Samwere gwauvali 3:1-39
3 Vantu ava va kwatesere ko epata lyaSauru ntani nava va kwatesere ko Ndafita kwa twikilire kulirwanesa. Ndafita kwa twikilire kunkondopara, ano ava va kwatesere ko epata lyaSauru nonkondo dawo kwa sesupire.
2 Posiruwo oso, Ndafita ta reta vana wovagara moHeburoni. Mbeli zendi kwa kere Amunoni munaAhinoamu gomoJesireli.
3 Munendi gwauvali kwa kere Kireyabu, ogu ga reterere pwaAbigayili mukadanakufa Nabali gomoKarumeli. Ano gwautatu kwa kere Abisaromo, ogu ga reterere pwaMaka munaTalimayi hompa gwaGesure.
4 Munendi gwaune kwa kere Adoniya, ogu ga reterere pwaHagiti. Ano munendi gwautano kwa kere Sefatiya, ogu ga reterere pwaAbitali.
5 Munendi gwauntazimwe kwa kere Itureamu, ogu ga reterere pwaEgira. Vana vaNdafita ava kwa va reterere moHeburoni.
6 Posiruwo esi va lirwanesere vantu ava ngava kwatesa ko epata lyaSauru ntani novantu ava ngava kwatesa ko Ndafita, Abineli kwa ninkisire vantu wovanzi vemepata lyaSauru va hamene kwendi.
7 Sauru kwa kere nosihora sendi* gedina Lisipa munaAiya. Konyima, Isiboseti ta pura Abineli asi: “Morwasinke wa ligwanekerera panyama nomukadi ogu va kwere otate?”
8 Eyi ga pulire Isiboseti kwa handukisire unene Abineli, makura Abineli ta tanta asi: “Ngoso ame mbwa* zomoJuda ndi? Ame kwa likida eharo lyanarunye kepata lyoguho Sauru nekoro lyawo novakaume vawo ntani ame kapi na kugava momawoko gaNdafita dogoro neina; nye neina ove kuna kurundira nge asi na ligwanekera panyama nomukadi.
9 Karunga ngano a tengeke nge nsene ni dira kuruganena Ndafita eyi ga mu tumbwidira Jehova:
10 asi nga gusa uhompa waSauru au gave kwaNdafita yipo a pangere moIsraeli nomoJuda, kutundilira koDana dogoro koBere-seba.”
11 Isiboseti kapi ga limbwilire Abineli, yeeyi age kwa mu tjilire.
12 Makura Abineli ta tumu vantu kwaNdafita va ka mu tantere asi: “Sirongo nani salye? Tulisa po egwanekero* kumwe name, yipo ngani ninke Vaisraeli navenye va hame koge.”
13 Ndafita ta ka limburura asi: “Nawa tupu. Ame ngani tulisa po egwanekero kumwe nove, nye ntudi ngo piture Mikali munaSauru apa ngo wiza kwange.”
14 Makura Ndafita ta tumu vantu kwaIsiboseti munaSauru va ka mu tantere asi: “Pe nge mukadange Mikali ogu na futilire yipapa yokougara yoVafilisiti 100.”
15 Makura Isiboseti ta tumu vantu va ka simbe Mikali kwamugara gwendi Palitiyeli munaRaisi.
16 Nye mugara gwendi kwa gendere nage oku ta lili. Age kwa mu kweme dogoro koBahulimu. Abineli ta mu tantere asi: “Tengura!” Makura age ta tengura.
17 Posiruwo oso, Abineli ga tuma vantu va ka tantere masimbi goVaisraeli asi: “One kwa here Ndafita a kare hompa gweni.
18 Yipo nye, ruganeni ko yuma, yeeyi Jehova kwa tanterere Ndafita asi: ‘Ame ngani popera Vaisraeli momawoko goVafilisiti ntani momawoko gononkore dawo nadinye kupitira momukareli gwange Ndafita.’”
19 Konyima, Abineli kwa uyungire novantu womorudi rwaMbenyameni. Age kwa zire hena kwaNdafita koHeburoni a ka uyunge nage kompengi, a ka mu tantere eyi va lizuvhire Vaisraeli novantu womorudi rwaMbenyameni.
20 Abineli kwa zire kwaNdafita kumwe novagara 20 koHeburoni, ano Ndafita kwa ruganene Abineli kumwe novagara owo sipito.
21 Makura Abineli ta tantere Ndafita asi: “Tani zi ni ka tantere Vaisraeli navenye va ya ponge komeho zahompa gwange yipo va ya tulise po egwanekero kumwe nove, ano ove ngo pangera nkenye oku ono hara.” Ndafita ta rekere Abineli, makura Abineli ta ka za nombili.
22 Konyima, vakareli vaNdafita tava tundu koyita. Awo kwa ka simbire yininke yoyinzi eyi va ka kwete. Abineli posiruwo oso, kwa sigire Ndafita moHeburoni, morwa Ndafita kwa mu rekerere a ze mombili.
23 Apa ga ya sikire Jowabu novakwayita navenye ava ga kere nawo, Jowabu tava mu tantere asi: “Abineli munaNere kuna wiza kwahompa, ano age yiyo ana mu rekere a ze mombili.”
24 Makura Jowabu ta zi kwahompa, ta ka mu pura asi: “Morwasinke ono yi ruganene? Abineli kuna wiza koge nye ove yiyo ono mu sigilire a ze.
25 Nove wa mu diva Abineli munaNere! Age kuna wiza a ya kukumbagere ntani kuna hara kudiva nayinye eyi o rugana noku o zi.”
26 Makura Jowabu ta tundu po pwaNdafita, ta tumu vantu va sikure Abineli. Awo kwa ka mu gwene petope lyaSira makura tava ka mu tengwida, nye Ndafita kwato eyi ga divire ko.
27 Apa ga ya sikire Abineli moHeburoni, Jowabu ta mu twara perungavero a ka uyunge nage kompengi, nye apa va ka sikire ta mu tu mezimo makura ta fu. Age kwa yi rugene eyi, morwa yeeyi ga dipagere* mumbyendi Asaheli.
28 Konyima apa ga yi zuvhire Ndafita, ta tanta asi: “Name novantu vange kapi tuna kara nounzoni kwaJehova kweyi va dipaga Abineli munaNere.
29 Ngano mepata lyaJowabu ngamu kare nkenye apa mugara gouvera wokoyilyo yonomuga ndi goyingondwe ndi sirema* ndi ogu ngava dipaga norufuro ndi gonzara.”
30 Jowabu namukurwendi Abisayi kwa dipagere Abineli, morwa age kwa dipagere mumbyawo Asaheli moyita moNgibiyoni.
31 Makura Ndafita ta tantere Jowabu novantu ava ga kere nawo asi: “Taureni yikoverero yeni mu limange nonsako, yipo mu lire Abineli.” Hompa Ndafita nage kwa gendere monyima zosikesa.
32 Abineli kwa mu horekere moHeburoni, ano Ndafita kwa lilire unene pontoko zaAbineli. Makura vantu navenye tava lili.
33 Hompa kwa dimbilire Abineli rusumo roruguwo. Age kwa tente asi:
“Abineli kuna kudipaga ngwendi muntu gokudira mulyo.
34 Mawoko goge kapi vana ga manga,ntani nompadi doge kapi vana di manga nomauketanga.*
Ove kuna fu ngwendi muntu ogu vana dipaga vakorokotji.”
Apa va yi zuvhire vantu navenye, makura tava lili hena.
35 Konyima mezuva lyoolyo, vantu navenye tava zi kwaNdafita va mu twarere mboroto yipo va ka mu hengagwide, nye Ndafita ta gana asi: “Karunga ngano a tengeke nge nsene ni makera mboroto ndi nkenye eyi komeho li ka toke ezuva.”
36 Apa va mwene vantu eyi ya horokere, tava hafa. Vantu ngava hafere nayinye eyi nga rugana Ndafita.
37 Yipo nye, vantu navenye ntani noVaisraeli navenye kwa yi divire ezuva olyo asi hompa kapisi yige ga dipagesere Abineli munaNere.
38 Makura Ndafita ta tantere vakareli vendi asi: “Ngoso kapi muna yi diva asi neina mupitisili ntani mugara gomulyo ana fu moIsraeli ndi?
39 Nampili ngomu va gwaveka nge ni kare hompa, neina ame kapi nina kara nononkondo, ano vana vaSeruya wovagara nyanya unene. Jehova ngano a futise vantu wovadona kuliza noyirugana yawo yoyidona.”
Nonkango dokonhi
^ Tara koMauzera.
^ MoRuhebeli asi “mutwe gombwa.”
^ Ndi “elizuvhasano.”
^ MoRuhebeli asi “morwa honde zamumbyendi.”
^ Nampo kwa tamba mugara ogu nga rugana tupu yirugana yovakadi. Age kapi nga vhuru kuza koyita ndi a rugane yirugana yimwe eyi ngava rugana vagara.
^ MoRuhebeli asi “nongoporo.”
