Samwere gwauvali 17:1-29
17 Konyima, Ahitofeli ta tantere Abisaromo asi: “Pulisira nge ni horowore vakwayita 12 000 yipo tu sikure Ndafita masiku ganaina.
2 Ame nani ka mu zira apa na roroka ntani ana dili nonkondo. Ame nani ka mu tukukisa, ano vantu ava vana kara nage nava ka duka ntani hompa gelike tupu nani ka dipaga.
3 Konyima, ame ngani ka tengwida vantu navenye koge. Nsene nani ka dipaga muntu ogu ono kupapara, vantu navenye ngava tengura koge ntani ngava kara mombili.”
4 Abisaromo nomasimbi nagenye goVaisraeli kwa haferere egano olyo.
5 Nye Abisaromo ta tanta asi: “Ka zigideni Husayi goMuarekite yipo tu ya zuvhe eyi nage na ya tu tantera.”
6 Makura Husayi ta zi kwaAbisaromo, ano Abisaromo ta mu tantere asi: “Eyi yiyo ana tu tantere Ahitofeli. Tu yi ture pasirugana ndi? Nsene kapisi yimo, tu tantera eyi natu rugana.”
7 Husayi ta tantere Abisaromo asi: “Egano eli ana gava Ahitofeli sikando esi kapisi ewa!”
8 Husayi ta tanta hena asi: “Nove wa yi diva asi oguho novakwayita vawo nonkondo ntani vana handuka unene ngwendi erundu eli lina zumbanesa vana valyo mezana. Nye nampili ngoso, oguho vakwayita, awo kapi tava vhuru kukara mokatji kovantu masiku.
9 Awo ngesi kuna vanda mekombombo* limwe ndi komavango gamwe gapeke. Nsene va hova kutuhomokera, ava ngava yi zuvha ngava tanta asi: ‘Vantu ava vana kukwatesa ko Abisaromo vana va fundu!’
10 Nampili mugara gouradi ogu ga kara nomutjima ngwendi gwanyime, nga kara nowoma morwa Vaisraeli navenye va yi diva asi oguho mukwayita gononkondo ntani vakwayita ava vana kara nawo uradi.
11 Ame tani ku pe egano eli asi: Ninka Vaisraeli navenye va ponge kutundilira koDana dogoro koBere-seba mounzi wawo ngwendi muheke gwekefuta ntani wa hepa kuvapitisira va ka rwe.
12 Ose ngatu mu rwisa nkenye oku ngatu mu gwana ntani ngatu mu rwisa ngwendi moomu eme ali gwire pevhu ntani kwato ogu nga paruka, yi kare asi yige ndi vagara ava ana kara nawo.
13 Nsene nga dukira mositata, ose ngatu za noVaisraeli navenye mositata tu ka si zonagure po ntani tu ka kokere makuma gaso momuramba. Kwato nampili emanya limwe ngali hupa po.”
14 Makura Abisaromo novagara navenye womoIsraeli tava tanta asi: “Egano lyaHusayi goMuarekite ewa kupitakana egano lyaAhitofeli.” Jehova kwa ninkisire* vantu va dire kukwama egano lyaAhitofeli, yipo Jehova a retere udigu Abisaromo.
15 Konyima, Husayi ta tantere mupristeli Sadoko naAbiyatara asi: “Eyi yiyo Ahitofeli ana tantere Abisaromo nomasimbi goVaisraeli, ano eyi yiyo nina va tantere.
16 Yipo nye, tumeni vantu kwaNdafita va ka mu rondore ntani va ka mu tantere a dire kukara masiku ganaina momburundu pomavango gokurutira gomukuro gwaJorodana, nye ga hepa kuruta mukuro ndi ngano ngava ka mu dipaga kumwe novantu ava ana kara nawo.”
17 Jonatana naAhimasi kwa kere poEni-rogeli ponze zositata morwa awo kapi va here va va mone vantu, makura mukareli gomukadi ta zi ta ka va tantera, ano awo tava zi va ka tantere hompa Ndafita.
18 Nye mumati gumwe tava mono makura ta ka tantera Abisaromo. Jonatana naAhimasi tava duka usimbu, tava zi membo lyomugara gumwe moBahulimu. Age kwa kere netope meharango lyembo lyendi, makura tava hwilire metope.
19 Makura mukadi gwagoogo mugara ta kudumike ekehe ketope, ano keguru ta tura ko rukokotwa rokutwa. Kwato ogu ga yi divire.
20 Makura vakareli vaAbisaromo tava zi kembo lyomukadi ogo, tava mu pura asi: “Kupi ana kara Ahimasi naJonatana?” Mukadi ogo ta va limburura asi: “Vana pitakana, vana vyuka koyiha yomukuro.” Makura vagara owo tava va papara nye kapi va va gwene, tava tengura koJerusarema.
21 Konyima zapa va zire vagara owo, Jonatana naAhimasi tava tundu mo metope, tava zi va ka tantere hompa Ndafita asi: “Katuka usimbu o ze o ka rute mukuro,” makura tava mu tantere eyi ga here kumurugana Ahitofeli.
22 Poopo ngoso, Ndafita novantu navenye ava ga kere nawo tava katuka va rute mukuro gwaJorodana. Ano apa lya pumine ezuva, navenye tava ka sika mesinya mwina lyomukuro gwaJorodana.
23 Ahitofeli apa ga mwene asi kapi vana kwama magano gendi, ta rondo posindongi ta zi kembo lyendi kositata sawo. Konyima zokurekera vantu vemembo lyendi, ta ka limangerera makura ta fu, tava ka mu horeka kevango oku va horekere ozinakuru.
24 Posiruwo oso, Ndafita kwa zire koMahanayimu, ano Abisaromo kwa rutire mukuro gwaJorodana kumwe novagara woVaisraeli.
25 Abisaromo kwa tulire Amasa a kare mukurona govakwayita a pinganene po Jowabu. Amasa kwa kere munaItira goMuisraeli naAbigayili munaNahasi. Abigayili kwa kere mumbyaSeruya ozina vaJowabu.
26 Vaisraeli naAbisaromo kwa dikire notende dawo momukunda gwaGiliyata.
27 Apa ga ya sikire Ndafita moMahanayimu, Sobi munaNahasi ogu ga tungire momukunda goVaamoni moRaba naMakire munaAmiyeli gomoRodebara ntani naBarasirayi goMugiliyata ogu ga tungire moRogelimu
28 kwa retere nombete, marupasa, yikayiga yerova, rukokotwa, nombuto, usura, nombuto zokukanga, marudi gavali gomakunde, nondya dimwe dokukukuta,
29 usi, magadi, nonzwi ntani kasa.* Awo kwa retere yininke nayinye eyi kwaNdafita, yipo a ya lye kumwe novantu ava ga kere nawo, yeeyi awo kwa tente asi: “Vantu ava nzara ntani vana roroka, awo hena kuna kufa enota momburundu.”
Nonkango dokonhi
^ Ndi “mekero; momukuro.”
^ Ndi “kwa pangerere.”
^ MoRuingilisa asi cheese. MoRuhebeli asi “masini gongombe gokulikwata.”
