Samwere gwauvali 18:1-33
18 Makura Ndafita ta varura vagara ava ga kere nawo, ta ninki vamwe va pitisire vantu mayovi ntani vantu mafere.
2 Ndafita ta tumu vantu ava va kere monombunga ntatu va ze. Mbunga zimwe kwa zi pitisilire Jowabu, ano zimwe kwa zi pitisilire mumbyaJowabu, Abisayi munaSeruya. Ano zimwe kwa zi pitisilire Itayi ogu ga tungire moGata. Makura hompa ta tantere vagara owo asi: “Name tani zi kumwe none.”
3 Nye awo tava limburura asi: “Wa ha za kumwe nose, yeeyi ove mulyo kupitakana vakwayita 10 000. Nsene natu ka duka ndi va ka dipage harufa zovakwayita vetu, kapi nava ka yi pakera mbili. Yipo nye, nayi wapa nsene no tuma vantu vamwe womositata va ka tu vatere.”
4 Hompa ta va tantere asi: “Ame tani rugana eyi muna kumona asi yiwa.” Makura hompa ta sikama pepi nerungavero lyositata, ano vagara navenye tava tundu mositata monombunga mafere ntani mayovi.
5 Makura hompa ta gava mpangera kwaJowabu naAbisayi ntani naItayi asi: “Mwa hepa kukatekura nawa Abisaromo, yeeyi age munange.” Vagara navenye va yi zuvhire apa ga geve hompa mpangera kovapitisili kuhamena Abisaromo.
6 Vagara owo tava tundu mositata va ka ligwane noVaisraeli ava va kwatesere ko Abisaromo, makura tava ka rwa yita mowiza waEfurayimi.
7 Vakareli vaNdafita kwa fundire Vaisraeli ava va kwatesere ko Abisaromo kevega olyo. Vantu wovanzi wokusika ko 20 000 kwa va dipagere ezuva olyo.
8 Yita kwa lihanenene momukunda nagunye, vantu ava va fililire mowiza kwa kere vanzi kupitakana ava va dipagere norufuro mezuva olyo.
9 Abisaromo ta ligwanekere novakareli vaNdafita, ano apa ga va mwene ta duka. Age kwa rondere ponsino, ano nsino ta zi ka pita monomutayi dononene dositji sosinene, nohuki dendi ta di lihaka mositji oso sosinene, makura ta zenzerere. Ano nsino ezi ga rondere ta zi ka duka.
10 Makura muntu gumwe ogu ga yi mwene ta ka tantera Jowabu asi: “Ame nina mono Abisaromo kuna kuzenzerera kositji sosinene.”
11 Jowabu ta tantere mugara ogo asi: “Nsene ono mu mono, morwasinke ono dilire kumudipagera poopo? Ame ngano nina ku pe yisiliveli murongo noliva.”
12 Nye mugara ogo ta tantere Jowabu asi: “Nampili ngano kuna pe nge yisiliveli 1 000, ame kapi tani vhuru kudipaga munahompa, yeeyi ose twa zuvha apa hompa ga kupangerere nove naAbisayi ntani naItayi asi: ‘Yi kare asi nyove yilye, wa hepa kukapopera Abisaromo.’
13 Ngano kapi nina limburukwa ni mu dipage, hompa ngano nga yi zuvha, ano ove kapi ngo popera nge.”
14 Makura Jowabu ta tanta asi: “Kapi nina hara kukuhepekera siruwo sange!” Jowabu ta gusa yikutji* yitatu makura ta yi tu Abisaromo monturo* age simpe muzuni ntani kuna kuzenzerera kositji sosinene.
15 Makura vakareli murongo ava ngava simbi yirwiso yaJowabu, tava wiza tava dipaga Abisaromo.
16 Jowabu ta fudu ruvinga, makura vagara ava va tjidire Vaisraeli ava va kwatesere ko Abisaromo tava tengura; Jowabu yige ga tanterere vantu va tengure.
17 Awo tava gusa Abisaromo, tava mu zugumine mekero lyenene mowiza makura tava mu rundike mamanya gomanene. Ano Vaisraeli navenye ava va kwatesere ko Abisaromo tava tengura komambo gawo.
18 Apa ga kere Abisaromo nomwenyo, age kwa lidikilire ngundi moMuramba gwaHompa yeeyi age kwa tente asi: “Ame kapi na kara nomuna gomugara ogu nga pinga edina lyange.” Makura ta ruku ngundi ozo edina lyendi. Ano kutunda ezuva olyo, azo ngava zi tumbura asi Ngundi zaAbisaromo dogoro naina.
19 Ahimasi munaSadoko ta tanta asi: “Pulisira nge ni ze kwahompa ni ka mu tantere mbudi, yeeyi Jehova ana mu ruganene yoyiwa pokumuparura kononkore dendi.”
20 Nye Jowabu ta mu tantere asi: “Wa ha ka mu tantera mbudi ozo naina. Ngo zi mu tantere ezuva lyapeke, yeeyi munendi yige ana fu.”
21 Makura Jowabu ta tantere mugara goMukusi asi: “Zende o ka tantere hompa eyi ono mono.” Ano mugara goMukusi ta nyongamene Jowabu, ta ka duka.
22 Ahimasi munaSadoko ta tantere hena Jowabu asi: “Pulisira nge ni sikure mugara goMukusi, yi kare asi yisinke nayi ka horoka.” Nye Jowabu ta mu tantere asi: “Morwasinke no mu sikwira munange, mokumona asi kwato yimwe hena eyi no ka tantera hompa?”
23 Nye age simpe ta tanta asi: “Yi kare asi yisinke nayi ka horoka, pulisira nge ni mu sikure.” Makura Jowabu ta mu tantere asi: “Duka!” Ahimasi ta duka a pite nzira ezi za pita momukunda gwaJorodana* dogoro ta ka pitakana mugara goMukusi.
24 Ndafita kwa hingilire pokatji komarungavero gavali gositata, makura munomeni ta rondo keguru lyerungavero eli lya likwatakana nekuma. Apa ga kankukire, ta mono mugara ana kuduka gelike.
25 Makura munomeni ogo ta zigire ntani ta tantere hompa. Hompa ta tanta asi: “Nsene asi gelike ana kuwiza, age ana kara nombudi ezi ana hara kututantera.” Mugara ogo apa ga hederere pepi,
26 munomeni ta mono hena mugara gumwe ana kuduka. Munomeni ta zigire mugara ogu ga kere perungavero asi: “Tara! Mugara gumwe hena kuna kuduka gelike!” Hompa ta tanta asi: “Nage ngoso kuna kuturetera mbudi.”
27 Munomeni ta tanta asi: “Mugara ogu ana kara komeho kuduka ngwendi Ahimasi munaSadoko.” Makura hompa ta tanta asi: “Age muntu gomuwa ntani age kuna kuturetera mbudi zongwa.”
28 Ahimasi ta zigire, ta tantere hompa asi: “Nayinye yiwaawa!” Makura ta linyongamene komeho zahompa, ta tanta asi: “Karunga goge Jehova ngano va mu hamberere, age ana gava momawoko goge vagara ava ava kurwanesa ove hompa gwange!”
29 Nye hompa ta mu pura asi: “Munange Abisaromo muwaawa ndi?” Makura Ahimasi ta tanta asi: “Ame kuna mono vantu wovanzi vana kuzogerera apa ana tu tumu Jowabu, name nomukareli gwahompa, nye kapi nina diva eyi yina horoka.”
30 Makura hompa ta mu tantere asi: “Ka sikamene pena.” Makura age ta tundu po ta ka sikamena koure.
31 Makura mugara goMukusi ta ya siki, ta tanta asi: “Hompa gwange ngano a tambure mbudi ezi. Neina Jehova ana ku ruganene yininke yoyiwa pokukuparura kononkore doge nadinye edi ngadi kurwanesa.”
32 Nye hompa ta pura mugara goMukusi asi: “Munange Abisaromo muwaawa ndi?” Mugara goMukusi ta limburura asi: “Ngano nonkore nadinye dahompa gwange ntani nanavenye ava ava kurwanesa morwa vana hara kukudipaga, ngava fane ngwendi Abisaromo!”
33 Eyi kwa guvisire unene hompa, makura hompa ta zi konzugo zekeguru lyerungavero, ta gendi oku ta lili, ta tanta asi: “Nane Abisaromo munage, nane munange! Nane Abisaromo munange! Ngano nyame nina fu hansa. Nane Abisaromo munange, nane munange!”
Nonkango dokonhi
^ Ndi nampo asi “magonga.” MoRuhebeli asi “yitji.”
^ MoRuhebeli asi “komutjima.”
^ MoRuhebeli asi “momukunda.”
