Vakolinte vauvali 6:1-18
6 Ngovarugani kumwe naKarunga, tatu mu korangeda asi mwa ha hepeka nkenda zaKarunga zonene ezi mwa tambura.
2 Yeeyi age kwa tanta asi: “Posiruwo souhunga, ame na mu zuvha ano mezuva lyezoworo ame na mu vatera.” Esi yiso siruwo souhunga. Eli yilyo ezuva lyezoworo.
3 Ose kapi atu pundukisa vantu yipo sirugana setu ngasi dire kuswauka;
4 nye mwankenye eyi ose kuyilikida asi ose vakareli vaKarunga: ose kulididimikira mahepeko nomaudigu gomanene noyiruwo yoyidigu.
5 Ose kututoona, kututura monodorongo, kutuhomokera, ose kwa rugana unene, masiku gamwe kapi ngatu rara ntani ngatu kara nonzara.
6 Ose kuparuka eparu lyokukuhuka, eparu lyetu kwa liza nediwo, ose kulididimikira, ose vantu wombili, kutupitisira mpepo zokupongoka ntani eharo lyetu lyousili.
7 Ose kuuyunga usili, ose kwa huguvara mononkondo daKarunga, ose kwa kwaterera yirwiso youhungami mokuwoko korulyo* noku korumoho.*
8 Ose kutufumadeka ntani kutuswaura, ose kutuuyunga momudona ntani kutupandadeka. Vantu kututara asi ose vapukisi nye ose kuuyunga usili,
9 ngwendi kapi twa divikwa nye Karunga ga tu diva, ngwendi vantu ava va kara pepi nokufa* nye tu vazuni, ngwendi vantu ava ava tengeke* nye kapi ava tu dipaga.
10 Vantu kugazara asi ose vantu woruguwo nye ose nkenye apa kuhafa, awo kugazara asi ose ruhepo nye ose kugava yininke yoyinzi kovantu wovanzi, awo kugazara asi kwato eyi twa kara nayo nye ose kwa kara noyininke yoyinzi.
11 One Vakolinte, ose kwa vyukilira kumutantera, ntani eharo lyetu kweni kwa ligwederera.*
12 Ose kwa mu hara unene nye one kwa tu hara tupu nakauke.
13 Eyi yiyo nina kumutanterera ngwendi vana vange asi none zegurureni unene nomutjima deni.
14 Mwa ha likwatakana* novantu ava va dira kupura. Yeeyi ukwawo musinke wa kara po pokatji kouhungami nokuteza po veta? Ndi elizo musinke lya kara po pokatji kouzera nomundema?
15 Ntani hena, uumwe musinke wa kara po pokatji kaKristusa naBeliyali?* Ndi elikwatakano musinke lya kara po pokatji komupuli* nogu ga dira kupura?
16 Yikarunga yoyimpempa kuvhura yi kare montembeli zaKarunga ndi? Yeeyi ose ntembeli zaKarunga gomunamwenyo, ngamoomu ga yi tanta Karunga asi: “Ame ngani tunga mokatji kawo noku gendagura mokatji kawo, ame ngani kara Karunga gwawo, awo ngava kare vantu vange.”
17 Jehova kwa tanta asi: “‘Tundeni mo mokatji kawo, mu likarere’ ‘ntani mwa ha kwata kweyi yokunyata’ ‘makura ame ngani mu tambure.’”
18 Jehova, Munankondo nadinye kwa tanta asi: “Makura ame ngani kare guhyeni one ngomu kare vana vange wovagara nava wovakadi.”
Nonkango dokonhi
^ Nampo mokurwisa ko.
^ Nampo mokulipoperesa ko.
^ Ndi “ava va fira nomfa.”
^ Ndi “pisura.”
^ MoRugereka asi “kwa zegurura nomutjima detu.”
^ Ndi “mwa ha kara mondjoko zimwe.”
^ Kwa tunda konkango zoRuhebeli ezi azi tanta asi “kutupu sikwafo.” Azo kwa tamba kwaSatana.
^ Ndi “muntu gokulimburukwa.”
