Samwere gwauvali 19:1-43
19 Jowabu tava mu tantere asi: “Hompa kuna kulira Abisaromo.”
2 Vantu navenye ava va hefe morwa kwa fundire tava guwu, morwa kwa zuvhire asi hompa kuna kulira munendi.
3 Makura tava tengura mositata ezuva olyo awo vana mwena. Awo kwa fene ngwendi vantu ava vana kulifa nomuga morwa kuna ka duka koyita.
4 Hompa ta likudumike kosipara sendi, ta lili unene oku ta zigire asi: “Nane munange Abisaromo! Nane Abisaromo munange, nane munange!”
5 Makura Jowabu ta zi kembo lyahompa, ta ka tanta asi: “Neina ove kuna swaukisa vakareli woge navenye ava vana kuparura kumwe novana woge wovagara nava wovakadi novakadi woge ntani noyihora yoge.*
6 Ove kwa nyenga ava va kuhara ntani kwa hara ava va kunyenga, yeeyi neina ove ono yi likida asi vapitisili woge novakareli woge kwato mulyo koge. Ngano Abisaromo kapi ana fu naina, tu fe ose wokuhupa ko, ngano ove o muwaawa.
7 Yipo nye, katuka o ze o ka korangede vakareli woge, yeeyi ame tani gana kwaJehova asi nsene kapi no yi rugana, kwato ogu na kara nove masiku ganaina. Ou ngano tau kara udigu wounene kupitakana maudigu nagenye aga wa ligwanekera nago kutunda unona woge dogoro ngesi.”
8 Makura hompa ta katuka, ta ka hingira perungavero lyositata. Vantu navenye tava va tantere asi: “Hompa ana hingire perungavero lyositata.” Makura vantu navenye tava zi komeho zahompa.
Nye Vaisraeli wokuhupa ko* kwa dukire va ze komambo gawo.
9 Vantu womomarudi nagenye goVaisraeli kwa lipatanene asi: “Hompa kwa tu popera kononkore detu ntani koVafilisiti, nye age kwa tjwayuka mo mosirongo morwa Abisaromo.
10 Ano Abisaromo ogu twa horowere a tu pangere ga ka fira moyita. Yisinke nye muna kudilira kukasimba hompa gwetu?”
11 Hompa Ndafita ta tumu vantu va ka tantere mupristeli Sadoko naAbiyatara asi: “Tantereni masimbi gorudi rwaJuda asi: ‘Ame na zuvha asi Vaisraeli navenye vana hara ni tengure. Morwasinke muna kulirangera kuyasimba nge ni tengure kembo lyange?
12 One ekoro lyange. Morwasinke muna kulirangera kuyasimba nge?’
13 Ka tantereni hena Amasa asi: ‘Ove ekoro lyange. Karunga ngano a tengeke nge nsene kapi no kara mukurona govakwayita o pinganene po Jowabu.’”
14 Yipo nye, age kwa ninkisire vantu navenye womorudi rwaJuda va mu kwatese ko. Makura awo tava tumu mbudi kwahompa asi: “Tengura kumwe novakareli woge navenye.”
15 Hompa ta katuka a ze, ta ka sika komukuro gwaJorodana. Ano vantu womorudi rwaJuda tava zi koGiligali va ka gwane hompa ntani va ka rute kumwe nage mukuro gwaJorodana.
16 Makura Simeyi munaGera gomorudi rwaMbenyameni, ogu ga tungire moBahulimu ta zi kumwe novantu womorudi rwaJuda va ka gwane hompa Ndafita.
17 Age kwa zire novakwayita 1 000 womorudi rwaMbenyameni. Siba mukareli gemembo lyaSauru nage kwa zire kumwe novana vendi wovagara 15 ntani novakareli vendi 20 koJorodana. Awo kwa lihovere kuza komeho a ka sike hompa.
18 Age* kwa rutisire epata lyahompa ntani kwa rugene nkenye eyi ga here hompa, nye apa ga here kuruta Ndafita mukuro gwaJorodana, Simeyi munaGera ta ligandere komeho zendi.
19 Simeyi ta tantere hompa asi: “Hompa gwange, gusira nge po kweyi na rugene ntani wa ha diworoka udona ou na rugene ame mukareli goge ezuva eli wa tundire moJerusarema. Wa ha yi pakera mbili,
20 yeeyi ame mukareli goge na yi diva asi na zona. Naina nyame gokuhova kutunda mepata lyaJosefa ni wize koge hompa gwange.”
21 Abisayi munaSeruya ta tanta asi: “Simeyi va hepa kumudipaga morwa yininke eyi, yeeyi age kwa swaura muntu ogu ga gwaveka Jehova.”
22 Nye Ndafita ta tanta asi: “Morwasinke muna kulihamekera mo one vana vaSeruya nokurwanesa nge naina? Morwasinke nava dipagera muntu naina moIsraeli? Ngoso ame kapi nina yi diva asi nina kara hena hompa goVaisraeli naina ndi?”
23 Makura hompa ta tumbwidire Simeyi asi: “Kwato ogu na kudipaga.”
24 Mefiboseti mutekurwaSauru nage kwa zire a ka gwane hompa. Age kapi ga kuhwire nompadi dendi ndi a tete nonzwedu dendi ndi a kuhwe yikoverero yendi kutunda apa ga tjwayukire hompa dogoro apa ga ka tengwire nombili.
25 Apa ga ya sikire* moJerusarema a ya gwane hompa, hompa ta mu pura asi: “Mefiboseti, morwasinke wa dililire kuza name?”
26 Age ta limburura asi: “Hompa gwange, ove wa yi diva asi ame sirema. Ame kwa tanterere mukareli gwange asi: ‘Wapaikira nge sindongi yipo ni ronde po ni ze kumwe nahompa.’ Nye age kwa kumbagerere nge.
27 Age kwa ka ku tanterere yimpempa kuhamena nge ame mukareli goge. Nye hompa gwange kwa fana ngwendi muengeli gwaKarunga gousili, yipo nye, rugana nkenye eyi ono kumona asi yiwa.
28 Ove ngano wa dipagere epata nalinye lyomama, nye ove kwa ninka nge ni lye kumwe novantu ava ava hingire kositafura soge. Yipo nye, kwato hena yuma eyi nani vhura kupura koge.”
29 Nye hompa ta mu tantere asi: “Wa ha uyunga hena kuhamena yininke eyi. Ame nina tokora asi nove naSiba mu ligawinine epya.”
30 Makura Mefiboseti ta tantere hompa asi: “Siba a guse tupu epya nalinye mokumona asi hompa gwange ana ka tengura kembo lyendi mombili.”
31 Makura Barasirayi goMugiliyata ta tundu koRogelimu a ka sindikire hompa a ze komukuro gwaJorodana.
32 Barasirayi kwa kurupire unene, nomvhura dendi kwa kere 80. Age kwa pere hompa nondya apa ga kere moMahanayimu, yeeyi Barasirayi kwa kere ngawo zonene.
33 Makura hompa ta tantere Barasirayi asi: “Ruta kumwe name. Ame ngani ka ku pa nondya moJerusarema.”
34 Nye Barasirayi ta tantere hompa asi: “Ame kapi tani vhuru kuza nahompa koJerusarema, yeeyi mazuva* aga gana hupu ko ni fe masesu.
35 Ame ngesi nomvhura dange 80. Ame kapi ani vhuru kudiva yoyiwa neyi yoyidona ntani kapi ani vhuru kuzuvha utovara wonondya ndi woyikunwa ndi ni zuvhe mazwi govagara novakadi ava vana kudimba. Yipo nye, ame kapi nina hara kukara mudigo kwahompa gwange.
36 Ame yina gwanene nge po kweyi nina reta hompa komukuro gwaJorodana, kapisi hepero hompa a pe nge mfuto.
37 Pulisira nge ame mukareli goge ni tengure kembo lyange ni ka fire mositata setu pepi noku va horeka oyina notate nye mukareli goge Kimuhamu gogu, mu ninka a rute kumwe nove hompa gwange ntani kuvhura o ka mu ruganene eyi ono kumona asi yiwa.”
38 Makura hompa ta tanta asi: “Nani ruta kumwe naKimuhamu ntani nani ka mu ruganena eyi ono kumona asi yiwa. Nkenye eyi no pura nge, nani yi ku ruganena.”
39 Makura vantu navenye tava tameke kuruta mukuro, ano komeho a rute hompa, ta ncumita Barasirayi ta mu tungike, makura Barasirayi ta tengura kembo.
40 Hompa ta rutu a ze koGiligali kumwe naKimuhamu, ano vantu navenye womorudi rwaJuda noVaisraeli vamwe tava rutu kumwe nahompa.
41 Makura Vaisraeli wokuhupa ko tava hedere hompa, tava mu pura asi: “Morwasinke va kuhenesera vagara womorudi rwaJuda va ku tware nepata lyoge mesinya mwina lyomukuro gwaJorodana kumwe novantu woge navenye?”
42 Makura vagara womorudi rwaJuda tava limburura Vaisraeli owo asi: “Ose kwa yi rugana eyi morwa hompa ekoro lyetu. Morwasinke yina mu handukisire? Ose kapi twa lya nondya dahompa ndi a tu pe uhwi.”
43 Nye Vaisraeli owo tava tantere vagara womorudi rwaJuda asi: “Ose marudi murongo, yipo nye, ose kwa kara nononkondo kwaNdafita kupitakana one. Morwasinke mwa tu tekwilire momudona? Nani kapisi nyose twa hovere kukatengwida hompa gwetu?” Nye eyi va uyungire vagara womorudi rwaJuda kwa kere nononkondo kupitakana eyi va uyungire Vaisraeli owo.
Nonkango dokonhi
^ Tara koMauzera.
^ Kwa tamba kovantu ava va kwatesere ko Abisaromo.
^ Ndi nampo asi “Awo.”
^ Ndi nampo asi “Apa ga tundire.”
^ MoRuhebeli asi “mazuva gonomvhura.”
