Samwere gwauvali 9:1-13
-
Ndafita ta likida Mefiboseti eharo lyanarunye (1-13)
9 Makura Ndafita ta pura asi: “Kweli gumwe gemepata lyaSauru ogu ga hupa po yipo ni mu likide eharo lyanarunye morwa Jonatana ndi?”
2 Posiruwo oso, membo lyaSauru mwa kere mukareli gwendi gedina Siba, makura tava mu tantere a ze kwaNdafita. Ano Ndafita ta mu pura asi: “Nyove Siba ndi?” Age ta limburura asi: “Nhi, nyame hompa gwange.”
3 Hompa ta mu pura hena asi: “Kweli ga hupa po mepata lyaSauru yipo ni mu likide eharo lyaKarunga lyanarunye ndi?” Siba ta limburura hompa asi: “Pweli munaJonatana gumwe ga hupa po, maguru gendi nagenye ga remana.”
4 Hompa ta mu pura asi: “Kupi ana kara?” Siba ta mu limburura asi: “Mweli moRodebara membo lyaMakire munaAmiyeli.”
5 Makura hompa Ndafita ta tumu vantu va ka mu simbe koRodebara membo lyaMakire munaAmiyeli.
6 Apa ga ya sikire Mefiboseti munaJonatana zaSauru kwaNdafita, ta tu nongoro ntani ta linyongamene. Makura Ndafita ta mu zigida asi: “Mefiboseti!” Age ta limburura asi: “Nyame ogu hompa gwange.”
7 Ndafita ta mu tantere asi: “Wa ha tjira, yeeyi ame ngani kulikida eharo lyanarunye morwa oguho Jonatana ntani ame ngani ku tengwidira sirongo nasinye sonyokokuru Sauru. Ove hena ngo lya* nkenye apa kositafura sange.”
8 Makura Mefiboseti ta ligandere pevhu, ta tanta asi: “Morwasinke ono karere nosinka kwange ame ogu na fana ngwendi mbwa zokufa?”
9 Hompa ta tumu vantu va ka zigide Siba mukareli gwaSauru, makura hompa ta mu tantere asi: “Yininke nayinye yaSauru nembo lyendi nalinye tani yi gava kwa mutekurwendi ogu ga kere hekuroge.
10 Nove novana woge ntani novakareli woge ngomu lime epya lyaMefiboseti ntani ngomu pongaike nombuto, yipo ngava lye vantu ava va kara naMefiboseti. Nye Mefiboseti mutekurwaSauru, age nga lya nkenye apa kositafura sange.”
Siba kwa kere novana wovagara 15 ntani novakareli 20.
11 Makura Siba ta tantere hompa asi: “Mukareli goge nga rugana nkenye eyi ana tantere hompa mukareli gwendi.” Yipo nye, Mefiboseti nga lire kositafura saNdafita* ngwendi vana wovagara vahompa.
12 Mefiboseti kwa kere namunendi gomumati gedina Mika ntani vantu navenye ava va kere membo lyaSiba kwa ya kere vakareli vaMefiboseti.
13 Mefiboseti kwa tungire moJerusarema, yeeyi age nga li nkenye apa kositafura sahompa ntani maguru gendi nagenye kwa remanene.
