Vakolinte vauvali 3:1-18
3 Hepero tu lidivise hena nyamwetu kweni ndi? Ndi tu mu pe nombilive dokulidivisa nyamwetu kweni, ndi di tunde kweni mu di tu pe ngwendi moomu ava yi rugana wopeke?
2 One nyone mbilive zetu ezi va tjangera monomutjima detu, azo kwa divikwa ntani kuziresa vantu navenye.
3 Ayo ya lilikida asi one mbilive zaKristusa ezi twa tjanga ose vakareli vaKarunga, azo kwa zi tjanga nompepo zaKarunga gomunamwenyo nye kapisi noinka, azo kwa zi tjanga monomutjima nye kapisi poyiperende.
4 Ose kwa kara nehuguvaro lyangoso kwaKarunga kupitira mwaKristusa.
5 Ose kapi twa wapera kurugana nkenye sirugana nye Karunga yige a tu ninki tu wapere kurugana nkenye sirugana.
6 Age yige a tu ninki tu wapere kukara vakareli vegwanekero lyepe nye kapisi woVeta nye wompepo, yeeyi veta kutwaredesa konomfa, ano mpepo kutwaredesa komwenyo.
7 Veta ezi azi twaredesa konomfa kwa zi tjenge pomamanya, azo kwa zi geve nepaimo eli lya ninkisire Vaisraeli va dire kutara sipara saMosesa morwa aso kwa paimine, ano epaimo olyo kwa ya hege po.
8 Nsene asi Veta kwa zi geve nepaimo, morwasinke nye ngava dilira kugava mpepo nepaimo lyenene?
9 Nsene asi Veta ezi azi twaredesa konomfa kwa kere nepaimo, kupi nye ngali hura epaimo lyosirugana esi asi twaredesa kouhungami?
10 Epaimo lyoVeta kwa ya kere lyomawoko-woko mokulihetakanesa nepaimo lyegwanekero lyepe.
11 Nsene asi eyi ya ya hege po kwa yi retere nepaimo, epaimo lyokuhura kupi nye ngayi kara nalyo eyi ngayi karerera po?
12 Mokumona asi ose kwa kara nehuguvaro lyangoso, ose kuuyunga nemanguruko lyenene
13 nye kapi atu rugana ngwendi Mosesa ogu ga kudumikire sipara sendi yipo Vaisraeli va dire kutarurura epaimo lyoVeta ezi za ya hege po.
14 Nondunge dawo kwa limbanderere. Dogoro naina eli, nondunge dawo kwa kara ngwendi kwa di kudumika nosikehe ntani kapi ava kwata egano egwanekero lyanare. Sikehe oso kusikudumuna ko tupu kupitira mwaKristusa.
15 Nanaina eli, nomutjima dawo simpe kwa di kudumika, eyi yiyo ava dilire kukwata egano eyi ga tjenge Mosesa.
16 Nye muntu apa a litezurura yipo a karere Jehova, ayo kukara ngwendi kuna gusa ko sikehe.
17 Jehova, mpepo, ano apa apa kara mpepo zaJehova, kukara po emanguruko.
18 Natuvenye ava twa gusa ko sikehe koyipara yetu, kwa fana ngwendi ntarero ezi azi likida uyerere waJehova. Ose kuturundurura yipo tu fane ngwendi Karunga ntani tu horore momunene uyerere waKarunga moomu ga yi harera Jehova ogu a dili kumoneka.*
Nonkango dokonhi
^ Ndi “Jehova mpepo.”
