Deuteronomium 12:1-32
12 “Edi kuna kara noveta nonompangera edi mwa hepa kukwama siruwo nasinye esi ngomu paruka mosirongo esi nga mu pa Jehova Karunga gozinyakurweni.
2 Apa ngomu tjida mo nomuhoko, mu guse sirongo sawo, mwa hepa kuzonagura po mavango nagenye aga ngava karere yikarunga yawo, yi kare asi konondundu ndi konondundugona ndi moyitji yoyinene.
3 Mwa hepa kuzonagura po yizambero yawo ntani ngomu bomagure mamanya gawo gokupongoka nokuhwika nongundi dawo dokupongoka.* Mwa hepa kuteta mafano aga va liruganena goyikarunga yawo, yipo ngava dire kudiworoka madina gayo.
4 “Mwa ha karera Karunga gweni Jehova ngwendi moomu adi karere nomuhoko dapeke yikarunga yawo.
5 Nye mwa hepa kukarera Karunga gweni Jehova pokuza kevango eli nga horowera edina lyendi, oku nga tunga mokatji koVaisraeli.
6 Oko yiko ngomu twara nonzambo deni deswakerero, nonzambo deni dapeke, yiumurongo yeni, yigava yeni, nonzambo deni dokusikisa mo mugano, nonzambo demeharo lyeni ntani nombeli donongombe deni nedi doyikombo yeni nedi dononzwi.
7 Ngomu lire nonzambo deni kevango olyo komeho zaJehova kumwe nomapata geni nokuhafera nkenye eyi ngomu rugana, morwa ga mu tungika Karunga gweni Jehova.
8 “Kapisi ngomu rugane nkenye eyi muna kugazara asi youhunga ngwendi moomu tuna kuyirugana naina,
9 yeeyi one kapi muna ka sika simpe mevango lyokupwizumukira eli ana kumupa Karunga gweni Jehova.
10 Apa ngomu ruta mukuro gwaJorodana, mu ka tunge mosirongo esi ana kumupa Karunga gweni Jehova, age nga mu popera kononkore deni edi da mu kundurukida ntani ngomu tunga mombili.
11 Mwa hepa kutwara nayinye eyi nina kumupangera kevango eli nga horowera Jehova edina lyendi: nonzambo deni deswakerero, nonzambo deni dapeke, yiumurongo yeni, yigava yeni ntani nonzambo dokusikisa mo mugano gweni kwaJehova.
12 Ngomu hafe komeho zaKarunga gweni Jehova kumwe novana veni wovagara nava wovakadi novapika veni wovagara nava wovakadi ntani noVarevhi ava va tunga moyitata yeni,* yeeyi awo kapi ngava gwana upingwa ngwendi nyone.
13 Takameseni yipo ngomu dire kugava nonzambo deni deswakerero kwankenye evango eli muna hara.
14 Mwa hepa kugava nonzambo deni deswakerero kevango eli nga horowora Jehova mokatji komuhoko gweni. Kevango olyo yiko ngomu ruganena nayinye eyi nina kumupangera.
15 “Nye nsene muna hara kudipaga sikorama yipo mu lye nyama zaso, kuvhura mu dipage eyi muna hara kuliza nomu ga mu tungika Karunga gweni Jehova moyitata yeni.* Muntu gokunyata nogu gokudira kunyata kuvhura a lye nyama ozo ngwendi moomu ava li mpara ndi mpengu.
16 Nye kapisi ngomu lye honde, mwa hepa kuzitjisira pevhu ngwendi mema.
17 One kapi ngava mu pulisira mu lye moyitata yeni* yiumurongo yombuto zeni, vhinyu zeni zompe, magadi geni ndi nombeli donongombe deni, doyikombo nedi dononzwi ntani nononzambo deni dokusikisa mo mugano nononzambo demeharo lyeni ndi yigava yeni.
18 Ngomu lire yininke eyi komeho zaKarunga gweni Jehova kumwe novana veni wovagara nava wovakadi novapika veni wovagara nava wovakadi ntani noVarevhi ava va tunga moyitata yeni.* Ayo mwa hepa kuyilira kevango eli nga horowora Jehova ntani ngomu hafe komeho zaKarunga gweni Jehova mwankenye eyi ngomu rugana.
19 Kapisi ngomu divare kupakera mbili Varevhi siruwo nasinye esi ngomu tunga mosirongo seni.
20 “Apa nga nenepeka sirongo seni Karunga gweni Jehova ngwendi moomu ga yi mu tumbwidira, makura mu litantere asi: ‘Nina hara kulya nyama,’ one kuvhura ngomu lye nyama nkenye apa muna zi harere.
21 Nsene evango eli nga horowera Karunga gweni Jehova edina lyendi ngali kara ure none, kuvhura ngomu dipage nongombe deni dimwe ndi yikombo nononzwi deni dimwe edi ga mu pa Jehova ngamoomu nayi mu pangera ntani ngomu lire nyama moyitata yeni* nkenye apa ngomu harera.
22 Kuvhura ngomu zi lye ngwendi moomu omu li mpara ntani mpengu. Muntu gokunyata nogu gokudira kunyata kuvhura nga lye ko.
23 Nye kapisi ngomu lye honde, yeeyi honde yilyo eparu.* Yipo nye, kapisi mu lye nyama ezi zina kara nohonde.
24 Kapisi ngomu zi lye, nye mwa hepa kuzitjisira pevhu ngwendi mema.
25 Kapisi ngomu zi lye, yipo ngayi mu tompoke kumwe novana veni, yeeyi one kuna kurugana yininke eyi ya hungama kosipara saJehova.
26 Apa ngomu za kevango eli nga horowora Jehova, mwa hepa kusimba tupu yininke yeni yokupongoka ntani nononzambo deni dokusikisa mo mugano.
27 Kevango olyo yiko ngomu ka gava nonzambo deni deswakerero ndi nyama nohonde posizambero saKarunga gweni Jehova. Honde zononzambo deni, mwa hepa kuzitjisira kosizambero saKarunga gweni Jehova, ano nyama kuvhura ngomu zi lye.
28 “Mwa hepa kulimburukwa nayinye eyi nina kumupangera, yipo ngayi mu tompoke nkenye apa kumwe novana veni, morwa one kuna kurugana yininke yoyiwa ntani youhunga kosipara saKarunga gweni Jehova.
29 “Karunga gweni Jehova nga zonagura po nomuhoko edi ngomu tjida mo mosirongo ntani one ngomu tunga mo.
30 Nye konyima zapa nga di zonagura po, takameseni yipo ngomu dire kuvahonena. Kapisi ngomu lipure asi: ‘Nomuhoko edi ngapi ngadi karere yikarunga yawo nose tu va honene?’
31 Kapisi ngomu rugane yininke eyi kwaKarunga gweni Jehova, yeeyi nomuhoko odo kurugana yininke yokunyata eyi ga nyenga Jehova, kukwatera mo kuzamba vana vawo wovagara nava wovakadi koyikarunga yawo.
32 Mwa hepa kusikisa mo nayinye eyi nina kumutantera, kapisi ngomu gwede ko ndi mu hore ko.
Nonkango dokonhi
^ Tara koMauzera.
^ MoRuhebeli asi “momarungavero geni.”
^ MoRuhebeli asi “momarungavero geni.”
^ MoRuhebeli asi “momarungavero geni.”
^ MoRuhebeli asi “momarungavero geni.”
^ MoRuhebeli asi “momarungavero geni.”
^ Ndi “mwenyo.”
