Vakolinte vauvali 2:1-17
2 Ame nina tokora mokudira kuyamuguvisa apa ngani ya mu dingura sikando esi.
2 Yeeyi nsene ni mu guvisa, yilye nga ya hafesa nge nsene asi kapisi vaava na guvisa?
3 Eyi yiyo nina mu tjangerere asi apa ngani wiza, ngomu ya dire kuguvisa nge one ava mwa fira kuhafesa nge, morwa na yi huguvara asi eyi ayi retere nge ruhafo yiyo hena ayi mu retere namuvenye ruhafo.
4 Yeeyi ame kwa guvire unene yiyo na mu tjangerere mbilive zina nomahodi gomanzi, kapisi asi ni mu guvise nye mu dive asi ame kwa mu hara unene.
5 Nsene asi pweli ogu ana retesa po ruguwo, kapisi nyame tupu ana guvisa nye namuvenye. Kapi nina hara kudemenena unene koyininke eyi.
6 Eyi mwa mu pukurura ya gwana
7 nye ngesi mu gusireni po nomutjima nagunye nokumuhengagwida, yipo ru dire kumudinina* po ruguwo.
8 Yipo nye nina kumutumangeda mu mu likide asi mwa mu hara.
9 Eyi yiyo na mu tjangerere mbilive zina yipo ni dive nsene asi one kulimburukwa moyininke nayinye.
10 Ava omu gusire po, name kuvagusira po. Eyi na gusira po (nsene pwa kara eyi na gusira po) ame kwa yi ruganena mwarweni kosipara saKristusa,
11 yipo a dire kutupukisa* Satana, yeeyi yineya* yendi twa yi diva.
12 Apa na ka sikire moTorowasa ni ka udise mbudi zongwa kuhamena Kristusa, ame kwa ka zegwilire nge mpito* mosirugana saHompa,
13 kapi na kere nombili momutjima morwa kapi na ka gwene mukwetu, Titusa. Yipo na va rekerere makura tani zi koMakedoniya.
14 Nye va mu pandure Karunga ogu a tu pitisire ngwendi vakwayita vana ka funda moyita kumwe naKristusa. Ntani age kuturuganesa hena tu hanese ediwo lyendi nakunye ngwendi edumba lyewa.
15 Ose ava atu udisa kuhamena Kristusa, kwa kara ngwendi edumba lyewa kwaKarunga. Edumba eli kukasika kwava ngava ka paruka ntani kwava ngava ka zonauka,
16 kwava ngava ka zonauka, edumba lyokutwaredesa konomfa, ano kwava ngava ka paruka, edumba lyokutwaredesa komwenyo. Yilye ogu ga wapera sirugana oso?
17 Nyose, yeeyi ose kapi twa fana ngwendi vantu wovanzi ava ava randesa* nonkango daKarunga, nye ose kuuyunga usili ngovarongwa vaKristusa ava ga tuma Karunga ntani ose kurugana nayinye eyi kosipara saKarunga.
Nonkango dokonhi
^ Ndi “kumufunda.”
^ Ndi “kutukumbagera.”
^ Ndi “magano; makoto.”
^ MoRugereka asi “kwa zegwililire nge evero.”
^ Ndi “ava ava gwanene mo yimaliwa mokurandesa.”
