Samwere gwauvali 8:1-18
8 Konyima, Ndafita ta fundu Vafilisiti ntani ta hakana Vafilisiti sitata saMetega-ama.
2 Ndafita kwa fundire Vamowaba, ta va ninki va rare pevhu makura ta va meta norugodi. Age kwa metere nombunga mbali yipo va di dipage ntani kwa metere mbunga zimwe yipo va zi sige zi paruke. Vamowaba tava kara vakareli vaNdafita ntani awo ngava gava mutero* kwendi.
3 Ndafita kwa fundire Hadadesere hompa gwaSoba munaRehobu, apa ga zire a ka pangere vantu ava va kere komukuro gwaEufurata.
4 Ndafita kwa kwete varondi wononkambe 1 700 ntani novakwayita 20 000 vaHadadesere. Konyima, Ndafita ta tete magava gononkambe 100 edi da kokere matemba.
5 Vasiliya womoDamasikusi kwa wizire va ya vatere Hadadesere hompa gwaSoba, ano Ndafita ta dipaga Vasiliya 22 000.
6 Makura Ndafita ta tulisa po nombunga dovakwayita moSiliya zomoDamasikusi, ano Vasiliya kwa ya kere vakareli vaNdafita ntani ngava gava mutero kwendi. Jehova kwa vaterere Ndafita a funde nkenye oku nga zi.
7 Ndafita kwa gusire hena yilikandwiso yokuliudinga yongorodo yovakareli vaHadadesere, makura ta yi twara koJerusarema.
8 Age kwa gusire hena ngoporo zonzi unene moBeta naBerota, yitata eyi nga pangere Hadadesere.
9 Hompa Toi gwaHamati ta zuvhu asi Ndafita ana fundu vakwayita vaHadadesere navenye.
10 Makura Toi ta tumu munendi Joramu a ze kwahompa Ndafita, a ka mu pure omu ana karere ntani a ka mu pandadeke kweyi ga rwisire nokufunda Hadadesere (yeeyi Hadadesere nga rwisa nkenye apa Toi). Age kwa twarerere Ndafita yipako yosisiliveli, yongorodo ntani yongoporo.
11 Hompa Ndafita kwa geve yininke oyo kwaJehova ngwendi moomu ga geve sisiliveli ntani nongorodo eyi ga kwete konomuhoko edi ga fundire:
12 Vasiliya, Vamowaba, Vaamoni, Vafilisiti, Vaamareki ntani neyi ga gusire kwaHadadesere hompa gwaSoba munaRehobu.
13 Ndafita kwa divikwire hena apa ga mene kudipaga Vaedomu 18 000 moMuramba goMungwa.
14 Age kwa tulisire po nombunga dovakwayita moEdomu. Mosirongo nasinye saEdomu kwa kere mo nombunga dovakwayita vendi ntani Vaedomu navenye kwa ya kere vakareli vaNdafita. Jehova kwa vaterere Ndafita a funde nkenye oku nga zi.
15 Ndafita kwa twikilire kupangera Vaisraeli navenye ntani kwa ruganenene vantu vendi yininke yoyiwa neyi youhunga.
16 Jowabu munaSeruya kwa kere mupitisili govakwayita, ano Jehosafata munaAhirudi nga tjanga ehistoli.
17 Sadoko munaAhitubu ntani Ahimereki munaAbiyatara kwa kere vapristeli, ano Seraya kwa kere hamutjanga.
18 Benaya munaJehoyada nga pitisire Vakereti noVapereti, ano vana vaNdafita wovagara kwa kere noyipundi yoyinene.*
