Vakolinte vauvali 9:1-15
9 Kuhamena sirugana sokuvatera vapongoki, kapisi hepero ni mu tjangere kuhamena yininke eyi,
2 morwa na yi diva asi one mwa kara neharo lyokuvatera. Ame kumulikangangera koVamakedoniya. Ame kwa va tantera asi one ava mwa kara moAkaya kwa liwapaikira mokuvatera mvhura mudima. Eharo lyeni lyenene lyokuvatera, kwa tumangeda wovanzi nawo va kare neharo lyokuvatera.
3 Nye ame tani tumu vapuli vakwetu yipo elikangango lyetu kweni ngali dire kukara lyomawoko-woko ntani yipo mu liwapaikire ngamoomu na yi va tanterere.
4 Nye nsene asi Vamakedoniya ngava wiza kumwe name, tu ya mu gwane one kapi muna liwapaikire, ayo ngayi ya tu fisa nomuga kweyi twa mu likangangerere ntani none ngayi mu fisa nomuga.
5 Yipo nina gazara asi na yi wapa ni tume vapuli vakwetu komeho zosiruwo va ya pongaike yigava yeni, yipo yi dire kumoneka ngwendi asi yigava yeni kuna kuyigava komusininiko, nye kuna kuyigava neharo.
6 Nye kuhamena eyi, tani tanta asi nkenye ogu a kunu mbuto zonsesu, nga zangura yoyisesu nye nkenye ogu a kunu mbuto zonzi, nga zangura yoyinzi.
7 Nkenye ogu a gave moomu ana yi tokora momutjima gwendi, kapisi nomutjimakoka ndi komusininiko, yeeyi Karunga kwa hara ava ava gava neharo.
8 Ntani hena, Karunga ga kara nononkondo dokumulikida nkenda zendi zonene yipo mu dire kuhepa nkenye eyi nye mu kare neyi yoyinzi yipo mu sikise mo nkenye yirugana yoyiwa.
9 (Moomu tupu va yi tjanga asi: “Age kwa gava mauhwi gomanzi,* age kwa gava konohepwe. Uhungami wendi wanarunye.”
10 Karunga ogu a gava neharo mbuto komukuni ntani mboroto kovantu va lye, nga ku pa mbuto noku zi vhukisa yipo ngo kune ntani nga vhukisa muzangu gouhungami woge.)
11 Karunga kumutungika unene yipo mu vhure kugava mononkedi dokulisiga-siga ntani vantu ngava pandura Karunga morwa yigava yeni eyi omu tu pe tu ka gave kwava wopeke.
12 Yigava eyi kapi tupu ngayi vatera vapongoki nye ngayi ninkisa hena vantu wovanzi va pandure unene Karunga.
13 Pokugava yigava eyi, one ngomu likida asi one vantu musinke ntani awo ngava hamberera Karunga morwa one kusikisa mo mbudi zongwa ezi omu zuvhisa kuhamena Kristusa ntani morwa one kugava yigava yeni kwawo ntani kovantu navenye.
14 Awo ngava mu hara noku mu likwamberera po kwaKarunga morwa nkenda zaKarunga zonene ezi za kara mweni.
15 Karunga va mu pandure kouhwi wendi wokudira kuvhura kutanta.
Nonkango dokonhi
^ Ndi “nomutjima nagunye.”
