantere asi: “Hawe mukurwange, wa ha ninka nge ni ze yeeyi ayo yidona kupitakana eyi ono rugana nge!” Nye Amunoni kapi ga mu purakenene.
17 Amunoni ta zigida mukareli gwendi gomunona, ta mu tantere asi: “Na kanderere gusa muntu ogu kosipara sange ntani pata kevero konyima zokumupwagesa.”
18 (Tamara kwa dwere hema zokulikarera, yeeyi eyi yiyo yikoverero ngava dwara vana vahompa wovakadi ava va dira kuligwanekera rumwe panyama nomugara.) Makura mukareli ta mu pwagesa ponze, ta pata kevero.
19 Makura Tamara ta tura enoto momutwe gwendi, ta taura hema zendi zongwa ezi ga dwere. Age kwa likwete momutwe gwendi, ta gendi oku ta lili.
20 Makura mpanzendi Abisaromo ta mu pura asi: “Mukuroge Amunoni yige ana kurugana yininke eyi yoyidona ndi? Wa ha yi tantera muntu mumbyange, yeeyi Amunoni mukuroge. Wa ha kara nosinka kuhamena yininke eyi.” Makura Tamara ta likarere gelike membo lyaAbisaromo.
21 Apa ga zuvhire hompa Ndafita yininke eyi, ta handuka unene. Nye kapi ga here kuguvisa munendi Amunoni, morwa age kwa mu here ntani kwa kere mbeli zendi.
22 Ano Abisaromo kapi ga uyungire yininke yoyiwa ndi yoyidona kwaAmunoni, age kwa nyengere Amunoni morwa age kwa swaukisire mpanzendi Tamara.
23 Konyima zonomvhura mbali, vantu kwa kurwire nonzwi daAbisaromo moBara-hasoro pepi naEfurayimi, ano Abisaromo ta zigida vana vahompa navenye wovagara.
24 Makura Abisaromo ta zi kwahompa, ta ka mu tantera asi: “Ame mukareli goge kuna kukurura nonzwi dange. Hompa, ninka tu ze kumwe nove novakareli woge.”
25 Nye hompa ta limburura Abisaromo asi: “Hawe munange, natuvenye nsene tu za nove, tatu ka ku retera mudigo.” Nampili ngomu Abisaromo ga mu sininikire, hompa kapi ga here kuza, nye ga mu tungikire.
26 Makura Abisaromo ta tanta asi: “Nsene kapi muna kuza, pulisireni mukurwange Amunoni a ze kumwe nose.” Hompa ta mu pura asi: “Morwasinke na zira kumwe none?”
27 Nye Abisaromo ta mu sininike, makura hompa ta pulisire Amunoni a ze kumwe novana vendi navenye wovagara.
28 Makura Abisaromo ta tantere vakareli vendi asi: “Mwa hepa kunomena Amunoni. Apa na hafa morwa ana korwa vhinyu, nani mu tantera asi: ‘Dipageni Amunoni!’ One mwa hepa kumudipaga. Mwa ha tjira, yeeyi nyame nina kuyimupangera. Koreni ntani kareni nouradi.”
29 Makura vakareli vaAbisaromo tava dipaga Amunoni ngwendi moomu ga va tanterere Abisaromo. Ano vana vahompa wokuhupa ko tava katuka, nkenye ogu ta rondo ponsino zendi ta ka duka.
30 Apa va kere vana vahompa monzira, Ndafita tava mu tantere asi: “Abisaromo ana dipaga vana vahompa navenye, kwato gumwe ogu ana hupu po.”
31 Makura hompa ta katuka, ta taura yikoverero yendi ntani ta rara pevhu, ano vakareli vendi tava sikama pepi nage awo vana taura yikoverero yawo.
32 Nye Jehonadabu munaSimeya mukurwaNdafita, ta tanta asi: “Hompa gwange, wa ha gazara asi vana woge navenye vana va dipaga, Amunoni gelike ana fu. Abisaromo yige ana gava mpangera ezi. Age kwa tokora kurugana yininke eyi kutunda apa Amunoni ga swaukisa mpanzendi Tamara.
33 Yipo nye, wa ha purakena kovantu ava vana kutanta asi: ‘Vana vahompa navenye wovagara vana fu.’ Amunoni gelike ana fu.”
34 Posiruwo oso, Abisaromo ta tjwayuka. Konyima, munomeni ta kankuka makura ta mono vantu wovanzi vana kutundilira konyima zendi monzira ezi za kere pepi nondundu.
35 Makura Jehonadabu ta tantere hompa asi: “Tara! Vana vahompa wovagara vana ka tengura, ngwendi moomu ana yi tanta mukareli goge.”
36 Apa ga mene kuuyunga, vana vahompa tava ya siki awo kuna kulira unene, ano hompa novakareli vendi nawo tava lili unene.
37 Abisaromo kwa tjwayukilire kwaTalimayi hompa gwaGesure, munaAmihudi. Ndafita kwa lilire munendi gomugara mazuva gomanzi.
38 Apa ga tjwayukilire Abisaromo koGesure, age kwa ka kere ko nomvhura ntatu.
39 Konyima, Ndafita kwa here kuza kwaAbisaromo, yeeyi age kwa hagekere kulira munendi Amunoni.
Nonkango dokonhi
^ Ndi “komeho zange mboroto zehengagwido.”
^ MoRuhebeli asi “yikuki yokufana ngwendi mutjima.”
^ Ndi “mboroto zehengagwido.”
^ Ndi “mboroto zehengagwido.”
^ MoRuhebeli asi “yikuki yokufana ngwendi mutjima.”
