Samwere gwauvali 24:1-25
24 Jehova ta handukire hena Vaisraeli apa gumwe ga tanterere Ndafita* asi: “Zende o ka varure Vaisraeli novantu womorudi rwaJuda.”
2 Makura hompa ta tantere Jowabu mukurona govakwayita vendi ogu ga kere nage asi: “Zende o ka tjange vantu navenye womomarudi goVaisraeli kutundilira koDana dogoro koBere-seba yipo ni dive sivaro sovantu.”
3 Nye Jowabu ta tantere hompa asi: “Karunga goge Jehova ngano a vhukise vantu yikando 100 ntani ngano hompa gwange a yi mone, morwasinke nye ono harere kurugana yininke eyi?”
4 Nye hompa kapi ga purakenene kwaJowabu ntani kovapitisili wovakwayita. Makura Jowabu novapitisili wovakwayita tava tundu po pwahompa, tava zi va ka tjange Vaisraeli.
5 Awo kwa rutire mukuro gwaJorodana tava ka dika kamba zawo moAroere koMbindakano* zositata esi sa kere pokatji komuramba. Makura tava zi komukunda gorudi rwaGada ntani koJasere.
6 Kutunda opo tava zi koGiliyata ntani kosirongo saTahitimu-hodosi. Awo kwa twikilire norugendo rwawo dogoro koDana-jani ntani koMuzogo koSidoni.
7 Tava zi kositata saTirusi esi va kundurukida makuma ntani koyitata nayinye yoVahevhi noVakanani, makura tava ka sika moBere-seba sitata somoNegebu zomoJuda.
8 Awo kwa gendere mosirongo nasinye dogoro tava ka sika moJerusarema kehagero lyomakwedi ntane nomazuva 20.
9 Jowabu ta gava kwahompa sivaro sovantu ava va tjenge. Vakwayita woVaisraeli ava va kere nomarufuro, sivaro sawo kwa kere 800 000, ano vagara womorudi rwaJuda sivaro sawo kwa kere 500 000.
10 Nye Ndafita kwa liverere konyima zapa ga varwire vantu, makura Ndafita ta tantere Jehova asi: “Ame na tura nzo zonene pokurugana yininke eyi. Na kanderere Jehova, gusira nge po ame mukareli goge, yeeyi ame kwa rugana yininke yougova.”
11 Apa ga pindukire Ndafita ngurangura zonene, Jehova ta tantere muporofete Gada, ogu nga tantere Ndafita mamoneko asi:
12 “Zende o ka tantere Ndafita asi: ‘Jehova kuna kutanta asi: “Ame tani ku ninki o horowore pokatji koyininke yitatu. Horowora po sininke simwe esi nani ku retera.”’”
13 Makura Gada ta zi kwaNdafita, ta ka mu pura asi: “Ono hara mosirongo soge mu kare erumbu nomvhura ntambali ndi? Ndi ono hara o tjwayuke nonkore doge makwedi gatatu awo kuna kukutjida? Ndi ono hara mosirongo soge mu kare ehamba mazuva gatatu? Gazadara ko nawa eyi nani ka limburura ogu ana tumu nge.”
14 Makura Ndafita ta tantere Gada asi: “Ayo kuna kudigopera nge. Na kanderere ninka Jehova a tu tengeke nye kapisi vantu, yeeyi age ga kara nonkenda zonene.”
15 Makura Jehova ta tumu ehamba moIsraeli li hepeke vantu kutundilira ngurangura dogoro posiruwo esi ga tulire po. Ano vantu 70 000 tava fu, kutundilira koDana dogoro koBere-seba.
16 Apa ga gonwene muengeli kuwoko kwendi a zonagure Jerusarema, Jehova ta livere* morwa udigu ou ga retere. Makura ta tantere muengeli ogu ga retere ezonauko mokatji kovantu asi: “Hageka! Ganda kuwoko koge.” Muengeli gwaJehova kwa kere pepi norupare rwaArauna goMujebusi.
17 Apa ga mwene Ndafita muengeli ogu ga dipagere vantu, age ta tantere Jehova asi: “Ame nyame na zona ntani nyame na rugana epuko, nye vantu ava* yisinke va zona? Tengeka nge kumwe nepata lyotate.”
18 Makura Gada ta zi kwaNdafita ezuva olyo, ta ka mu tantera asi: “Zende o ka tungire Jehova sizambero porupare rwaArauna goMujebusi.”
19 Makura Ndafita ta zi ngwendi moomu ga mu pangerere Jehova kupitira mwaGada.
20 Apa ga nyongamene Arauna, ta mono hompa novakareli vendi kuna kuwiza kwendi. Arauna ta pwaga usimbu, ta linyongamene komeho zahompa.
21 Arauna ta pura asi: “Morwasinke hompa gwange ana wizire komukareli gwendi?” Ndafita ta mu limburura asi: “Ame kuna wiza ni ya rande rupare koge yipo ni tungire po Jehova sizambero, makura ehamba eli lina kuhepeka vantu ngali hage.”
22 Nye Arauna ta tantere Ndafita asi: “Gusa tupu rupare oro hompa gwange ntani ngo zambere po nkenye eyi ono kumona asi yiwa. Nongombe donzambo zeswakerero dedi nosireyi sokuhwagesa mbuto ntani nondjoko yipo o yi ruganese ngoyitare.
23 Hompa, nayinye eyi tani yi ku pe.” Makura Arauna ta tantere hena hompa asi: “Karunga goge Jehova ngano a ku hafere.”
24 Nye hompa ta tantere Arauna asi: “Hawe, nina hepa kururanda. Ame kapi tani vhuru kugava kwaKarunga gwange Jehova nzambo zeswakerero ezi nina dili kufutira.” Makura Ndafita ta randa rupare ntani nonongombe noyisiliveli* 50.
25 Ndafita ta tungire po Jehova sizambero, ta gavere po nonzambo deswakerero nononzambo dombili. Jehova ta rugana eyi va mu pulire kuhamena sirongo, ano ehamba kapi lya hepekere hena Vaisraeli.
Nonkango dokonhi
^ Ndi “apa va mu tanterere Ndafita.”
^ Ndi “korulyo.”
^ Ndi “ta guwu.”
^ MoRuhebeli asi “nonzwi edi.”
^ MoRuhebeli asi “noshekel.” Shekel zimwe kwa hura ponograma 11,4. Tara App. B14.
