Samwere gwauvali 22:1-51
22 Ndafita kwa dimbilire Jehova rusumo oru mezuva eli ga mu poperere Jehova momawoko gononkore dendi ntani kwaSauru.
2 Age kwa dimbire asi:
“Jehova emanya eli ali popere nge ntani uvando wange, age yige a popere nge.
3 Karunga gwange kwa fana ngwendi emanya omu ani vanda,age silikandwiso sange, mupopeli gwange gononkondo* nouvando wange,ntani evango lyange oku ani dukire nomuzowoli gwange. Age kupopera nge kovantu wonyanya.
4 Jehova ogu ga fira kumuhamberera, nkenye apa ani mu pura a vatere nge,age kupopera nge kononkore dange.
5 Yininke eyi nayi vhura kuretera nge nomfa kwa kundurukidire nge ngwendi mankupi;ano vantu wovanzi wonyanya kwa tjilisire nge ngwendi mema goruhanzo.
6 Marugodi gemEyendo* kwa kundurukidire nge,nomfa kwa kundurukidire nge ngwendi yiraha eyi vana tege nge.
7 Ame kwa likwamberere kwaJehova apa na kere moudigu,ame kwa twikilire kulikwambera kwaKarunga gwange.
Age kwa zuvhire ezwi lyange montembeli zendi,ntani age kwa zuvhire nge apa na likwamberere kwendi a vatere nge.
8 Evhu kwa kankamene;ano eguru nalinye kwa linyungangere ntani kwa kankamene,morwa age kwa handukire.
9 Musi kwa tundire momazuru gendi,ano mundiro kwa tundire mokana kendi;ntani makara gomundiro kwa kere komeho zendi.
10 Apa ga hegumukire kwa monekere ngwendi maremo kuna kugwira pevhu,ano eremo lyenene lyesovagani kwa kere konhi zonompadi dendi.
11 Age kwa rondere pomukerubi yipo a tuke a wize.
Age kwa mu mwene ana rondo pomavava gomuengeli.
12 Age kwa ninkire mundema gu mu kundurukide ngwendi tende,age kwa kere mokatji komema gomasovagani ntani momaremo gomasovagani.
13 Uzera ou wa kere komeho zendi kwa ninkisire makara ga twere.
14 Makura Jehova ta ninki meguru mu tunde sindundumo;Karunga gekeguru-guru ta ninki ezwi lyendi va lizuvhe.
15 Age kwa ponyene yikutji yendi eyi ya ninkisire nonkore dendi di lihane;ntani nomaruvadi aga ga ninkisire nonkore dendi di piyagane.
16 Konhi zefuta kwa monekere;ntani matateko gevhu kwa ga tulire poruzera apa ga zigilire Jehova,ntani apa mpepo za tundire momazuru gendi.
17 Age kwa gonwene kuwoko kwendi kutundilira meguru;ta kwata nge a koke nge metondo lyenene.
18 Age kwa poperere nge konkore zange zonene,ntani kovantu ava va nyenga nge, ava va kere nononkondo kupitakana nge.
19 Awo kwa wizilire nge mezuva eli na ligwanekerere noudigu,nye Jehova kwa vaterere nge.
20 Age kwa twere nge kevango lyokudira siponga;age kwa poperere nge, morwa age kwa haferere nge.
21 Jehova kutungika nge morwa ame muhungami;age kufuta nge morwa kapi na kara nounzoni.
22 Ame na sikisa mo nompangera daJehova,ntani kapi na rugana yininke yoyidona pokusiga Karunga gwange.
23 Ame nkenye apa kugazara nompangera dendi;ntani ame kapi ngani siga noveta dendi.
24 Ame ngani twikira kulimburukwa komeho zendi,ntani ame kapi ngani zona.
25 Jehova ngano a fute nge morwa ame muhungami,ntani kapi na kara nounzoni komeho zendi.
26 Ove kapi o zumbu ava ava kulimburukwa;ano vantu wovahungami ove kuvatekura mouhunga;
27 Vantu wovawa, ove kuvaruganena uwa,nye vantu wovadona, ove kuvalikida asi omunandunge.*
28 Ove kupopera vantu ava va linunupika,nye kapi o pakere mbili vantu wokulinenepeka ntani ove kuvanunupika.
29 Jehova ove kwa fana ngwendi ramba zange;Jehova ove nyove o minikire nge momundema.
30 Nevatero lyoge, ame kuvhura kurwisa mbunga zovakwayita;nevatero lyononkondo daKarunga, ame kuvhura kuronda ekuma.
31 Nayinye eyi a rugana Karunga gousili kwa sikilira mo;eyi a uyunga Jehova kwa vyukilira.
Age kwa fana ngwendi silikandwiso kovantu navenye ava va huguvara mwendi.
32 Kwato Karunga ogu ga fana ngwendi Jehova,
ntani kwato emanya eli lya fana ngwendi Karunga gwetu.
33 Karunga gousili uvando wange,age nga ninkisa nonzira dange di sikilire mo.
34 Age kuninkisa nge ni vatuke ngwendi mpengu;age kuninkisa nge ni sikame ndjikiti ponondundu.
35 Age kudeura mawoko gange yipo ni ze koyita;mawoko gange kuvhura kugotora uta wonkanza wongoporo.
36 Ove ku pa nge silikandwiso soge yipo o popere nge,apa o linunupike ove kuninkisa nge ni nenepe.
37 Ove kunenepeka nzira yipo ni gende mo;yipo nye, ame kapi ngani vhura kupunduka.
38 Ame ngani tjida nonkore dange dogoro ngani di dipage;ame kapi ngani tengura dogoro ngani va dipage navenye.
39 Ame ngani va dipaga navenye ntani ngani va zonagura po, yipo ngava dire kurwanesa nge hena;awo ngava ligandera konompadi dange.
40 Ove ngo pa nge nonkondo yipo ngani ze koyita;ove ngo ninkisa nonkore dange di ligandere komeho zange.
41 Ove ngo ninkisa nonkore dange di duke nge;ntani ame ngani zonagura po* ava va nyenga nge.
42 Awo kuzigira va va vatere, nye kwato ogu ava popere;awo kulikwambera kwaJehova a va vatere, nye age kapi a va purakene.
43 Ame ngani va myona va fane ngwendi mbundu zevhu;ame ngani va funda ntani ngani va lyatanga ngwendi etata lyomonzira.
44 Ove ngo popera nge kovantu vange ava va hara kugwana nge usima.
Ove ngo popera nge yipo ngani pitisire nomuhoko;ano vantu ava na dira kudiva ngava ruganena nge.
45 Vanayirongo ngava linunupika komeho zange morwa ngava tjira nge;eyi ngava zuvha kuhamena nge, nga yi va ninkisa va limburukwe nge.
46 Vanayirongo ngava tukuka;awo ngava kankama momavango gawo aga va vanda.
47 Jehova Karunga goMunamwenyo! Emanya lyange va li hamberere!
Fumadekeni Karunga gwange ntani fumadekeni emanya lyange eli lya popera nge.
48 Karunga gousili yige a tengwida kuwoko nonkore dange;age kutura vantu va kare mepangero lyange;
49 Ove kupopera nge kononkore dange.
Ove kuzerura nge yipo va dire kugwana nge vantu ava ava homokere nge;Ove kupopera nge kovantu wonyanya.
50 Eyi yiyo ngani kupandwira mokatji konomuhoko Jehova,ame ngani tangauka edina lyoge.*
51 Ove kuvatera hompa ogu wa horowora yipo a funde;ove kulikida eharo lyanarunye komuntu ogu wa gwaveka,kwaNdafita ntani noruvharo* rwendi dogoro narunye.”
Nonkango dokonhi
^ MoRuhebeli asi “ruvinga rwange oru a ru popere nge.”
^ Ndi “Seyoli,” kwa tamba koukaro wovafe. Tara koMauzera.
^ Ndi nampo asi “kuvatekura ngwendi o mugova.”
^ MoRuhebeli asi “mwenekeda.”
^ Ndi “ngani kudimbira.”
^ MoRuhebeli asi “mbuto.”
