Deuteronomium 11:1-32
11 “Mwa hepa kuhara Karunga gweni Jehova nokusikisa mo eyi ana hepa ko kweni pokulimburukwa noveta dendi nonompangera dendi ntani noyipango yendi.
2 Ame nyone nina kuuyungisa, nye kapisi vana veni ava va dira kudiva ndi va mone omu a tengeke Jehova vantu, unene wendi ntani nonkondo dendi dononene.
3 Vana veni kapi va mwene yidiviso yaKarunga ntani neyi ga rugene kwaFarawo hompa gwaEgipite nosirongo sendi nasinye.
4 Awo kapi va mwene eyi ga rugene Karunga vakwayita womoEgipite nononkambe daFarawo ntani noturukara toyita otu ga zuguminine momema gemEfuta lyEgeha apa va mu tjidire. Jehova kwa va zonagwire po navenye.
5 Awo kapi va mwene omu ga mu vaterere Karunga momburundu dogoro mu ya sike kevango eli,
6 ndi eyi ga rugene kwaDatani naAbiramu vana vaEliyaba womorudi rwaRubena. Evhu kwa gagukire, ta li va mini kumwe nomapata gawo nonotende dawo ntani nanayinye eyi va kere nayo nava va va kwatesere ko, awo Vaisraeli navenye kuna kutara.
7 One mwa limonena yitetu nayinye yoyinene eyi ga rugana Jehova.
8 “Yipo nye, mwa hepa kulimburukwa yipango nayinye eyi nina kumupa naina, yipo mu nkondopare mu rute mu ka guse sirongo.
9 Ntani yipo ngomu paruke siruwo sosire mosirongo esi ga tumbwidira Jehova ozinyakurweni noruvharo* rwawo. Aso sirongo esi sa zura masini nousi.
10 “Sirongo esi ngomu ka pinga kapi sa fana ngwendi sirongo saEgipite omu mwa tunda, omu ngomu kunu mbuto ntani ngomu rugana unene mu zi tekere nonompadi* deni ngwendi moomu ngomu yi rugana moyikunino yoyikwahidi.
11 Nye sirongo esi ngomu pinga konyima zokuruta, aso kuna kara sirongo sonondundu nonomuramba ntani mema gamo kutunda komvhura.
12 Karunga gweni Jehova yige a si pakere mbili ntani Jehova kusinomena mvhura mudima.
13 “Nsene mu limburukwa nompangera dange nadinye edi nina kumutantera naina nokuhara Karunga gweni Jehova ntani mu mu karere nomutjima gweni nagunye nomwenyo* gweni nagunye,
14 Ame ngani mu rokesera mvhura mosirongo seni posiruwo sazo, mvhura zokuhova nezi zokuhulilira* ntani one ngomu pongaika mbuto zeni novhinyu zeni zompe ntani nomagadi geni.
15 Ame ngani menesa wayi woyimuna yeni mosirongo ntani one ngomu lya dogoro tomu kuta.
16 Takameseni yipo va dire kumupukisa mu sige Karunga gweni, mu ka karere yikarunga yapeke ntani mu yi nyongamene.
17 Nsene ngomu yi rugana, Jehova nga handuka unene ngwendi mundiro ntani nga ninka eguru li dire kumupa mvhura ntani evhu li dire kumupa muzangu, makura one ngomu dongonoke mo usimbu mosirongo sosiwa esi ana kumupa Jehova.
18 “Mwa hepa kupungura nonkango dange edi monomutjima deni, monondunge deni ntani mwa hepa kudilimanga komawoko geni, yipo mu di diworoke ntani da hepa kukara ngwendi sidiviso poyipara yeni.*
19 Di rongeni vana veni, mu di va tantere nsene membo muna kara ndi morugendo ndi pokurara ndi pokupinduka.
20 Di tjangeni monompatji* domavero geni ntani komarungavero geni,
21 yipo none novana veni ngomu paruke siruwo sosire mosirongo esi ga tumbwidira Jehova ozinyakurweni siruwo nasinye esi ngali kara eguru kontunda zevhu.
22 “Nsene mu limburukwa nawa-nawa veta ezi nina kumupa, mu hare Karunga gweni Jehova nokukwama nompangera dendi ntani mu hedere pepi nage,
23 Jehova nga tjida mo nomuhoko nadinye edi dina kara komeho zeni ntani one ngomu funda nomuhoko dononene ntani dononkondo kumupitakana.
24 Nkenye evango eli ngomu lyata, ngali kara lyeni. Mururani gweni nga gu tundilira komburundu gu ze dogoro koLibanoni ntani kutunda koMukuro gwaEufurata dogoro kEfuta lyokoUtokero.*
25 Kwato ogu nga mu rwanesa. Nkenye oku ngomu za, Karunga gweni Jehova nga ninka nonkore deni di mu tjire ntani di mu kankame moomu ga mu tumbwidira.
26 “Tokoreni eyi nomu horowora po pokatji komatungiko nomaudigu:
27 one ngava mu tungika nsene ngomu limburukwa nompangera daKarunga gweni Jehova edi nina kumutantera naina.
28 Ano one ngava mu finga* nsene kapi ngomu limburukwa nompangera daKarunga gweni Jehova nokusiga eyi nina kumutantera naina, mu ka karere yikarunga eyi mwa dira kudiva.
29 “Apa nga mu twara Karunga gweni Jehova mosirongo esi ngomu pinga, ngomu tungike vantu poNdundu zaGelisimu ntani ngomu finge vantu poNdundu zaEbali.
30 Nondundu edi kwa kara mesinya mwina lyomukuro gwaJorodana koyiha yoUtokero, mosirongo soVakanani ava va tunga moAraba. Ado kwa livyuka naGiligali pepi noyitji yoyinene eyi ya kara pevango eli ava tumbura asi More.*
31 Yeeyi one kuna kuruta mukuro gwaJorodana, mu ka guse sirongo esi ana kumupa Karunga gweni Jehova. Apa ngomu ka si gusa mu tunge mo,
32 mwa hepa kusikisa mo nompangera nonoveta nadinye edi nina kumupa naina.
Nonkango dokonhi
^ MoRuhebeli asi “mbuto.”
^ Kwa tamba kokutekera nonompadi pokuruganesa ehina ndi pokusima nomukanko domema.
^ Tara koMauzera.
^ Ndi “mvhura zontemuna nezi zahaingungura.”
^ MoRuhebeli asi “pokatji komeho geni.”
^ Ndi “doyikuravero.”
^ Kwa tamba Efuta lyEnene ndi Efuta lyoPokatji.
^ Ndi “ngomu ligwanekera nomaudigu.”
^ Ndi nampo asi “yitji yoyinene yaMore.”
