Samwere gwauvali 20:1-26
20 Pwa kere murwanesi gedina Seba, age kwa kere munaBikeli gomorudi rwaMbenyameni. Age kwa fudire ruvinga ntani ta tanta asi: “Ndafita kapisi ekoro lyetu ntani ogo munaIsayi kapi nga tu pa yuma. Zendeni mu ka karere yikarunga yeni,* one Vaisraeli!”
2 Makura Vaisraeli navenye tava hageke kukwama Ndafita, tava kwama Seba munaBikeli. Nye vagara womorudi rwaJuda kwa twikilire kukwama hompa gwawo, kutundilira komukuro gwaJorodana dogoro koJerusarema.
3 Apa ga ya sikire Ndafita mombara zendi moJerusarema, ta gusa yihora yendi* murongo eyi ga sigire yi pakere mbili embo lyendi, ta yi tura monzugo va yi takamese. Age ngava pe nondya nye kapi ga ligwanekerere hena nawo panyama. Awo kwa kere monzugo ozo va va takamese dogoro konomfa dawo. Awo kwa parukire ngwendi vafisavayavawo nampili ngomu mugara gwawo ga kere simpe muzuni.
4 Hompa makura ta tantere Amasa asi: “Tani ku pe mazuva gatatu o zigide vagara womorudi rwaJuda va wize kwange kumwe nove.”
5 Makura Amasa ta zi a ka zigide vagara womorudi rwaJuda, nye age kwa hulililire kuwiza ntani kapi ga sikisire mo siruwo esi va mu tanterere.
6 Makura Ndafita ta tantere Abisayi asi: “Seba munaBikeli kuvhura nga tu retere udigu kupitakana udigu ou ga tu reterere Abisaromo. Gusa vakareli vange mu mu sikure, yipo nga dire kudukira moyitata eyi va kundurukida makuma ngatu dire kumugwana.”
7 Makura vagara ava ga pitisilire Jowabu noVapereti noVakereti novakwayita navenye wononkondo tava sikura Seba; awo kwa tundire moJerusarema va sikure Seba munaBikeli.
8 Apa va kere pepi nemanya lyenene lyomoNgibiyoni, tava ligwanekere naAmasa. Jowabu kwa dwere yikoverero yendi yoyita ntani rufuro rwendi kwa kere mombunda mosiraro. Apa ga hederere komeho, rufuro rwendi ta ru gwire pevhu.
9 Jowabu ta pura Amasa asi: “Omu waawa tupu ndi?” Makura ta kwata kononzwedu daAmasa nokuwoko kwendi korulyo ngwendi gogu asi ta mu ncumita.
10 Amasa kapi ga pakerere mbili rufuro oru ga kwaterere Jowabu, makura Jowabu ta mu tu norufuro mezimo ano maura gendi taga tjapurukire pevhu. Age kwa mu twire rumwe tupu makura ta fu. Konyima, Jowabu namumbyendi Abisayi tava sikura Seba munaBikeli.
11 Mumati gumwe ogu ga kere naJowabu ta sikama pepi naAmasa, ta tanta asi: “Nkenye ogu ana kukwatesa ko Jowabu naNdafita, a kwame Jowabu!”
12 Posiruwo oso Amasa kwa ligarumwine mohonde zendi mokatji konzira. Mugara ogo apa ga mwene asi vantu kuna kusikama apa va sikire pwaAmasa, makura ta mu gusa mo monzira. Konyima ta mu kudumike, morwa ga mwene asi vantu navenye simpe kuna kusikama apa va mu mwene.
13 Konyima zapa ga mu gusire monzira, vagara navenye tava kwama Jowabu va sikure Seba munaBikeli.
14 Seba kwa pitire monomukunda nadinye domarudi goVaisraeli a ze koAbeli-bete-maka. Ano vemezimo lyaBikeli tava ya pongo kumwe nawo va mu sikure.
15 Jowabu novantu vendi tava kundurukida sitata saAbeli-bete-maka. Mokumona asi sitata oso kwa si kundurukidire nondambo devhu, Jowabu ta pongaike nondambo devhu kekuma lyositata yipo va si rwise. Vagara navenye ava va kere naJowabu kwa simine konhi zekuma yipo li gwe.
16 Mukadi gumwe gonondunge ogu ga kere mositata, ta zigire asi: “One vagara, purakeneni! Tantereni Jowabu a wize oku, ni ya uyunge nage.”
17 Makura Jowabu ta zi pepi nage, mukadi ogo ta mu pura asi: “Nyove Jowabu ndi?” Age ta limburura asi: “Nhi.” Ano mukadi ogo ta mu tantere asi: “Purakena eyi nani kutantera ame mukareli goge.” Jowabu ta tanta asi: “Uyunga tupu.”
18 Mukadi ta tanta hena asi: “Vantu nare ngava tanta asi: ‘Nsene vantu vana kara noudigu, va ze kositata saAbeli va ka gwane mavyukiso, ano kutunda opo udigu wawo tava u kohonona po.’
19 Ame kuna kuuyungira po vantu wombili ntani wovalimburukwi moIsraeli. Ove kuna hara kuzonagura po sitata esi sa fana ngwendi zinya moIsraeli. Morwasinke ono harere kuzonagura upingwa waJehova?”
20 Jowabu ta limburura asi: “Ame kapi nina gazara kuzonagura po sitata.
21 Oyo kapisi yiyo nina hara kurugana. Mugara gedina Seba munaBikeli, ogu ga tunda momukunda gonondundu gwaEfurayimi kwa rwanesa hompa Ndafita. Nsene nomu mu gava, ame nani siga sitata seni.” Makura mukadi ogo ta tantere Jowabu asi: “Natu kuzugumina mutwe gwendi!”
22 Mukadi ogo ta zi a ka tantere vantu navenye, makura tava tete ko mutwe gwaSeba munaBikeli tava gu zugumine Jowabu. Jowabu ta fudu ruvinga, ano vantu vendi tava tengura komambo gawo. Jowabu nage ta tengura a ze kwahompa koJerusarema.
23 Jowabu kwa pitisilire vakwayita navenye woVaisraeli; Benaya munaJehoyada kwa pitisilire Vakereti noVapereti.
24 Adoramu kwa pitisilire vantu ava ngava ruganene hompa; ano Jehosafata munaAhirudi nga tjanga ehistoli.
25 Sevha kwa kere hamutjanga; ano Sadoko naAbiyatara kwa kere vapristeli.
26 Ano Ira gomoruvharo rwaJaire nga ruganene Ndafita ngomupitisili.*
Nonkango dokonhi
^ Ndi nampo asi “Zendeni konotende deni.”
^ Tara koMauzera.
^ MoRuhebeli asi “ngomupristeli.”
