Vakolinte vauvali 12:1-21
12 Na hepa kulikanganga, ngani uyunga kuhamena mamoneko aga ga likida nge Hompa ntani nombudi ezi ga pa nge nampili ngomu ayi dili kuretera nge uwa.
2 Ame na diva mugara ogu ga likwatakana naKristusa, ogu va twere meguru lyautatu nomvhura 14 da ka pita, kapi nina diva nsene asi kwa mu twere norutu rwendi ndi hawe, Karunga yige gokuyidiva.
3 Mugara ogo na mu diva, yi kare asi norutu rwendi ndi hawe, kapi tani diva, Karunga gelike gokuyidiva.
4 Age kwa mu twere moparadisa ntani kwa zuvhire nonkango dokudira kuvhura kutanta ntani kapi va yi pulisira kuditantera wopeke.
5 Ame ngani likangangera mugara ogo nye kapi ngani likangangera mwanyamwange, ame ngani likangangera tupu upirankondo wange.
6 Yeeyi nampili ni hare kulikanganga, kapi tani kara egova yeeyi ame kuuyunga usili. Nye ame kapi ani likanganga yipo mu pandadekere nge tupu kweyi omu mono nokuzuvha kwange
7 morwa yininke eyi va horwera nge.
Mokuninka asi ni dire kulinenepeka, ame kwa tura nge rwiga morutu, oru rwa kara ngwendi muengeli gwaSatana, aro kukoresa nge nkenye apa yipo ni dire kulinenepeka.
8 Yikando yitatu na likwamberere kwaHompa asi a guse nge rwiga oru.
9 Nye age kwa tanterere nge asi: “Nkenda zange zonene za kugwanena po, yeeyi nonkondo dange kunenepa moupirankondo woge.” Yipo nye, ame ngani likangangera upirankondo wange nehafo, yipo nonkondo daKristusa di kare pwange ngwendi tenta.
10 Ame kuhafera upirankondo wange noruhepo nomaswauro nomahepeko ntani nomaudigu aga ani lididimikire morwa Kristusa. Yeeyi apa ani dili nonkondo, ame kunkondopara.
11 Ame kuna kuuyunga ngwendi muntu gegova morwa nyone. Nye ngano one kuuyunga nge monkedi zongwa ngano kapi nina kuuyunga ngesi. Nampili ngomu omu gazarere nge asi ame nayimwe si, ava omu tumbura asi vapositoli veni kapi va pitakana nge mwankenye eyi.
12 Ame na mu likida yidiviso youpositoli wange pokulididimikira nokurugana yitetu noyidiviso yoyinene.
13 Ame kapi na mu hundira yuma, opo yipo mwa lisigira nonombungakriste dapeke. Na rugana epuko pokudira kumuhundira ndi? Nsene yimo, gusireni nge po.
14 Esi sikando sautatu nina kuliwapaikira mokuwiza kweni, kapi ngani ya mu hundira yuma. Yeeyi kapisi yiweka yeni nina hara nye nyone, yeeyi vanona kapisi yiwo ava pungwire vakondi vawo upingwa nye vakondi yiwo ava pungwire vana vawo.
15 Ame nina hara ngani ya mu pe nayinye eyi na kara nayo kukwatera mo eparu lyange. Nsene asi ame na mu hara unene, none nani kapi mwa fira kuhara nge unene?
16 Nye nampili ngoso, ame kapi na mu hundira yuma. One kutanta asi ame kwa mu kotokera ntani kwa mu genda moyineya.
17 Ndi na mu gusa yuma kupitira mwava na mu tumina?
18 Ame kwa tumangedere Titusa a wize nomupuli mukwetu kweni. Titusa ga ya mu gusa yuma ndi? Nani kapi twa kara mouumwe? Nani kapi twa rugana yokulifana?
19 One nampo kuna kugazara asi ose kuna kulipopera nyamwetu nye kapisi yimo. Nye ngovarongwa vaKristusa, ose kuna kuuyunga usili kosipara saKarunga. Vakwetu wokuhara, nayinye eyi atu rugana, kuyiruganena mokumunkondopeka.
20 Ame nina kara nosinka asi apa ngani ya sika, nkareso zeni nampo zina lisigi nomu na zi harera, ano zange nazo zina lisigi nomu mwa zi harera, makura ngapa ya kare nomutangu nomfudu nehandu nomadiro kulizuvha nokagomambeta kuvali norugambo* nelinenepeko ntani nepiyagano.
21 Apa ngani wiza hena kweni, Karunga nampo nga ya nunupika nge komeho zeni ngani ya kare noruguwo kwava va zona nokudira kulitezurura koyirugana yawo yokunyata neyi yoruhonda* ntani konkareso zokunyata.*
Nonkango dokonhi
^ Ndi “kuliwowotera.”
