Mbilive zauvali kwaTimoteusa 2:1-26
2 Yipo nye munange, twikira kugwana nonkondo monkenda zonene ezi za kara mwaJesus Kristusa,
2 ano yininke eyi wa zuvha kwange eyi va kwatesa ko vantu wovanzi, yi ronga vagara wokuvhura kuhuguvara yipo nawo ngava wapere kuronga wopeke.
3 Liwapaikira mokupita momahepeko ngomukwayita gomuwa gwaJesus Kristusa.
4 Kwato mukwayita a lihameke mounangesefa* nsene asi ana hara kuhafesa ogu ga mu tura moukwayita.
5 Ntani hena nampili momaudano, ava ava lihameke mo kapi ava gwana mfeto* ntudi va kwame noveta doudano.
6 Munandima ogu a rugana unene yige a howo kulya muzangu gwendi.
7 Gazadara ko nkenye apa kweyi nina kukutantera makura Hompa nga kuvatere o kwate egano* yininke nayinye eyi.
8 Diworoka asi Jesus Kristusa kwa mu pindwire koufe ntani kwa kere gomoruvharo rwaNdafita* kuliza nombudi zongwa ezi ani zuvhisa,
9 ezi nina kuhepera ntani yizo za tulisa nge modorongo ngwendi asi ni mukorokotji. Nye nampili ngoso, kwato gokuvhura kukondera nonkango daKarunga.
10 Eyi yiyo ani lididimikilire yininke nayinye morwa vahoroworwa, yipo nawo ngava ka va zowore nokuvayererepeka narunye kupitira mwaJesus Kristusa.
11 Nonkango edi usili asi: Nsene asi ose kwa fa kumwe nage, ngatu ka paruka hena kumwe nage,
12 nsene tu twikira kulididimikira, ngatu ka pangera nage ngovahompa ano nsene tu mu patana, nage nga ka tu patana,
13 nampili tu dire kurugana eyi a tu tantere Karunga, age nkenye apa kurugana eyi a tanta, yeeyi age nokuvhura si kulikumbagera mwene.
14 Twikira kuvadiworokesa yininke eyi nokuvaronga* komeho zaKarunga asi va nyokere po kulipatana kuhamena nonkango, ayo kutupu mulyo nampili nakauke yeeyi ayo kupukisa ava ava yi purakene.
15 Kondja unene yipo o moneke kwaKarunga asi ove murugani ogu a dili kufa nomuga sirugana sendi ntani ogu a rongo nokufaturura nawa usili.
16 Nye nyokera po nonkango domawoko-woko edi adi swaukisa Karunga, yeeyi ado kuninkisa vantu va dire kufumadeka Karunga,
17 ano nonkango dawo kulihana ngwendi sironda sokudira kupora. Vantu vamwe owo kuna kara Himeneusa naFiretusa.
18 Vagara ava kwa siga usili, awo kutanta asi evhumbuko lya pita nare ntani kuna kuzonagura epuro lyavamwe.
19 Nye Karunga kwa tura po etateko lya kora, alyo kwa lisikamena ntani apo kwa kara po sinongweneso esi asi: “Jehova ga diva ava va hama kwendi,” ntani “nkenye ogu a kugu edina Jehova, a sige yoyidona.”
20 Membo lyenene kapi mwa kara tupu yipako yongorodo nosisiliveli yelike, nye hena yoyitji neyi yerova. Yimwe kuyiruganesa koyininke yomulyo ano yimwe koyininke yankenye ezuva.
21 Yipo nye asi nsene gumwe a ligusa ko koyipako oyo yankenye ezuva, nga kara siruganeso* somulyo kwamwenyaso esi va lipongwera mokusiruganesa koyirugana yoyiwa.
22 Tjwayuka madowo gosiudinkantu, o kondjere uhungami nepuro neharo nombili. Yi rugana eyi kumwe nava va huguvara mwaHompa nomutjima gomuwa.
23 Ntani hena, nyokera po nompata dougova da hana mulyo yeeyi ado kureta marwanambo.
24 Yeeyi mukareli gwaHompa kapi ga hepa kurwana, nye age ga hepa kukara nombili* kwanavenye, a wapere kuronga ntani a lididimikire nsene kuna mu zonene,
25 a pukurure varwanesi nombili. Karunga nampo nava ninkisa va litezurure* va kare nediwo lyousili,
26 va dimburure nokupweka mo mosiraha soMuzonaguli ogu ga va kwata asi va rugane eyi ga hara.
Nonkango dokonhi
^ Ndi nampo asi “yirugana yankenye ezuva.”
^ Ndi “va dwareke nkata.”
^ Ndi “nga ku pe nondunge.”
^ MoRugereka asi “mbuto zaNdafita.”
^ MoRugereka asi “nokugava nawa-nawa umbangi.”
^ Ndi “sipako.”
^ Ndi “nonondunge.”
^ Ndi “rundurure magazaro gawo.”
