Samwere gwauvali 4:1-12
4 Apa ga zuvhire Isiboseti munaSauru asi Abineli vana mu dipaga moHeburoni, makura ta kara nowoma,* ano Vaisraeli navenye tava tukuka.
2 Pwa kere vagara vavali ava ngava pitisire nombunga mbali dovakwayita damunaSauru. Madina gawo kwa kere Bana naRekabu. Awo kwa kere vana vaLimoni gomorudi rwaMbenyameni ogu ga tungire moBeroti. (Yeeyi Beroti kwa kere nare mukunda gorudi rwaMbenyameni.
3 Vantu womoBeroti kwa tjwayukilire moGitayimu ntani awo kwa tunga moGitayimu ngovanayirongo dogoro naina.)
4 Jonatana munaSauru kwa kere namunendi ogu ga kere nourema komaguru. Age kwa kere nonomvhura ntano apa vantu va gwene mbudi ezi za tundire ko Jesireli asi Sauru naJonatana vana fu. Makura mukadi ogu nga mu takamesa ta mu damuna, ta duka nye ngomu ga dukire, ta mu ganda, makura ta remana. Munona ogo edina lyendi kwa kere Mefiboseti.
5 Rekabu naBana vana vaLimoni gomoBeroti, kwa zire kembo lyaIsiboseti. Posiruwo oso, ako kwa kere ko upyu wounene ntani Isiboseti kwa rere a pwizumuke.
6 Awo kwa hwililire monzugo ntani kwa lininkisire ngwendi kuna ka simba rukokotwa; tava mu tu mezimo, makura Rekabu naBana tava duka.
7 Apa va hwililire monzugo, awo kwa mu gwene ana rara pombete monzugo zendi, makura tava mu dipaga ntani tava tete ko mutwe gwendi. Tava gusa mutwe gwendi, makura tava gendi masiku nagenye monzira zokuza koAraba.
8 Tava twara mutwe gwaIsiboseti kwaNdafita moHeburoni, tava mu tantere asi: “Mutwe gwaIsiboseti munaSauru nkore zoge ogu ga here kukudipaga, googu. Neina Jehova ana tengwida kuwoko Sauru noruvharo rwendi.”
9 Nye Ndafita ta limburura Rekabu naBana vana vaLimoni gomoBeroti asi: “Tani gana kwaJehova Karunga goMunamwenyo ogu ga popera nge momaudigu nagenye,
10 apa gumwe ga tanterere nge asi Sauru ana fu, age kwa gazarere asi kuna kuretera nge mbudi zongwa nye ame yipo na mu dipagere moSikiragi. Ngesi yimo na futire muntu ogu ga reterere nge mbudi ozo!
11 Ngapi nye kuhamena vagara wovadona ava vana dipaga mugara gomuhungami membo lyendi pombete zendi? Ni dire nye kumutengwida kuwoko pokumudipaga ndi?”
12 Makura Ndafita ta tantere vakwayita vendi va va dipage. Awo tava tete ko mawoko gawo nonompadi dawo, makura tava kulike yimpu yawo pepi nediva lyomoHeburoni. Nye tava horeke mutwe gwaIsiboseti montoko zaAbineli moHeburoni.
Nonkango dokonhi
^ MoRuhebeli asi “makura mawoko gendi taga mi.”
