Deuteronomium 13:1-18
-
Omu nava tekura varwanesi (1-18)
13 “Nsene muporofete ndi ogu a faturura nonzodi a wiza mokatji keni, a mu tantere yidiviso ndi eyi ngayi horoka komeho,
2 makura yi sike mo eyi ga tente ntani a mu tantere mu kwame yikarunga yapeke eyi mwa dira kudiva mu yi karere,
3 kapisi ngomu purakene nonkango domuporofete ogo ndi ogu a faturura nonzodi. Karunga gweni Jehova kuna kumuheteka yipo a dive nsene mwa hara Karunga gweni Jehova nomutjima gweni nagunye nomwenyo* gweni nagunye.
4 Mwa hepa kukwama Karunga gweni Jehova noku mu tjira ntani mwa hepa kusikisa mo yipango yendi nokupurakena kezwi lyendi. Age yige nomu karera ntani yige nomu hedera pepi.
5 Mwa hepa kudipaga muporofete ogo ndi ogu a faturura nonzodi morwa age kuna kuninkisa vantu va rwanese Karunga gweni Jehova, ogu ga mu gusa mosirongo saEgipite a mu mangurure moupika. Muntu ogo kuna hara mu dire kulimburukwa eyi ga mu tantera Karunga gweni Jehova. Mwa hepa kugusa mo yininke yoyidona mokatji keni.
6 “Nsene mumbyoge gomugara ndi mukuroge gomugara mwene-mwene ndi munoge ndi mukadoge ogu wa hara ndi mukweni gomunene, a ku tantera mokahore-hore asi: ‘Tu ze tu ka karere yikarunga yapeke,’ yikarunga eyi mwa dira kudiva ntani eyi va dilire kudiva ozinyakurweni,
7 eyi ava karere vantu ava va mu kundurukida, yi kare asi awo kwa kara ure ndi pepi mosirongo seni,
8 kapisi o yi rugane ndi o mu purakene ndi o mu fire nkenda ndi o mu popere.
9 Nye wa hepa kumudipaga. Nyove no hova kumuzuguma emanya o mu dipage, konyima ntani nava mu veta vapeke.
10 Mwa hepa kumudipaga nomamanya, morwa age kuna hara mu hageke kukarera Karunga gweni Jehova, ogu ga mu gusa mosirongo saEgipite, omu mwa kere vapika.
11 Ano apa ngava yi zuvha Vaisraeli navenye ngava tjira ntani kapi ngava rugana hena yininke yoyidona ngwendi yeyi mokatji keni.
12 “Apa ngomu tunga moyitata eyi ana kumupa Karunga gweni Jehova, nsene ngomu zuvha asi
13 poveli vagara wokudira mulyo ava vana kuninkisa vantu va karere yikarunga yapeke eyi mwa dira kudiva, pokutanta asi: “Tuzeni tu ka karere yikarunga yapeke,”
14 mwa hepa kukonakona yininke oyo nokupura vapeke. Ano nsene asi yininke oyo yokunyata sili kuna kuhoroka mokatji keni,
15 mwa hepa kudipaga vantu navenye ava va kara mositata oso. Mwa hepa hena kuzonagura yininke nayinye eyi ya kara mositata oso, kukwatera mo yimuna yamo.
16 Ngomu guse emona nalinye lyomositata oso mu ka li ture pokatji kositata makura ngomu hwike sitata oso. Emona olyo ngali kara ngwendi nzambo zeswakerero zaKarunga gweni Jehova. Sitata oso nga si kara ndambo zomamanya dogoro narunye ntani kapisi ngava si tungurure.
17 Kapisi ngomu guse po poyininke eyi ngava zonagura, yipo Karunga gweni Jehova nga dire kumuhandukira nye nga mu likide nkenda ntani nga mu vhukise ngwendi moomu ga tumbwidilire ozinyakurweni.
18 Mwa hepa kulimburukwa* Karunga gweni Jehova pokusikisa mo yipango eyi nina kumutantera naina, yipo ngomu rugane yininke youhunga komeho zaKarunga gweni Jehova.
