Samwere gwauvali 23:1-39
23 Edi kuna kara nonkango daNdafita dokuhulilira:
“Nonkango daNdafita munalsayi,ntani nonkango domugara ogu va zerura,age kwa mu gwaveka Karunga gwaJakopo,ntani kudimba nonsumo donongwa moIsraeli.
2 Ame kwa uyungire nevatero lyompepo zaJehova;nonkango daKarunga kwa kere mokana kange.
3 Karunga goVaisraeliogu ga fana ngwendi emanya lyaIsraeli kwa tanterere nge asi:
‘Nsene ogu a pangere vantu muhungami,ntani age kwa tjira Karunga,
4 age kwa fana ngwendi site esi a si tema apa a lipumu ezuva,apa aku dili maremo.
Age kwa fana ngwendi uzera ou au kara ko konyima zomvhura,ou au ninkisa wayi u mene pevhu.’
5 Epata lyange yimo lya fana ngoso komeho zaKarunga,
yeeyi age kwa tulisa po egwanekero* lyokukarerera kumwe name,ntani kwa fatwilira nge nayinye eyi ya hamena mo.
Megwanekero olyo kwa hamena mo eparu lyange noruhafo rwange,eyi yiyo Karunga a tungikire epata lyange.
6 Nye vagara navenye wovadona kuvazuguma ngwendi yinhwa yomega,yeeyi ayo kapi ava vhuru kuyikwata nomawoko.
7 Nsene muntu ta yi kwata,ga hepa kukara nosirwiso sosivera ntani negonga,ntani ayo va hepa kuyihwikira oku ya mena.”
8 Aga kuna kara madina govakwayita vaNdafita wononkondo: Joseba-basisebeti goMutakemoni, ogu ga pitisilire vakwayita vatatu wononkondo. Age kwa dipagere vantu 800 negonga sikando simwe.
9 Apa va pongere Vafilisiti va rwise Vaisraeli, vagara vatatu wononkondo ava va kere kumwe naNdafita kwa swawire Vafilisiti. Ano Eliyasara munaDodo zaAhohi kwa kere gumwe gwawo. Posikando oso, vagara woVaisraeli kwa dukire.
10 Nye Eliyasara kapi ga dukire, age kwa dipagere Vafilisiti dogoro kuwoko kwendi ta kuroroka, nye kapi ga sigire rufuro. Yipo nye, ezuva olyo Jehova kwa va vaterere va funde unene, ano vantu kwa kweme Eliyasara yipo va ka guse emona lyovantu ava va dipagere.
11 Sama munaAge gomoHarara nage kwa kere gumwe gwawo. Vafilisiti kwa pongere moRehi omu mwa kere epya lyomakunde, ano vantu kwa dukire Vafilisiti.
12 Nye age kwa sikeme pokatji kepya olyo a rwe, yipo va dire kuligusa. Age kwa dipagere Vafilisiti, makura Jehova ta mu vatere a funde.
13 Mombunga zomasimbi 30 kwa tundire mo masimbi gatatu ga ze kwaNdafita kekombombo lyomoAduramu posiruwo sokuzangura. Ano vakwayita woVafilisiti kwa dikire kamba zawo moMuramba goVarefa.
14 Ndafita kwa vende, ano kamba zoVafilisiti kwa kere moBeterehema.
15 Makura Ndafita ta tanta asi: “Ngwendi ni nwe mema gemetope lyopopepi nerungavero lyomoBeterehema!”
16 Makura vakwayita vatatu wononkondo tava ru va ze mokamba zoVafilisiti, tava ka vheta mema metope eli lya kara pepi nerungavero lyomoBeterehema, tava ga retere Ndafita. Nye age ta nyoka kuganwa makura taga tjisire komeho zaJehova.
17 Ndafita ta tanta asi: “Jehova nokuwapa si ni rugane yininke yokufana ngesi. Ame kapi tani vhuru kunwa mema aga vana ka simba vagara ava vana tura eparu lyawo mosiponga. Ayo kuna fana ngwendi kuna kunwa honde zawo.” Makura Ndafita ta nyoka kuganwa. Eyi yiyo va rugene vakwayita vendi vatatu wononkondo.
18 Abisayi mukurwaJowabu munaSeruya nage kwa kere mupitisili govakwayita vatatu vapeke wononkondo. Age kwa dipagere vantu 300 negonga ntani age kwa divikwire ngwendi moomu va divikwire vakwayita vatatu wokuhova wononkondo.
19 Nampili ngomu ga pitakanene vakwayita vakwawo vatatu wononkondo ntani kwa kere mupitisili gwawo, nye kapi ga divikwire ngwendi moomu va divikwire vakwayita vatatu wokuhova wononkondo.
20 Benaya munaJehoyada kwa kere mugara gouradi.* Age kwa rugene yirugana yoyinzi moKabuseli. Age kwa dipagere vana vavali vaAliyeli, ogu ga tungire moMowaba ntani kwa hwililire metope apa ya gwire yiterengenze ntani kwa dipagere nyime.
21 Benaya kwa dipagere hena mugara goMuegipite getundusika. Nampili ngomu mugara ogo goMuegipite ga kere negonga, age kwa mu zililire nomburo, ta mu gusa egonga lyendi makura ta mu dipagesa ko.
22 Eyi yiyo ga rugene Benaya munaJehoyada ntani age kwa divikwire ngwendi vakwayita vatatu wononkondo.
23 Nampili ngomu ga pitakanene vakwayita 30, age kapi ga divikwire ngwendi moomu va divikwire vakwayita vatatu wononkondo. Nye nampili ngoso, Ndafita kwa horowere Benaya a kare gumwe govantu ava ava mu takamesa.
24 Vakwayita 30 wononkondo kwa kere: Asaheli mumbyaJowabu, Elihanani munaDodo gomoBeterehema,
25 Sama gomoHarodo, Elika gomoHarodo,
26 Heresi goMupereti, Ira munaIkesi gomoTekoa,
27 Abiyesere gomoAnatoti, Mebunayi gomoHusa,
28 Salimoni gomoruvharo rwaAhohi, Maharayi gomoNetofa,
29 Herebu munaBana gomoNetofa, Itayi munaLibayi gomoGibeya sitata sorudi rwaMbenyameni,
30 Benaya gomoPiratoni, Hidayi gomonomuramba daGasi,
31 Abialiboni gomoBete-araba,* Asimavete gomoBahulimu,
32 Eliyahiba gomoSaliboni, vana vaJaseni wovagara, Jonatana,
33 Sama gomoHarara, Ahiyamu munaSarara gomoHarara,
34 Elifereti munaAhasibayi, oguhwe vaAhasibayi kwa tundilire moMakati. Eliyamu munaAhitofeli gomoGiro,
35 Hesiro gomoKarumeli, Parayi gomoArabiya,
36 Igali munaNatana gomoSoba, Bani gomorudi rwaGada,
37 Sereki goMuamoni naNaharayi gomoBeroti, mugara ogu nga simbi yirwiso yaJowabu munaSeruya,
38 Ira gemezimo lyaItili, Garebu gemezimo lyaItili
39 ntani Uliya goMuheti. Sivaro sawo nasinye kwa kere 37.
Nonkango dokonhi
^ Ndi “elizuvhasano.”
^ MoRuhebeli asi “kwa kere muna gomugara gouradi unene.”
^ Ndi “gomoAraba.”
