Samwere gwauvali 7:1-29
7 Ndafita kwa tungire mombara zendi ntani Jehova kwa mu ninkire a kare nombili nononkore dendi edi da mu kundurukidire.
2 Ndafita ta tantere muporofete Natana asi: “Ame kwa tunga monzugo ezi va dikisa yitji yosedeli, nye sikesa saKarunga gousili kwa kara motende.”
3 Natana ta tantere hompa asi: “Zende o ka rugane nkenye eyi guna tokomene mutjima goge, yeeyi Jehova nove ana kara.”
4 Masiku ogo, Jehova kwa tanterere Natana asi:
5 “Zende o ka tantere mukareli gwange Ndafita asi: ‘Jehova kuna kutanta asi: “Nyove nye wa wapera kudikira nge nzugo ni tunge mo ndi?
6 Yeeyi ame kapi na tunga monzugo kutunda apa na gusa Vaisraeli moEgipite dogoro naina, nye ame kwa gendera motende ntani monkongoronzugo.
7 Siruwo nasinye esi na genda noVaisraeli,* na tantera rumwe masimbi gomomarudi goVaisraeli aga na horowere ga pitisire vantu vange asi: ‘Morwasinke mwa dilira kudikira nge nzugo zoyitji yosedeli ndi?’”’
8 Yipo nye, ka tantere mukareli gwange Ndafita asi: ‘Jehova Mupitisili govakwayita vemeguru kuna kutanta asi: “Ame kwa kuninka o hageke kulisa yimuna nokuyipakera mbili, yipo o ya kare mupitisili govantu vange Vaisraeli.
9 Ame ngani kara kumwe nove nkenye oku ngo za, ano ame ngani funda nonkore doge komeho zoge; ntani ngani ninka edina lyoge li fumane ngwendi vantu ava va fumana mouzuni.
10 Ame ngani horowera vantu vange evango oku ngava tunga. Awo ngava tunga kevango olyo ntani kwato ogu ngava donganesa hena. Vantu wovadona kapi ngava hepeka vantu vange ngwendi posiruwo sanare,
11 kutundilira apa na horowere vapanguli va pitisire vantu vange Vaisraeli ntani ngani ninka nonkore doge nadinye ngadi dire kukurwisa.
“‘“Jehova kwa ku tanterere hena asi Jehova nga ku pa uhompa ou ngau karerera.
12 Apa ngo fa ngwendi onyokokuru, ame ngani ninka munoge a kare hompa ntani ngani ninka uhompa wendi u kare nononkondo.
13 Age nga dikira nge nzugo ezi ngava fumadekera edina lyange ntani ngani ninka uhompa wendi u karerere po dogoro narunye.
14 Ame ngani kara oguhwe, ano age nga kara munange. Apa nga rugana yininke yoyidona, ame ngani mu pukurura pokumusopora ngwendi moomu ava yi rugana vantu.
15 Ame kapi ngani hageka kumulikida eharo lyanarunye ngwendi moomu na hageka kulilikida Sauru ogu na gusa mouhompa, yipo o mu pinganene po.
16 Epata lyoge nouhompa woge, ngau kara nononkondo komeho zoge ntani uhompa woge ngau karerera dogoro narunye.”’”
17 Natana kwa tanterere Ndafita yininke nayinye eyi nemoneko eli ga mwene.
18 Makura Ndafita ta zi, ta ka hingira komeho zaJehova, ta tanta asi: “Jehova Hompa Mupangeli gwanayinye, morwasinke ono kuruganena nge yininke eyi nepata lyange?
19 Jehova Hompa Mupangeli gwanayinye, kugusa ko yininke oyo, ove kuna tantere nge hena asi epata lyange ame mukareli goge ngali karerera dogoro komeho. Jehova Hompa Mupangeli gwanayinye, ezi kuna kara veta ezi ono gava kovantu navenye.
20 Kwato eyi nani uyunga ko ame mukareli goge Ndafita mokumona asi ove Jehova Hompa Mupangeli gwanayinye wa diva nge nawa.
21 Ove kwa rugana yininke nayinye eyi, yiyo wa yi horwera nge ame mukareli goge morwa eyi yiyo ono hara ntani yiyo wa tumbwidira.
22 Ove Jehova Hompa Mupangeli gwanayinye, eyi yiyo wa wapera unene. Kwato gumwe ogu ga kufana ntani nyovelike tupu Karunga gousili, ano nayinye eyi twa zuvha kulikida asi ayo usili.
23 Muhoko hena musinke gwepevhu ogu gwa lifana novantu woge Vaisraeli? Karunga, ove kwa zire o ka va zowore yipo va kare vantu woge ntani o lidivise kovantu pokuvaruganena yininke yoyinene ntani yokutetukisa. Ove kwa tjida nomuhoko ntani noyikarunga yawo morwa vantu woge ava wa zowora moEgipite.
24 Ove kwa ninka Vaisraeli va kare vantu woge dogoro narunye ntani ove Jehova ono kara Karunga gwawo.
25 Yipo nye Jehova, sikisa mo eyi wa tumbwidira mukareli goge nepata lyendi dogoro narunye ntani ngano o yi rugane ngwendi moomu wa yi tumbwidira.
26 Edina lyoge ngano li fumane dogoro narunye yipo vantu ngava tante asi: ‘Jehova Mupitisili govakwayita vemeguru, yige Karunga a pangere Vaisraeli,’ ntani ngano epata lyange ame mukareli goge ngali twikire kupangera dogoro narunye.
27 Yeeyi ove Jehova Mupitisili govakwayita vemeguru ntani Karunga goVaisraeli kwa tantera nge ame mukareli goge asi ngo pa nge uhompa ou ngau karerera. Eyi yiyo nina karere nouradi wokukanderera koge kuhamena yininke eyi.
28 Yipo nye, ove Jehova Hompa Mupangeli gwanayinye, ove kuna kara Karunga gousili ntani nonkango doge usili. Ano ove yiyo wa tumbwidira mukareli goge yininke eyi yoyiwa.
29 Ngano o yi hafere kutungika epata lyomukareli goge ntani ngano ngali twikire kukara komeho zoge dogoro narunye, yeeyi ove Jehova Hompa Mupangeli gwanayinye nyove wa yi tumbwidira ntani ngano o twikire kutungika epata lyomukareli goge dogoro narunye.”
Nonkango dokonhi
^ MoRuhebeli asi “vana vaIsraeli wovagara.”
