Mbilive zauvali koVatesaronika 2:1-17
2 Vakwetu, kuhamena ekaropo* lyaHompa gwetu Jesus Kristusa ntani nepongaiko lyetu yipo tu ka kare nage, tatu mu hundire
2 asi mwa ha piyagana nsene muntu a mu tantera asi ezuva lyaJehova lina wiza. Mwa ha kara nosinka nampili va tante asi mbudi ezi kuna kutunda kwaKarunga ndi va tante asi kwa zi resa mombilive ezi twa tjanga.
3 Mwa ha pulisira muntu a mu pukise mwankenye nkedi, yeeyi ezuva olyo kapi ngali wiza age murwanesi usili ga hana kuhova kuwiza ntani muntu gokudira kulimburukwa ga hana kuhoroka. Age yige ngava ya zonagura po.
4 Age murwanesi ogu a linenepeke a pitakane nkenye ogu ava tumbura asi karunga ndi nkenye esi ava karere,* makura yiyo a hingire montembeli zaKarunga a limonekese asi age karunga.
5 Tomu diworoka asi apa na kere none ngani mu tantere kuhamena yininke eyi?
6 Ngesi muna diva nye eyi yina kumuninkisa a dire kuhoroka, age nga horoka apa ngasi sika mo siruwo.
7 Muntu ogu gokudira kulimburukwa kuna kurugana yirugana yendi mokahore-hore, dogoro nga dire po ogu a mu kondere.
8 Muntu ogu gokudira kulimburukwa ngava mu horora makura Hompa Jesus nga mu zonagure po nomunku gomokana kendi ntani nga mu hanagura po pekaropo* lyendi.
9 Muntu ogo gokudira kulimburukwa apa nga wiza, nga ya ruganesa nonkondo daSatana a rugane yitetu yoyinzi noyidiviso yoyimpempa ntani noyininke yoyinzi yokutetukisa
10 noudona naunye a kumbagere ava ngava ka zonauka. Awo ngava ka va tengeka pokukavazonagura po morwa kapi va tambwire nokuhara usili ou ngano wa va parwire.
11 Yiyo nye ga va sigilira Karunga gava pukise marongo goyimpempa va pure yimpempa.
12 Age ngava pangura navenye morwa kapi va tambwire usili, nye awo kwa haferere udona.
13 Ose ya tu fira kupandura Karunga mwarweni, vakwetu one ava ga hara Jehova, morwa kutunda ketameko age kwa mu horowora a mu parure pokumupongora nompepo zendi morwa one kwa pura mousili.
14 Age kwa mu zigida yipo a mu parure kupitira mombudi zongwa ezi atu udisa yipo ngomu gwane uyerere waHompa gwetu Jesus Kristusa.
15 Vakwetu, koreni ntani kwaterereni koyininke eyi va mu ronga, yi kare asi yokumutantera ndi yomombilive zetu.
16 Hompa gwetu Jesus Kristusa naKarunga Guhyetu ogu ga tu hara noku tu pa ehengagwido lyanarunye nehuguvaro kupitira monkenda zendi zonene, ngano
17 va hengagwide nomutjima deni nokumupameka* yipo mu rugane nokuuyunga nkenye apa yoyiwa.
