Samwere gwauvali 16:1-23
16 Apa ga humburukire Ndafita keguru lyondundu, age kwa gwanekerere naSiba mukareli gwaMefiboseti. Siba kwa kere kondundu a ndindire Ndafita. Age kwa kere noyindongi yivali apa va tulire nomuhwi 200 donomboroto, yikuki yomandjembere 100, yikuki 100 yenyango eli a li yimi pokwenye ntani kavaza kokanene kovhinyu.
2 Makura hompa ta pura Siba asi: “Morwasinke ono retere yininke eyi?” Siba ta limburura asi: “Ame kuna reta yindongi yipo ngava ronde po vantu vemepata lyahompa, ano mboroto ntani enyango eli a li yimi pokwenye lyovamatigona woge va lye. Ano vhinyu zovantu ava ngava roroka momburundu.”
3 Makura hompa ta pura asi: “Kupi ana kara munahekuroge?”* Siba ta limburura hompa asi: “Mweli moJerusarema, morwa age kuna tanta asi: ‘Neina Vaisraeli tava tengwidire nge uhompa wotate.’”
4 Hompa ta tantere Siba asi: “Yininke yaMefiboseti nayinye tani yi gava koge.” Siba ta limburura asi: “Ame tani linyongamene komeho zoge. Hompa gwange ngano a hafere nge.”
5 Apa ga ya sikire hompa Ndafita moBahulimu, mugara gemepata lyaSauru gedina Simeyi munaGera, ta wiza a ya mu swaure.
6 Age kwa zugumine mamanya Ndafita novakareli vendi navenye kukwatera mo vantu navenye ntani novakwayita ava va kere korulyo nokorumoho rwendi.
7 Simeyi kwa swawire Ndafita, ta tanta asi: “Pwaga mo! Pwaga mo ove mudipagi ntani mugara gokudira mulyo!
8 Jehova kuna kukutengeka, morwa wa dipaga vantu vemepata lyaSauru ogu wa pinganena po mouhompa. Jehova kuna kugava uhompa kwamunoge Abisaromo. Ove kuna kuligwanekera noudigu morwa ove mudipagi!”
9 Makura Abisayi munaSeruya ta tantere hompa asi: “Morwasinke ono kupulisira muntu gokufana ngwendi mbwa a ku swaure? Na kanderere, pulisira nge ni ze kwendi ni ka tete ko mutwe gwendi.”
10 Hompa ta tanta asi: “Morwasinke muna kulihamekera mo one vana vaSeruya? Mu sigeni a swaure nge, yeeyi Jehova yige ana mu tantere a swaure nge. Yipo nye, kwato ogu na mu pura asi morwasinke ana kuyiruganena?”
11 Makura Ndafita ta tantere Abisayi ntani novakareli vendi navenye asi: “Nsene asi munange gwanyamwange kuna kupapara nge a dipage nge, ngapi nye kuhamena mugara gomorudi rwaMbenyameni? Mu sigeni a swaure nge yeeyi Jehova yige ana mu pangere a yi rugane!
12 Nampo Jehova na mona udigu wange makura Jehova a tungike nge mevango lyokuswaura nge ngwendi moomu yina kuhorokera nge naina.”
13 Makura Ndafita novakwayita vendi tava twikire kugenda monzira, ano Simeyi kwa gendere konontere dondundu ezi za kere pepi naNdafita. Age kwa va swawire, ta va zuguma mamanya ntani kwa va foferere evhu.
14 Makura hompa novantu navenye tava ka sika oku va here kuza awo vana roroka, makura tava pwizumuka.
15 Posiruwo oso, Abisaromo ntani novagara navenye womoIsraeli tava ka sika koJerusarema kumwe naAhitofeli.
16 Husayi goMuarekite kaume* kaNdafita ta zi kwaAbisaromo, ta mu tantere asi: “Hompa a kare nomwenyo gomure! Hompa a kare nomwenyo gomure!”
17 Makura Abisaromo ta pura Husayi asi: “Ngesi yimo ono kulikida kaume zoge eharo lyanarunye ndi? Morwasinke wa dilire kuza kumwe nage?”
18 Husayi ta limburura Abisaromo asi: “Hawe, ame kuna kukwatesa ko ogu ga horowora Jehova novantu ava ntani novagara navenye womoIsraeli. Ame tani kara nove.
19 Ame tani tanta hena asi: Yilye ogu nani ruganena? Nani kapisi ni ruganene munaNdafita? Ame ngani kuruganena ngwendi moomu na ruganena oguho.”
20 Abisaromo ta tantere Ahitofeli asi: “Pe nge ko magano. Yisinke natu rugana?”
21 Ahitofeli ta tantere Abisaromo asi: “Ligwanekera panyama kumwe noyihora* yoguho eyi kava sigire yi pakere mbili embo.* Apa Vaisraeli ngava zuvha asi wa rugana yininke eyi ntani wa swaura oguho, ava ava kukwatesa ko ngava kukwatesa ko unene.”
22 Makura tava dikire Abisaromo tende peguru lyonzugo, ano Abisaromo ta ligwanekere panyama kumwe noyihora yoguhwe awo Vaisraeli navenye kuna kutara.
23 Posiruwo sina, magano aga nga gava Ahitofeli kwa ga tere ngwendi nonkango dokutunda kwaKarunga gousili. Ngesi yimo Ndafita naAbisaromo va fumadekere magano gaAhitofeli.
Nonkango dokonhi
^ Ndi “mutekurwahekuroge.”
^ Ndi “ogu ga huguvarere.”
^ Tara koMauzera.
^ Ndi “mbara.”
