Samwere gwauvali 15:1-37
15 Konyima zeyi, Abisaromo kwa ya kere netemba nononkambe ntani novagara 50 ava ngava piti komeho zendi.
2 Abisaromo nga pinduka ngurangura zonene a ka sikame konontere donzira ezi za za kerungavero lyositata. Nkenye apa muntu nga kara noudigu ou na twara kwahompa yipo a ka u pangure, Abisaromo nga mu zigida, a mu pure asi: “Kupi ono kutundilira?” Muntu ogo nsene a limburura asi: “Ame mukareli goge gomorudi rumwe roVaisraeli,”
3 Abisaromo nga mu tantere asi: “Mouhunga ono kara, nye kwato muntu gwahompa ogu na vhura kupurakena udigu woge.”
4 Abisaromo ta tanta asi: “Ngano va tulire nge ni kare mupanguli mosirongo, nkenye muntu ogu ana kara noudigu ou va hepa kupangura, ngano nga wiza kwange ntani ngani divilisa asi vana u pangura pauhunga.”
5 Nsene muntu a wiza pepi naAbisaromo a mu nyongamene, Abisaromo ta gonona kuwoko kwendi a mu kwate nokumuncumita.
6 Abisaromo nga rugana yininke eyi koVaisraeli navenye ava ngava wiza va rete maudigu gawo kwahompa a ya ga pangure. Abisaromo kwa twikilire kugombeka Vaisraeli.
7 Konyima zonomvhura ne,* Abisaromo ta tantere hompa asi: “Pulisira nge ni ze koHeburoni ni ka sikise mo eyi na tumbwidira Jehova.
8 Yeeyi apa na kere moGesure moSiliya, ame mukareli goge kwa tulire po mugano ogu asi: ‘Nsene Jehova nga tengwida nge koJerusarema, ame ngani gava nzambo* kwaJehova.’”
9 Makura hompa ta tantere Abisaromo asi: “Zende mombili.” Abisaromo ta katuka, ta zi koHeburoni.
10 Abisaromo ta tumu vantu vendi mokahorehore komarudi goVaisraeli nagenye. Age kwa va tanterere asi: “Apa ngomu zuvha ruvinga vana kufuda, diviseni asi ‘Abisaromo ana kara hompa!’”
11 Vagara 200 womoJerusarema kwa zire kumwe naAbisaromo koHeburoni. Abisaromo yige ga va zigidire ntani awo kapi va divire eyi yina kuhoroka.
12 Apa ga geve Abisaromo nonzambo, age kwa tumine vantu va ka zigide Ahitofeli. Ahitofeli kwa kere mugavindunge gwaNdafita ntani age kwa tungire mositata saGiro. Sivaro sovantu ava va kwatesere ko Abisaromo va rwanese hompa, kwa twikilire kuligwederera.
13 Konyima, muntu gumwe ta wiza a ya tantere Ndafita asi: “Vagara woVaisraeli ngesi kuna kukwatesa ko Abisaromo.”
14 Makura Ndafita ta tantere vakareli vendi ava ga kere kumwe nawo moJerusarema asi: “Tu zeni tu duke, yeeyi kapi ngatu vhura kuhenduka Abisaromo! Genderereni ko, yeeyi age kuvhura a ya tu funde ntani a ya dipage vantu womositata norufuro!”
15 Vakareli vahompa tava limburura asi: “Vakareli woge vana liwapaikire kurugana nkenye eyi ana tokora hompa.”
16 Makura hompa ta zi kumwe novantu vemembo lyendi navenye, nye age kwa sigire yihora yendi* murongo yi takamese embo* lyendi.
17 Makura hompa novantu ava ga kere nawo tava tundu mositata, tava zi dogoro tava ka sika koBete-merahaki.
18 Ngomu va gendere, hompa kwa sikeme a konakone vakareli vendi navenye, Vakereti, Vapereti ntani novagara 600 ava va tundire moGata.
19 Makura hompa ta pura Itayi gomoGata asi: “Morwasinke no zira kumwe nose? Tengura o ka kare kumwe nahompa gomupe, yeeyi ove munayirongo ntani ove kwa tjwayuka kosirongo seni.
20 Ove ntaantani tupu ko wizire, ngapi nye omu nani kupulisira o ze kumwe name oku nina dili kudiva? Tengura ntani pitura vantu woge. Jehova ngano a ku likide nkenye apa eharo lyanarunye!”
21 Nye Itayi ta limburura hompa asi: “Tani gana kwaJehova Karunga goMunamwenyo ntani koge ove hompa asi nkenye oku ngo kara name yiko ngani kara. Ame nina liwapaikire kufa kumwe nove!”
22 Ndafita ta tantere Itayi asi: “Zende mesinya mwina lyomuramba.” Makura Itayi ta zi mesinya mwina lyomuramba kumwe novantu vendi ntani novanona.
23 Vantu navenye ava va kere mosirongo kwa lilire apa va zire vantu mesinya mwina lyomuramba. Ano hompa kwa sikeme konontere doMuramba gwaKidironi. Vantu navenye kwa tagurukire muramba va ze monzira ezi za za momburundu.
24 Sadoko nage yipo ga kere kumwe noVarevhi ava va simbire sikesa segwanekero saKarunga gousili, makura tava tenteke sikesa saKarunga gousili. Ano Abiyatara nage yipo ga kere apa vantu va tundire mositata va taguruke muramba.
25 Makura hompa ta tantere Sadoko asi: “Tengwida sikesa saKarunga gousili mositata. Nsene Jehova ana hafere nge, name nga tengwida nge yipo ngani si mone nekevango oku sa kara.
26 Nye nsene Karunga kapi ga hafera nge, age nga rugane nkenye eyi nga mona asi yiwa.”
27 Makura hompa ta tantere mupristeli Sadoko asi: “Ove nani kapisi muntu ogu a pumbu? Tengura mombili mositata ntani pitura munoge Ahimasi ntani naJonatana munaAbiyatara.
28 Ame ngani kundindira pomavango gokurutira gomukuro gwaJorodana aga ga kara pepi nomburundu, yipo ngani zuvhe eyi ngo tantera nge.”
29 Makura Sadoko naAbiyatara tava gusa sikesa saKarunga gousili va si tware moJerusarema ntani tava kara moomo.
30 Ndafita kwa lilire apa ga rondere koNdundu zoMauzwe. Age kwa likudumikire komutwe ntani kwa gendere nompadi-mpadi. Ano vantu ava va kere nage, nawo kwa likudumikire konomutwe ntani kwa lilire ngomu va rondere kondundu.
31 Ndafita tava mu tantere asi: “Ahitofeli kuna kukwatesa ko Abisaromo mokukurwanesa.” Makura Ndafita ta tanta asi: “Jehova, ninka magano gaAhitofeli ga kare gougova!”
32 Apa ga ka sikire Ndafita keguru lyondundu oku ngava karere vantu Karunga, ta ka gwana Husayi goMuarekite kuna kumundindira, age ana taura yikoverero yendi ntani ana litura evhu momutwe.
33 Nye Ndafita ta mu tantere asi: “Nsene no za kumwe name, to retere nge mudigo.
34 Nye nsene no tengura mositata o ka tantere Abisaromo asi: ‘Hompa, ame mukareli goge. Nare ame kwa kere mukareli goguho, nye ngesi ame mukareli goge.’ Nsene ngo yi rugana, ove ngo hagekesa eyi ana hara kurugana Ahitofeli.
35 Mupristeli Sadoko naAbiyatara ngava kara kumwe nove. Ngo tantere mupristeli Sadoko naAbiyatara nkenye eyi ngo zuvha mombara zahompa.
36 Sadoko kwa kara namunendi Ahimasi, ano Abiyatara kwa kara namunendi Jonatana. Ngo va tume yipo ngava tantere nge eyi ngo zuvha.”
37 Makura Husayi kaume* kaNdafita, ta zi mositata posiruwo oso age Abisaromo kuna kuhwilira moJerusarema.
Nonkango dokonhi
^ Ndi nampo asi “zonomvhura 40.”
^ Ndi “ame ngani karera.” MoRuhebeli asi “ame ngani ruganena.”
^ Tara koMauzera.
^ Ndi “mbara.”
^ Ndi “ogu ga huguvarere.”
