Samwere gwauvali 14:1-33
14 Jowabu munaSeruya ta dimburura asi hompa kuna kurongora Abisaromo.
2 Makura Jowabu ta ka zigida mukadi gonondunge gokoTekoa, ta mu tantere asi: “Na kanderere, lininkisa o moneke ngwendi muntu ogu ana fisa, o dware yikoverero eyi ava dwara vantu ava vana fisa ntani wa ha likwita magadi. Kara ngwendi mukadi ogu ga fisa, ogu ana kara moruguwo siruwo sosire.
3 Konyima zende kwahompa o ka mu tantere asi.” Makura Jowabu ta tantere mukadi ogo eyi na ka uyunga.
4 Mukadi gokoTekoa ta zi kwahompa, ta ka ligandera pevhu ntani ta linyongamene, ta tanta asi: “Hompa, vatera nge!”
5 Hompa ta mu pura asi: “Udigu musinke ono kara nawo?” Makura mukadi ta mu limburura asi: “Ame na fisa mugara gwange.
6 Ame mukareli goge kwa kere novana vavali wovagara, awo kwa rwene ponze zositata. Kwato ogu ga va keve makura gumwe ta toona mukwawo dogoro ta mu dipaga.
7 Ngesi ekoro nalinye lina di vyuka nge ame mukareli goge. Awo kuna kutanta asi: ‘Tu pa munoge ogu ana dipaga mukwawo yipo tu mu dipage morwa ana dipaga mukwawo, nampili yi kare asi yige nga pinga yininke yoguhwe.’ Awo vana hara kudipaga munange ogu ga hupa po ngwendi moomu muntu a dimisa ekara lyomundiro lyokuhulilira. Nsene va yi rugana, edina lyamugara gwange ngava lidivara pevhu ntani kwato ogu nga hupa po moruvharo rwendi.”
8 Makura hompa ta tantere mukadi ogo asi: “Zende kembo lyoge, ame nani rugana ko yuma.”
9 Mukadi gokoTekoa ta tantere hompa asi: “Hompa gwange, unzoni u kare wange nepata lyotate, nye hompa nepangero lyendi kapi ana kara nounzoni.”
10 Hompa ta mu tantere asi: “Nsene gumwe na kuuyungisa* hena, mu reta kwange makura age kapi na kukwama-kwama hena.”
11 Nye mukadi ogo ta tanta asi: “Na kanderere hompa, ngano o diworoke Karunga goge Jehova, yipo muntu ogu ana hara kutengwida kuwoko munange a dire kumudipaga.” Makura hompa ta tanta asi: “Tani gana kwaJehova Karunga goMunamwenyo asi kwato nampili ruhuki rwamunoge rumwe nga ru gwira pevhu.”
12 Mukadi ogo makura ta tanta asi: “Na kanderere, pulisira mukareli goge a uyunge kumwe nahompa.” Makura hompa ta tanta asi: “Uyunga!”
13 Mukadi ogo ta tanta asi: “Morwasinke nye wa ruganena yininke eyi kovantu vaKarunga? Mokumona asi ove kwa tjida munoge ntani kapi wa mu ninka a tengure, ove ono kara nounzoni kweyi ono uyunga.
14 Ose ngatu fa ntani ngatu fana ngwendi mema aga vana tjisire pevhu, aga nava dira kuvhura kutengwida, nye Karunga kapi a dipaga muntu. Age kupapara nokonda yipo a tengwide muntu ogu ga tjida.
15 Ame kuna wiza ni ya tantere hompa gwange kuhamena yininke eyi morwa vantu kuna tjilisa nge, makura yiyo nina tanta asi: ‘Tanko ni ka tantere hompa, nampo age na rugana ko yuma kweyi nani ka mu hundira ame mupika gwendi.
16 Hompa nampo kuvhura a ka purakene nge, a popere nge namunange ame mupika gwendi kovantu ava vana hara kutudipaga, va tu guse upingwa ou ga tu pa Karunga.’
17 Makura ame mukareli goge yiyo nina tanta asi: ‘Ngano eyi na ka tantera nge hompa gwange yi ka hengagwide nge,’ yeeyi hompa gwange kwa fana ngwendi muengeli gwaKarunga gousili ogu a hangura uwa koudona. Ngano Karunga goge Jehova a kare nove.”
18 Hompa makura ta tantere mukadi ogo asi: “Na kanderere, wa ha horekera nge nkenye eyi nani ku pura.” Mukadi ta limburura asi: “Pura tupu hompa gwange.”
19 Hompa makura ta mu pura asi: “Jowabu yige ana ku tantere o rugane yininke eyi ndi?” Mukadi ta limburura asi: “Ame tani gana koge ove hompa asi mukareli goge Jowabu yige ga tantera nge ni uyunge yininke eyi ngwendi moomu ono kutanta.
20 Mukareli goge Jowabu kuna rugana yininke eyi yipo o mone ukaro ou monkedi zapeke, nye hompa gwange kwa kara nonondunge ngwendi muengeli gwaKarunga gousili ntani wa diva nayinye eyi yina kuhoroka mosirongo.”
21 Makura hompa ta tantere Jowabu asi: “Nawa tupu, nani rugana yininke eyi. Zende o ka simbe mumati Abisaromo.”
22 Makura Jowabu ta ligandere pevhu, ta linyongamene ntani ta hamberere hompa. Jowabu ta tanta asi: “Hompa gwange, neina ame mukareli goge nayi diva asi ove wa hafera nge, morwa ove hompa kuna rugana eyi nina ku hundire ame mukareli goge.”
23 Jowabu ta katuka a ze koGesure, ta ka simba Abisaromo a mu rete koJerusarema.
24 Nye hompa ta tanta asi: “Mu ninka a tengure kembo lyendi kapisi a wize kwange.” Makura Abisaromo ta tengura kembo lyendi. Age kapi ga zire a ka mone hompa.
25 MoIsraeli nazinye, kwato mugara ogu ngava pandadeke unene ngwendi Abisaromo morwa age kwa kere muwa unene mosipa. Age kwa wepe kutundilira konompadi dogoro komutwe.
26 Apa nga kurura nohuki dendi, mukumo gwado kwa sikire ponokilograma 2,3* kuliza nosiviha esi ngava ruganesa mombara.* Age nga di kurura kehagero lyankenye mvhura morwa ado kwa kere udigu.
27 Abisaromo kwa kere novana vatatu wovagara ano gomukadi gumwe. Edina lyendi kwa kere Tamara. Age kwa kere mukadi gomuwa unene.
28 Abisaromo kwa twikilire kutunga moJerusarema nomvhura mbali, nye kapi ga mwene hompa.
29 Makura Abisaromo ta zigida Jowabu a wize kwendi yipo a mu tume kwahompa, nye Jowabu kapi ga zire kwendi. Ta mu zigida hena rwauvali, nye Jowabu simpe ta nyoka.
30 Konyima Abisaromo ta tantere vakareli vendi asi: “Epya lyaJowabu kwa likundama neli lyange ntani amo kuna kara mo nombuto.* Zendeni mu ka li hwike.” Makura vakareli vaAbisaromo tava ka hwika epya lyaJowabu.
31 Makura Jowabu ta zi kembo lyaAbisaromo, ta ka mu pura asi: “Morwasinke vakareli woge vana hwikire epya lyange?”
32 Abisaromo ta limburura Jowabu asi: “Ame kani ku zigidire, nye ove kapi ko wizire. Ame kwa here ni ku tume kwahompa o ka mu tantere asi: ‘Morwasinke na ka tundira koGesure? Hansa ngano na kere kooko. Pulisira nge ni kumone hompa. Ano nsene asi nimunzoni, dipaga nge.’”
33 Makura Jowabu ta zi kwahompa a ka mu tantere, ano hompa ta zigida Abisaromo. Apa ga ya sikire, age ta ligandere komeho zahompa ntani ta linyongamene, makura hompa ta ncumita Abisaromo.
Nonkango dokonhi
^ Ndi “kusipangeda.”
^ MoRuhebeli asi “noshekel 200.” Tara App. B14.
^ Esi nampo kwa kere siviha esi ngava ruganesa mombara ndi nampo shekel ezi ngava ruganesa mombara ezi za lisigire nezi ngava ruganesa vantu.
^ Kwa tamba kombuto zokufana ngwendi rukokotwa.
