Vakolinte vauvali 8:1-24
8 Vakwetu, tuna hara kumutantera kuhamena nkenda zaKarunga zonene ezi ga likida nombungakriste domoMakedoniya.
2 Apa va kere moudigu ou wa kere eheteko lyenene kwawo, awo kwa hefe unene ntani va geve nampili ngomu va kere moruhepo rorunene.
3 Awo kwa geve paapa va hulira ntani kupitakana omu va vhulira kugava. Ame kuvhura ni yi gavere umbangi,
4 awo kwa tu likwamberere tu va pe mpito zokugava ntani zokulihameka mosirugana sokuvatera vapongoki.
5 Awo kwa rugene kupitakana omu twa yi ndindilire, awo kwa kondjere mokuruganena Hompa nomutjima nagunye ntani kwa tu vaterere kuliza nompango zaKarunga.
6 Eyi yiyo twa korangedere Titusa a manese kupongaika yigava eyi mwa geve.
7 One kuna kurugana nawa moyininke nayinye. Epuro lyeni lina pama. One mwa diva nawa kuuyunga. Ediwo lyeni lina ligwederere. One kulitura mo unene mwankenye eyi omu rugana. One kwa hara wopeke nawa-nawa moomu twa mu hara. None ngano mu twikire kukara neharo eli lyokugava.
8 Eyi kapi nina kuyiuyungira asi ni mu pangere nye nina hara mu dive eharo nelituromo lyovakweneni. Nina hara hena ni dive nsene asi one mwa kara neharo lyousili.
9 Yeeyi one mwa diva nkenda zonene zaHompa gwetu Jesus Kristusa asi nampili ngomu ga kere ngawo, age kwa ya kere hepwere mwarweni, yipo mu ngawopere moruhepo rwendi.
10 Egano lyange lyeli asi one ngomu gwanena mo uwa, morwa mvhura zina ka pita kapi tupu mwa tamekere kupongaika yigava nye hena mwa likidire eharo lyokuyirugana.
11 Maneseni eyi mwa tamekere kurugana. Makura eyi ngomu gava kuliza neyi muna kuvhura kugava ngayi likide asi mwa kara neharo lyokugava.
12 Nsene muntu a gava kutundilira komutjima, Karunga kuyihafera yeeyi age kwa hara asi muntu a gave kuliza neyi ga kara nayo nye kapisi eyi ga dira kukara nayo.
13 Yeeyi kapi nina hara kuyirerupikira wopeke nye one ni yi mu digopekere;
14 one muna kara neyi yoyinzi posiruwo esi, kwafeni ava vana kara neyi yoyisesu yipo asi apa none ngomu kara neyi yoyisesu, ngava mu kwafe yipo ngayi lize.
15 Ngamoomu tupu va yi tjanga asi: “Muntu ogu ga kere neyi yoyinzi kapi ga kere neyi yoyinzi unene ntani muntu ogu ga kere neyi yoyisesu kapi ga kere neyi yoyisesu unene.”
16 Tatu pandura Karunga kweyi Titusa ga kara nosinka kweni ngwendi seesi twa kara naso kweni.
17 Age kapi tupu ga rugene eyi twa mu tantera nye ga kere neharo lyokuyirugana, meharo lyamwene ana kuwiza kweni.
18 Nye tatu mu tumu kumwe nomupuli mukwetu ogu ga divikwa monombungakriste nadinye morwa kuzuvhisa kwendi mbudi zongwa.
19 Nye kapisi yooyo tupu yelike, nye hena nombungakriste kwa mu horowora a ze nose mokugavera yigava eyi twa pongaika yipo yi yererepekere po Hompa noku likida asi twa kara neharo lyokuvatera wopeke.
20 Ose kuyiruganena eyi yipo vantu va dire kutuuyunga momudona monkedi ezi atu gavere yigava eyi yoyinzi.
21 Yeeyi ose ‘kukondja yipo tu hungike mwanayinye, kapisi kosipara saJehova tupu nye hena nokovantu.’
22 Ntani hena, ose kuna kuvatuma kumwe nomupuli mukwetu ogu twa konakona ntani twa dimburura asi ga litura mo moyininke yoyinzi, nye ngesi ta litura mo unene mokumuvatera morwa ga mu huguvara.
23 Nye nsene koveli nava hara kudiva asi yilye Titusa, va tantereni asi age murugani mukwetu ogu na ya mu vatera. Ntani hena, nsene koveli ava nava hara kudiva kuhamena vapuli vakwetu owo, va tantereni asi mbungakriste zina va* tumu ntani awo kuyererepeka Kristusa.
24 Va likideni asi mwa va hara, ntani likideni nombungakriste konda zeyi twa mu likangangerere.
Nonkango dokonhi
^ MoRugereka “va” kuna tamba kovapositoli.
