Mbilive zauvali koVatesaronika 1:1-12
1 Nyame Paurusa naSilivanusa* ntani naTimoteusa tuna kutuma mbilive ezi kombungakriste zomoTesaronika, ezi za kara mouumwe naKarunga Guhyetu ntani naHompa Jesus Kristusa:
2 Karunga Guhya naHompa Jesus Kristusa ngano va mu fire nkenda unene nokumupa mbili.
3 Vakwetu, ose ya tu fira kupandura Karunga nkenye apa mwarweni. Eyi ya wapa morwa epuro lyeni kuna kupama unene ntani eharo lyeni lyokulihara-hara kuna kuligwederera.
4 Eyi yiyo atu mu likangangerere konombungakriste daKarunga morwa epuro nedidimiko lyeni momahepeko nomomaudigu aga muna kuligwanekera* nago.
5 Eyi kulikida asi Karunga kupangura pauhunga, ano eyi kuninkisa Karunga a mu tare asi mwa wapera kuza moUhompa wendi ou muna kuhepera.
6 Mokumona asi Karunga muhungami, age nga tengeka ava vana kumuhepeka.
7 Nye one ava muna kuligwanekera nomaudigu, ngava mu pwizumukisa kumwe nose apa nga horoka Hompa Jesus, a tunde meguru kumwe novaengeli vendi wononkondo
8 momundiro gokuyukuma* a ya tengeke ava va dira kudiva Karunga ntani nava ava dili kulimburukwa kombudi zongwa kuhamena Hompa gwetu Jesus.
9 Hompa gwetu nga pangura vantu owo nokuvazonagura po narunye. Age kapi hena ngava mona ndi a va vatere nononkondo dendi dononene.
10 Apa nga wiza Hompa gwetu va ya mu yererepeke kumwe novapongoki vendi, navenye ava va pura mwendi ngava mu tetuka. None ngomu kara mokatji kawo morwa mwa pura yininke eyi twa mu tantera.
11 Eyi yiyo nye atu mu kanderere po nkenye apa yipo Karunga a mu tare asi mwa wapera eparu eli ga mu zigidira ntani a sikise mo yirugana yoyiwa mweni mononkondo dendi ntani yipo yirugana yeni yemepuro yi tompoke.
12 Eyi ngayi ninkisa edina lyaHompa gwetu Jesus va li yererepeke kupitira mweni ntani none va mu yererepeke mwarwendi morwa nkenda zonene zaKarunga gwetu naHompa Jesus Kristusa.
Nonkango dokonhi
^ Ogu ava tumbura hena asi Sirasa.
^ Ndi “kulididimikira.”
^ Ndi “gokutwera unene.”
