Samwere gwauvali 5:1-25
5 Konyima, vantu womomarudi nagenye goVaisraeli tava zi kwaNdafita koHeburoni, tava ka mu tantera asi: “Ose ekoro lyoge.
2 Apa ga kere nare Sauru hompa gwetu, ove ngo pitisire Vaisraeli moyita. Ano Jehova kwa ku tanterere asi: ‘Ove ngo pakera mbili vantu vange ntani ngo pangera Vaisraeli.’”
3 Makura masimbi nagenye goVaisraeli taga zi kwahompa Ndafita koHeburoni. Hompa Ndafita ta ka tulisa po egwanekero* kumwe nawo moHeburoni komeho zaJehova. Konyima, awo tava gwaveke Ndafita a kare hompa goVaisraeli.
4 Ndafita kwa kere nonomvhura 30 apa va mu tulire a kare hompa ntani age kwa pangerere nomvhura 40.
5 Age kwa pangerere moHeburoni vantu womorudi rwaJuda nomvhura ntambali nomakwedi ntazimwe ntani konyima age kwa pangerere moJerusarema Vaisraeli navenye ntani novantu womorudi rwaJuda nomvhura 33.
6 Ndafita novakwayita vendi tava zi koJerusarema va ka rwise Vajebusi ava va tungire mo. Awo kwa ninkagwire Ndafita asi: “Ove kapi ngo wiza mo omu! Nampili vatwiku noyirema kuvhura va ku tjide mo.” Awo kwa gazarere asi Ndafita kapi nga kwata sitata sawo.
7 Nye nampili ngoso, Ndafita kwa kwete sitata saSiyoni esi va kundurukidire nomakuma, esi vana kutumbura ngesi asi Sitata saNdafita.
8 Mezuva olyo, Ndafita kwa tente asi: “Ava nava ka rwisa Vajebusi va hepa kupitira morunone romema yipo va ka dipage yirema novatwiku ava na nyenga.” Eyi yiyo va uyungira asi: “Vatwiku noyirema kapi ngayi hwilira monzugo.”
9 Makura Ndafita ta ka tunga mositata esi va kundurukidire nomakuma. Aso kwa si rukire* asi Sitata saNdafita, ano Ndafita ta tameke kutunga makuma nomatungo gamwe kondundu* ntani mositata.
10 Yipo nye, Ndafita kwa twikilire kunkondopara, ano Jehova Karunga Mupitisili govakwayita vemeguru kwa kere kumwe nage.
11 Hiramu hompa gwaTirusi kwa tumine vantu va ze kwaNdafita noyitji yosedeli novahongi woyitji ntani novantu wokutunga makuma, makura awo tava tungire Ndafita mbara.
12 Ndafita ga yi divire asi Jehova ga ninka uhompa wendi u karerere moIsraeli ntani ga ninka uhompa wendi u kare nononkondo, morwa vantu vendi Vaisraeli.
13 Konyima zapa ga tundire Ndafita moHeburoni, ta ya kara noyihora* ntani novakadi wovanzi moJerusarema. Age kwa ya kere novana wovanzi wovagara nava wovakadi.
14 Aga kuna kara madina govana vendi ava va mu reterere moJerusarema: Samuwa, Sobabu, Natana, Saromo,
15 Ibuhara, Elisuwa, Nefegi, Jafiya,
16 Elisama, Eliyada naElifereti.
17 Apa va zuvhire Vafilisiti asi Ndafita vana mu gwaveke a kare hompa goVaisraeli, Vafilisiti navenye tava zi va ka papare Ndafita. Apa ga yi zuvhire Ndafita, ta zi a ka vande.
18 Makura Vafilisiti tava wiza, tava lihanene moMuramba goVarefa.
19 Makura Ndafita ta pura Jehova asi: “Ni ze ni ka rwise Vafilisiti ndi? Ove no va gava momawoko gange ndi?” Jehova ta mu limburura asi: “Zende, nani gava Vafilisiti momawoko goge.”
20 Makura Ndafita ta zi koBara-perasimu, ta ka va dipaga. Ano Ndafita ta tanta asi: “Jehova ana fundu nonkore dange ngwendi moomu mema aga bomona ekuma.” Eyi yiyo ga rukilire evango olyo asi Bara-perasimu.
21 Vafilisiti kwa sigire yikarunga yawo, makura Ndafita novakwayita vendi tava yi gusa.
22 Konyima, Vafilisiti tava wiza hena, tava lihanene moMuramba goVarefa.
23 Makura Ndafita ta pura Jehova, nye age ta mu limburura asi: “Wa ha va homokera komeho zawo, nye zende o ka va homokere konyima zawo, komeho zoyinhwa.*
24 Apa no zuvha muhagaro govakwayita vana kugenda moyinhwa, va homokera usimbu yeeyi Jehova na pita komeho zoge a ka dipage vakwayita woVafilisiti.”
25 Ndafita kwa rugene moomu ga mu tanterere Jehova. Age kwa dipagere Vafilisiti kutundilira koGeba dogoro koGesere.
Nonkango dokonhi
^ Ndi “elizuvhasano.”
^ Ndi nampo asi “Age ta si ruku.”
^ Ndi “Millo.” Nkango zoRuhebeli ezi azi tanta asi “kuzwida.”
^ Tara koMauzera.
^ MoRuhebeli asi “baca bushes.”
