Vakolinte vauvali 4:1-18
4 Mokumona asi ose kwa tu pa sirugana esi konkenda ezi ga tu likida Karunga, ose nokuhageka si.
2 Ose kwa siga yirugana yonomuga neyi yemehoramo noyineya ntani kapi atu pukisa nonkango daKarunga, ose kulikida vantu eyi adi tanta nonkango daKarunga, mokurugana ngoso, ose kulikida asi kuna kurugana youhunga kosipara saKarunga yipo vantu* navenye va yi dimburure.
3 Nsene asi mbudi zongwa ezi atu udisa kwa zi kudumika, kwa zi kudumikira ava ngava ka zonauka,
4 karunga gouzuni* ou kwa twiza nondunge dava va dira kupura yipo si dire kuvatemena site souyerere wombudi zongwa kuhamena Kristusa, sihwi saKarunga.
5 Yeeyi ose kapi atu zuvhisa kuhamena nyamwetu nye asi Jesus Kristusa yige Hompa ntani asi ose vapika veni morwa Jesus.
6 Yeeyi Karunga yige ga tanta asi: “Site si temene momundema,” ntani age kwa temena monomutjima detu adi minikire nosite somosipara saKristusa esi asi gava ediwo kuhamena Karunga.
7 Nampili ngomu twa kara ngwendi yipako yerova, ose kwa kara nougawo ou, monkedi zangesi ayo kuyimonenena asi ose kwa kara nononkondo edi va dira kukara nado vantu, nonkondo edi kapisi detu nye daKarunga.
8 Maudigu kwa tu kundurukida nakunye, nye kapi ga tu konderekederera, ose kwa kara mepiyagano nye kututompoka,*
9 kutuhepeka nye Karunga kapi a tu sigilire, kututoona nye kapi ava tu zonagwilire po.
10 Nkenye oku atu zi kuligwanekera noyimpagwa yokututwaredesa konomfa ngwendi Jesus, yipo yi likide vantu asi ose kuhepa ngwendi moomu ga hepere Jesus.
11 Ose kuparuka nye eparu lyetu kwa kara mosiponga morwa kukwama Jesus yipo yi likide vantu asi ose kuhepa ngwendi moomu ga hepere Jesus.
12 Nomfa kuna kurugana mwetu, nye eparu mweni.
13 Kwa tjanga asi: “Ame kwa pura mwaKarunga, yiyo na uyunga,” nose kwa pura mwaKarunga yiyo atu uyungire,
14 yeeyi twa diva asi ogu ga pindwire Jesus koufe nga ka tu pindura nose tu ka kare naJesus ntani nga ka tu twara kosipara saJesus.
15 Nayinye eyi kwa horokera mwarweni yipo nkenda zaKarunga zonene ngazi vhuke unene, azo kuvhuka apa vantu ava hamberere Karunga pokumupandura.
16 Eyi yiyo atu dilire kuhageka, morwa nampili marutu getu ga zonauke nye nomutjima detu nonondunge detu kukara nompe nkenye ezuva.
17 Nampili ngomu ya kara asi maudigu* aga atu ligwanekere nago gopokaruwogona ntani mareru, ago kuturetera uyerere ou au vhuka* ntani ou au karerere.
18 Ose kapi atu demenene koyininke eyi atu mono, nye ose kudemenena koyininke eyi atu dili kumona. Yeeyi yininke eyi atu mono yopokaruwogona, nye yininke eyi atu dili kumona yanarunye.
Nonkango dokonhi
^ MoRugereka asi “ezwi lyokomutjima.”
^ Ndi nampo asi “kapi atu zumbanesa ehuguvaro.”
^ Ndi “maheteko.”
^ MoRugereka asi “mukumo.”
