Samwere gwauvali 6:1-23
6 Ndafita ta pongaike hena vakwayita 30 000 wononkondo moIsraeli.
2 Makura Ndafita ta zi kumwe nawo koBara-juda va ka simbe sikesa saKarunga gousili. Aso ngava si ruganesa vantu yipo va kuge edina lyaJehova Mupitisili govakwayita vemeguru, ogu ga hingira posipundi souhompa keguru* lyovakerubi.
3 Nye awo kwa tulire sikesa saKarunga gousili mokarukara kokape, yipo va si guse membo lyaAbinadaba eli lya kere kondundu. Ano Usa naAhiyo vana vaAbinadaba wovagara yiwo va singire nongombe edi va menge kokarukara kokape.
4 Awo kwa gusire sikesa saKarunga gousili membo lyaAbinadaba eli lya kere kondundu, ano Ahiyo kwa gendere komeho zosikesa.
5 Ndafita noVaisraeli navenye kwa hefe ntani kwa dene komeho zaJehova oku tava siki yisikiso yoyitji, yiumba, tungomagona, nonkonkweso ntani nayimwe yokusikisa.
6 Nye apa va ya sikire porupare rwaNakoni, Usa ta gonona kuwoko kwendi a kwate kosikesa saKarunga gousili morwa nongombe kwa here kusiganda.
7 Makura Karunga gousili Jehova ta handukire unene Usa, ta mu dipaga poopo morwa kapi ga likidire efumadeko. Age kwa fililire pevango lyoolyo konontere dosikesa saKarunga gousili.
8 Nye Ndafita ta handuka,* morwa Jehova kwa handukilire unene Usa ntani kwa mu tengekere. Ano evango olyo kulitumbura asi Peresi-usa* dogoro naina.
9 Makura Ndafita ta tjira Jehova ezuva olyo, ta tanta asi: “Ngapi omu ngani twara sikesa saJehova mositata sange?”
10 Ndafita kapi ga here kutwara sikesa saJehova mositata omu ga kere. Nye age kwa si twere kembo lyaObedi-edomu gomoGata.
11 Sikesa saJehova kwa kere membo lyaObedi-edomu gomoGata makwedi gatatu, ano Jehova kwa twikilire kutungika Obedi-edomu nepata lyendi nalinye.
12 Hompa Ndafita tava mu tantere asi: “Jehova kwa tungika epata lyaObedi-edomu noyininke yendi nayinye morwa sikesa saKarunga gousili.” Makura Ndafita ta zi a ka simbe sikesa saKarunga gousili kembo lyaObedi-edomu a si tware koSitata saNdafita ntani age kwa hefe.
13 Apa va gendere vantu ava va simbire sikesa saJehova sinano sosisupi,* Ndafita ta zamba ntwedu ntani nosimuna sokuneta.
14 Ndafita kwa dene komeho zaJehova nononkondo dendi nadinye. Age kwa dwere sikoverero sopomapepe.
15 Ndafita noVaisraeli navenye kwa ka simbire sikesa saJehova mositata awo vana hafa ntani awo kwa fudire ruvinga.
16 Nye apa sa ka sikire sikesa saJehova moSitata saNdafita, Mikali munaSauru ta tara pekende, ta mono hompa Ndafita kuna kuvatauka oku ta dana komeho zaJehova; makura Mikali ta mu handukire momutjima.
17 Makura tava reta sikesa saJehova, tava ka si tura pevango lyaso motende ezi ga si dikilire Ndafita. Konyima, Ndafita ta gava nonzambo deswakerero nononzambo dombili komeho zaJehova.
18 Apa ga mene Ndafita kugava nonzambo deswakerero nononzambo dombili, makura ta tungike vantu medina lyaJehova Mupitisili govakwayita vemeguru.
19 Age kwa geve hena nomboroto dokuliudinga, yikuki yenyango lyonongone noyikuki yomandjembere koVaisraeli navenye, kukwatera mo vagara novakadi. Ano konyima, vantu navenye tava tengura komambo gawo.
20 Apa ga zire Ndafita a ka tungike vantu vemembo lyendi, Mikali munaSauru ta zi a ka gwanekere nage. Mikali kwa tente asi: “Hompa goVaisraeli kuna liswaukisa mwene apa ana lihutura komeho zovapika wovakadona wovakareli vendi ngwendi moomu a lihutagura muntu gokuzaruka!”
21 Makura Ndafita ta tantere Mikali asi: “Ame kuna dana nokudimba komeho zaJehova ogu ga horowora nge ni pinganene po oguho nepata lyawo ntani ogu ga tura nge ni kare mupitisili govantu vaJehova, Vaisraeli. Yipo nye, ame tani dana oku tani dimbi komeho zaJehova
22 ntani ame ngani linunupika kupitakana apa dogoro ngani limone nyamwange asi kwato mulyo nye vapika wovakadona ava ono tanta, awo ngava fumadeka nge.”
23 Mikali munaSauru kapi ga retere vana dogoro konomfa dendi.
Nonkango dokonhi
^ Ndi nampo asi “pokatji.”
^ Ndi “ta guwu.”
^ Kutanta asi “Etengeko lyaUsa.”
^ MoRuhebeli asi “nontambo ntazimwe.”
