Samwere gwauvali 2:1-32
2 Konyima, Ndafita ta pura Jehova asi: “Ni ze mositata simwe sorudi rwaJuda ndi?” Jehova ta mu limburura asi: “Zende.” Ndafita ta pura hena asi: “Sitata sokupi nani za?” Age ta mu limburura asi: “Zende kositata saHeburoni.”
2 Makura Ndafita ta zi kumwe novakadi vendi vavali; Ahinoamu gomoJesireli ntani Abigayili mukadanakufa Nabali gomoKarumeli.
3 Ndafita kwa zire hena kumwe novakwayita ava ga kere nawo ntani nomapata gawo, makura tava tungu moyitata eyi ya kundurukida sitata saHeburoni.
4 Makura vagara womorudi rwaJuda tava wiza, tava ya gwaveke Ndafita a kare hompa govantu womorudi rwaJuda.
Awo kwa tanterere Ndafita asi: “Vagara womoJabesi-giliyata yiwo va horeka Sauru.”
5 Makura Ndafita ta tumu vantu kovagara womoJabesi-giliyata va ka va tantere asi: “Jehova ngano a mu tungike, morwa one kwa likida hompa gweni Sauru eharo lyanarunye pokumuhoreka.
6 Jehova ngano a mu likide eharo lyanarunye nkenye apa. Name ngani mu likida nkenda, morwa yininke eyi muna rugana.
7 Koreni ntani kareni nouradi, yeeyi hompa gweni Sauru ga dogoroka. Ano vantu womorudi rwaJuda vana gwaveke nge ni kare hompa gwawo.”
8 Nye Abineli munaNere mukurona govakwayita vaSauru, ta simbi Isiboseti munaSauru va ze koMahanayimu.
9 Ta mu ninki a pangere nomukunda edi: gwaGiliyata, goVaasurite, gwaJesireli, gwaEfurayimi, gwaMbenyameni ntani noVaisraeli navenye.
10 Isiboseti munaSauru kwa kere nonomvhura 40 apa ga tamekere kupangera Vaisraeli ntani age kwa pangerere nomvhura mbali. Nye vantu womorudi rwaJuda kwa kwatesere ko Ndafita.
11 Ndafita kwa pangerere vantu womorudi rwaJuda nomvhura ntambali nomakwedi ntazimwe moHeburoni.
12 Konyima, Abineli munaNere novakareli vaIsiboseti munaSauru, tava tundu moMahanayimu va ze koNgibiyoni.
13 Jowabu munaSeruya novakareli vaNdafita nawo tava zi, tava ka ligwana nawo ketope lyaNgibiyoni. Mbunga zimwe kwa hingilire mesinya eli lyetope, ano mbunga nkwawo kwa hingilire mesinya mwina lyetope.
14 Konyima, Abineli ta tantere Jowabu asi: “Ninka vakwayita woge novakwayita vetu va rwane.”* Makura Jowabu ta tanta asi: “Va ninka va katuke.”
15 Mombunga zaIsiboseti tava horowora mo vakwayita 12 womorudi rwaMbenyameni ntani kovakareli vaNdafita nako ta kutundu 12 va ka rwe.
16 Makura tava rwana, ano nkenye ogu ta gusa rufuro rwendi ta tu mukwawo monompatji, navenye tava fu. Ano kutunda opo, evango olyo lyomoNgibiyoni yipo va li rukire asi Helikata-hasurimu.
17 Awo kwa rwire unene ezuva olyo, ano vakareli vaNdafita kwa fundire Abineli novakwayita woVaisraeli.
18 Vana wovagara vaSeruya vatatu nawo yipo va kere. Awo kuna kara Jowabu, Abisayi ntani Asaheli. Asaheli nga duka unene ngwendi moomu azi duka mpara mowiza.
19 Asaheli kwa tjidire Abineli ntani kapi ga hagekere kumutjida.
20 Apa ga setukire Abineli konyima, ta mu pura asi: “Nyove Asaheli ndi?” Age ta mu limburura asi: “Nhi nyame.”
21 Makura Abineli ta mu tantere asi: “Hageka kutjida nge makura o kwate po mukwayita gumwe, o guse yininke eyi ana kara nayo.” Nye Asaheli kapi ga hagekere kumutjida.
22 Makura Abineli ta tantere hena Asaheli asi: “Hageka kutjida nge ndi ngano tani kudipaga, makura ngani dire kuvhura kutara mukuroge Jowabu.”
23 Nye age kapi ga hagekere kumutjida, makura Abineli ta mu tu egonga mezimo, ta li ka bubukira komugongo makura Asaheli ta fu. Nkenye ogu ga wizire pevango eli ga fililire Asaheli, kwa sikeme a mu tare.
24 Makura Jowabu naAbisayi tava tjida Abineli. Apa lya tokere ezuva, tava ka sika kondundu zaAma ezi za livyuka naGiya monzira zokuza komburundu zaNgibiyoni.
25 Womorudi rwaMbenyameni tava pongo kumwe naAbineli makura navenye tava sikama keguru lyondundu zapeke.
26 Abineli ta zigire Jowabu asi: “Siruwoke nomu hageka kulirwisa norufuro? Kapi muna yi diva asi ayo nga yi reta udigu ndi? Siruwo sokuhura kupi ngo gusa yipo o tantere vantu va hageke kutjida Vaisraeli vakwawo?”
27 Makura Jowabu ta tanta asi: “Ame tani gana kwaKarunga gousili asi ngano kapi ono uyunga, vantu ngano kapi nava hageka kutjida Vaisraeli vakwawo dogoro kongurangura.”
28 Jowabu ta fudu ruvinga, makura vantu vendi tava hageke kutjida Vaisraeli vakwawo, tava hageke kulirwanesa.
29 Abineli novantu vendi tava gendi moAraba masiku nagenye, tava ka ruta mukuro gwaJorodana ntani tava piti momurambagona,* makura tava ka sika moMahanayimu.
30 Ano apa ga hagekere Jowabu kutjida Abineli, ta tengura makura ta ninki vantu vendi va ponge. Ta dimburura asi vakareli vaNdafita 19 pwato, kukwatera mo Asaheli.
31 Nye vakareli vaNdafita kwa fundire vagara womorudi rwaMbenyameni ntani novantu vaAbineli, makura vagara wokusika po 360 kwa fire.
32 Konyima tava gusa Asaheli, tava ka mu horeka montoko zoguhwe ezi za kara moBeterehema. Kutunda opo, Jowabu novantu vendi tava gendi masiku nagenye, ano apa lya pumine ezuva, tava ka sika moHeburoni.
