Mbilive zauvali koVatesaronika 3:1-18
3 Mokuhulisa vakwetu, twikireni kutukanderera po yipo nonkango daJehova di lihane usimbu nokudiyererepeka, moomu tupu vana kudiyererepeka mokatji keni.
2 Tu kanderereni po hena asi Karunga a tu popere kovantu wovadona unene, yeeyi kapisi vantu navenye kwa kara nepuro.
3 Nye Hompa kuvhura kumuhuguvara, age nga mu nkondopeka nokumupopera koMudona.*
4 Ntani hena, twa kara nehuguvaro mwaHompa kumuhamena asi one kuna kusikisa mo mapukururo aga twa mu pere ntani ngomu twikira kugasikisa mo.
5 Hompa ngano a vyukise nomutjima deni yipo mu hare Karunga ntani mu kare nedidimiko yipo mu twikire kukwama Kristusa.
6 Ano ngesi vakwetu, tatu mu pukurura medina lyaHompa Jesus Kristusa asi mu lipore ko kovakwetu ava ava dili kulimburukwa ntani ava dili kukwama yininke eyi twa mu* ronga.
7 Yeeyi none nyamweni mwa yi diva omu nomu tu honena, morwa kapi twa kere nonkareso zondona mokatji keni
8 ndi asi tu lye nondya domuntu mawoko-woko.* Nye ose ngatu rugana unene masiku nomutenya, yipo tu dire kukara mudigo kwankenye gumwe gweni.
9 Nampili ngomu twa kara nononkondo dokumupura mu tu vatere, nye ose kapi twa yi rugene morwa kwa here kumutulira po sihonena.
10 Nayene apa twa kere none, ngatu mu tantere asi: “Nkenye ogu ga dira kuhara kurugana, walye a li.”
11 Yeeyi ose kuna kuzuvha asi vamwe mokatji keni kapi ava limburukwa ntani kapi va hara kurugana, nye awo kulitura moyininke ya hana asi yawo.
12 Vantu vangoso tatu va tantere nokuvarondora mwaHompa Jesus Kristusa asi ava rugane awo va hana kulitura moyininke yovantu ntani va lye nondya edi va ruganena vene.
13 One ko vakwetu, walye omu roroka kurugana yoyiwa.
14 Nye nsene pweli ogu ana kudira kulimburukwa kononkango domombilive ezi, mu didilikeni, mu lipore ko kwendi, yipo a life nomuga.
15 Mwa ha mu tara asi nkore, nye twikireni kumupukurura morwa age simpe mupuli mukweni.
16 Hompa gombili ngano a mu pe nkenye apa mbili mwanayinye. Hompa ngano a kare none namuvenye.
17 Makundo aga nyamwange Paurusa nina ga tjanga nokuwoko kwange. Monkedi ezi yimo ani tjanga nombilive dange nadinye.
18 Nkenda zonene zaHompa gwetu Jesus Kristusa zi kare none namuvenye.
