Vakolinte vauvali 10:1-18
10 Tani mu likwambere nougomoki nombili zaKristusa ame Paurusa ogu omu tanta asi kwato nonkondo nsene mokatji keni nina kara nye apa ani mu tjangere, ame kuuyunga nouradi.
2 Nina si huguvara asi apa ngani ya sika, ava ava tu gazarere asi ose kurugana yininke kuliza nomu ava yi gazara vantu, va rundurura nkareso zawo yipo ngani dire kuyavapukurura nononkondo.
3 Nampili ngomu twa tunga mouzuni ou, kapi atu ru yita ngwendi moomu ava yi rugana vantu womouzuni ou.
4 Yeeyi yirwiso yetu kapisi ngwendi yeeyi ava rwisa mouzuni ou, nye ayo yirwiso yononkondo eyi ga tu pa Karunga, ayo kuzonagura po yininke yononkondo unene ngwendi makuma.
5 Yeeyi ose kurwanesa po magazaro nankenye eyi ayi kondere vantu mokudiva Karunga ntani ose kutura magazaro nagenye mounkwate yipo ga limburukwe kwaKristusa.
6 Konyima zokulikida ulimburukwi weni, ose tuna liwapaikire kutengeka nkenye ogu a dili kulimburukwa.
7 One kupangura yininke kuliza nemoneko lyayo. Nsene asi kweli ogu ga lihuguvara asi age kwa hamena kwaKristusa, ga hepa kuyidiva asi moomu ga hamena age kwaKristusa, nose yimo twa hamena kwaKristusa.
8 Hompa kwa tu pa nonkondo tu nkondopeke epuro lyeni nye kapisi tu li zonagure, nampili nsene ni likangangera nonkondo edi va tu pa, kapi ta yi fisa nge nomuga.
9 Yeeyi kapi nina hara kumoneka ngwendi asi kuna hara ni mu tjilise nonombilive dange.
10 Yeeyi vamwe kuuyunga asi: “Nsene asi nose ana kara, kumoneka ngwendi kwato nonkondo ntani eyi a uyunga kwato mulyo.”
11 Tantereni ava ava uyunga yininke eyi asi apa ngatu wiza ngatu ya sikisa mo eyi twa tjanga monombilive detu.
12 Ose kapi tuna hara kulihetakanesa nava ava likanganga ndi tu kare ngwendi yiwo. Awo kulipangura vene kuliza neyi ava tara asi yiwa, monkedi ezi awo kulikida asi awo kwato nondunge.
13 Ose kapi ngatu likangangera yininke eyi twa dira kurugana nye ngatu likangangera sirugana esi ga tu pa Karunga ano eyi kwa kwatera mo none.
14 Apa twa wizire kweni, kapi twa ya rugene yininke eyi ga dilire kutupa Karunga, yeeyi nyose twa hova kumuzuvhisira mbudi zongwa kuhamena Kristusa.
15 Ose kapi tuna kulikangangera yirugana yomuntu gwapeke, tu pitakane murudi ogu va tu tulira po. Nye ose kuna hara asi epuro lyeni li pame yipo asi sirugana esi twa rugana si ze komeho mokatji keni. Makura ngatu vhure kurugana yoyinzi,
16 ngatu zuvhisire mbudi zongwa koyirongo yapeke, yipo ngatu dire kulikangangera eyi va rugana wopeke momukunda gwawo.
17 “Nye nkenye ogu a likanganga, a likangangere mwaJehova.”
18 Yeeyi Jehova kutambura muntu ogu a panda mwene nye kapisi googu a lipanda mwene.
