Vakolinte vauvali 13:1-14
13 Esi sikando sautatu nani wiza kweni. “Umbangi* wovantu vavali ndi vatatu kutokora nawa unzoni.”
2 Nampili ngomu nina dili kukara none, tambureni mapukururo gange ngwendi asi none nina kara. Tani rondora hena komeho zosiruwo ava va zona ntani namuvenye. Nsene ngani wiza, kwato gumwe gwawo ngani dira kuyapukurura
3 yipo ngomu kwate egano asi Kristusa kuuyungira mwange. Age kapisi murupirankondo mokatji keni nye age kumulikida nonkondo dendi dononene.
4 Yeeyi age kwa mu pamparere kositji ngomuntu gokudira nonkondo, nye ngesi muzuni morwa nonkondo daKarunga. Nampili ngomu nose twa dira kukara ngwendi moomu ga dilire kukara age nononkondo nye ngatu ka paruka nage morwa nonkondo daKarunga edi dina kara mweni.
5 Likonakoneni nyamweni mu dive nsene asi mepuro muna kara, likonakoneni yipo mu dive asi one vantu musinke. Ndi kapi mwa dimburura asi Jesus Kristusa kwa kara mouumwe none? Nsene asi kapisi ngoso, Karunga ntudi kapi ga mu tambura.
6 Na yi huguvara asi ngomu dimburura asi ose Karunga ga tu tambura.
7 Tatu mu kanderere po kwaKarunga asi ngano mu dire kurugana yepuko nye kapisi asi yipo wopeke va tu tare asi Karunga kwa tu tambura nye yipo mu rugane yoyiwa nampili wopeke va dire kututambura.
8 Yeeyi ose kapi atu rugana yokulilimba nousili nye yeeyi ya liza nousili.
9 Ose kuhafa nkenye apa atu dili nonkondo nye siruwo oso one muna nkondopara. Ose kukanderera asi mu ture po marunduruko.
10 Eyi yiyo nina kumutjangerera yininke eyi komeho ni wize kweni, yipo asi apa ngani wiza ngani ya dire kuyamukoresa nononkondo edi ga pa nge Hompa, asi ngano ni mu nkondopekese ko nye kapisi asi ni mu zonagwise ko.
11 Mokuhulisa, vakwetu, twikireni kuhafa oku tomu tura po marunduruko nokutambura makorangedo noku liza momagazaro noku kara mombili, makura eharo nombili zaKarunga, ngayi kara none.
12 Likunda-kundeni nencumito lyokupongoka.
13 Vapongoki navenye vana mu tumine makundo gawo.
14 Tani kanderere asi nkenda zonene zaHompa Jesus Kristusa neharo lyaKarunga nompepo zokupongoka ezi va tu pa natuvenye, zi kare none.
Nonkango dokonhi
^ MoRugereka asi “tuna.”
