Deuteronomium 10:1-22
10 “Makura Jehova ta tantere nge asi: ‘Liruganena ko mamanya gavali ngwendi gopomuhowo, o wize kwange kondundu ntani wa hepa kuhonga hena sikesa.
2 Ame ngani tjanga pomamanya ogo nonkango edi da monekere pomamanya gopomuhowo aga wa bamagwire ntani wa hepa kugatura mosikesa.’
3 Makura yipo na hongere sikesa sositji somusu ntani tani rugana mamanya gavali ngwendi gopomuhowo, makura yipo na rondere kondundu nomamanya ogo momawoko gange.
4 Makura Jehova yipo ga tjenge pomamanya yipango murongo* eyi ga tjenge pomamanya gopomuhowo. Jehova kwa mu tanterere yipango oyo kupitira momundiro apa mwa pongere kondundu, makura ta yi penge.
5 Yipo na humburukire kondundu, makura tani tura mamanya mosikesa esi na hongere, ngwendi moomu ga pangerere nge Jehova. Mamanya ogo simpe yimo gana kara.
6 “Vaisraeli yipo va tundire moBeroti Bene-jakani va ze koMosera, oko yiko ga ka fililire Arona tava mu vhumbike ano munendi Eliyasara ta mu pinganene mo moupristeli.
7 Makura yipo va zire koGudigoda, ano apa va tundire moGudigoda, tava zi koJotibata sirongo esi sa kara nonomukuro.
8 “Posiruwo oso, Jehova kwa horowere worudi roVarevhi va simbe sikesa saJehova segwanekero, va sikame komeho zaJehova, yipo va mu ruganene ntani va tungike vantu medina lyendi ngwendi moomu vana kuyirugana neina.
9 Eyi yiyo va dilira kuvapa Varevhi upingwa ngwendi vakwawo. Jehova yige upingwa wawo ngwendi moomu ga va tantera Karunga gweni Jehova.
10 Ame kwa ka kere kondundu mazuva 40 nomasiku 40 ngwendi moomu na yi rugene sikando sokuhova ntani Jehova kwa purakenene nge hena. Jehova kapi ga here kumuzonagura po.
11 Makura Jehova yiyo ga tanterere nge asi: ‘Liwapaikira kukatuka o pitisire vantu, yipo va ze va ka guse sirongo esi na tumbwidira ozinyakurwawo asi ngani si va pa.’
12 “Yipo nye, eyi yiyo yelike ana mu harere mu rugane Karunga gweni Jehova one Vaisraeli: mu tjire Karunga gweni Jehova, mu sikise mo noveta dendi nadinye, mu mu hare ntani mu karere Karunga gweni Jehova nomutjima gweni nagunye nomwenyo* gweni nagunye.
13 Mwa hepa hena kusikisa mo yipango yaJehova nonoveta dendi edi nina kumutantera naina, yipo mu gwanene mo uwa wanyamweni.
14 Eguru, lyaKarunga gweni Jehova, kukwatera mo eguru lyekeguru-guru nevhu ntani nanayinye eyi ya kara po.
15 Nye Jehova kwa hederere tupu ozinyakurweni ntani kwa va likidire eharo, makura yiyo ga mu horowora one woruvharo rwawo mokatji kovantu ngwendi moomu muna kara naina.
16 Yipo nye, kuhureni nomutjima deni ntani hagekeni kurunda mutwe.
17 Yeeyi Karunga gweni Jehova ga pitakana vakarunga navenye ntani age mupangeli govahompa navenye. Age Karunga ogu ga zeruka ntani nonkondo. Age va hepa kumutjira vantu nokumufumadeka. Age kapi ga kara nompongo ntani kapi a tambura uhwi,* yipo a dire kupangura pauhunga.
18 Age kupangura nonsigwe novafisavaya vawo pauhunga. Age kwa hara vanayirongo ntani age kuvapa nondya noyidwara.
19 None mwa hepa kuhara vanayirongo, yeeyi none kwa kere vanayirongo mosirongo saEgipite.
20 “Mwa hepa kutjira Karunga gweni Jehova, mu mu karere ntani mu kare pepi nage. One mwa hepa hena kugana medina lyendi.
21 Mwa hepa kumuhamberera, age Karunga gweni ogu ga mu ruganena yininke yoyinene yoyiwa yokutetukisa eyi mwa limonena.
22 Apa va zire ozinyakurweni moEgipite, awo kwa kere tupu 70, nye Karunga gweni Jehova kwa vhukisa sivaro sawo ngwendi nombungururu dekeguru.
Nonkango dokonhi
^ MoRuhebeli asi “nonkango murongo.” Kwa divikwa hena asi Decalogue.
^ Tara koMauzera.
^ Ndi “yimaliwa.”
