Vakolinte vauvali 7:1-16
7 Vakwetu wokuhara, mokumona asi matumbwidiro aga nyose va ga tumbwidira, tu lizereseni nyamwetu kwanayinye eyi ayi nyateke rutu nompepo noku kondja tu kare tuna pongokerere morwa twa tjira Karunga.
2 Tu peni ko evega monomutjima deni. Ose kwato ogu twa zonena ndi twa rugana yoyidona ndi twa kumbagera yipo asi tu gwanene mo uwa.
3 Kapi nina kuyiuyungira eyi asi ni mu pangure. Yeeyi ame na mu tantera nare asi tu kare nomwenyo ndi tu fe, one kwa kara monomutjima detu.
4 Ame kwa kara nemanguruko lyenene lyokuuyunga none. Ame kumulikangangera unene. Ame kwa hengagwida nge unene, ame kwa kara noruhafo rorunene momaudigu getu nagenye.
5 Apa twa ka sikire moMakedoniya, kapi twa pwizumukire nye ose kwa ligwanekerere nomaudigu gokulisiga-siga, vantu ngava tu rwanesa ntani twa kere nosinka kuhamena nombungakriste.
6 Nye Karunga ogu a hengagwida ava ava dompo nomutjima, kwa tu hengagwidire apa ga ya sikire Titusa,
7 kapisi yeeyi tupu ga ya sikire yiyo ya tu hengagwidire nye hena morwa mwa ya mu hengagwidire. Age kwa tu tanterere omu mwa hara kumona nge, ruguwo rweni ntani sinka* seni kwange, ano eyi kwa hafesere nge unene.
8 Yeeyi nsene asi mbilive zange za mu guvisire, kapi ani yi livere. Nampili nsene asi na yi liverere pomuhowo, ngesi kapi nina kuyilivera hena morwa ayo kwa mu guvisire tupu pokaruwogona.
9 Ngesi ame nina hafa nye kapisi kweyi na mu guvisire nye kweyi mwa guvire mu litezurure. Yeeyi one kwa mu guvisire monkedi ezi ga yi harera Karunga. Eyi yiyo ya dilira kumuretera udona eyi twa mu tantera.
10 Yeeyi kuguva monkedi ezi ga yi harera Karunga kuninkisa muntu a litezurure ano eyi kutwaredesa kezoworo, ayo nokuyilivera si, nye ruguwo rouzuni kutwaredesa konomfa.
11 Ayo ya lilikida nawa-nawa asi one kwa guvire monkedi ezi ga yi harera Karunga, eyi yiyo omu litulire mo unene mokurugana youhunga. One kwa zeresa madina geni, one kwa lizuvhire udona komapuko geni, one kwa tjira Karunga, one kwa litezwilire, one kwa karerere Karunga nomutjima nagunye ntani kwa wapukwilire mapuko geni. Yininke nayinye kwa yi rugene monkedi zongwa mu kohonone po udigu ou.
12 Pokumutjangera, kapi na yi ruganenene morwa ogu ga zona ndi ogu va zonena nye nyone na tjangera yipo ni dive nsene nomu yi likida nawa-nawa kosipara saKarunga asi mwa hara kutupurakena.
13 Eyi yiyo nye ya tu hengagwida.
Nye ose kwa hefe hena unene pokumona ruhafo rwaTitusa morwa namuvenye kwa mu korangedere.
14 One ame kwa mu likangangera kwendi, ano ayo kapi ya fisa nge nomuga, ngwendi moomu tupu nayinye eyi twa mu tanterere ya kere usili, nelikangango lyetu kwaTitusa nalyo kwa kere lyousili.
15 Ntani age kwa mu hara unene, age kudiworoka ulimburukwi weni namuvenye ntani nomu mwa mu tambwire nefumadeko lyenene.
16 Ame nina hafa morwa kuvhura ni* mu huguvare mwanayinye.
