Deuteronomium 14:1-29
14 “One vana vaKarunga gweni Jehova. Mwa ha likekagura ndi mu kurure nonkope* deni morwa muntu ana dogoroka.
2 Yeeyi one mwa pongoka kwaKarunga gweni Jehova ntani Jehova kwa mu horowora mokatji kovantu navenye vepevhu, yipo mu kare vantu vendi ndi emona lyendi lyokulikarera.
3 “Mwa ha lya nkenye yininke yokunyata.
4 Eyi yiyo yikorama nomu lya: ngombe, nzwi, sikombo,
5 mpengu, mpara gomununu, mpengu gorudi rwapeke, sikombo somowiza, mpara, nzwi zomowiza ntani nzwi ezi za kara konondundu.
6 Kuvhura mu lye nkenye sikorama esi sa kara nomakondo gokupanuka ntani aso kuliwoyonga.*
7 Nye kapisi ngomu lye yikorama eyi yina kukwama ko, eyi ayi liwoyonga ndi eyi ya kara nomakondo gokupanuka: ngameru, ndimba ntani ndimba gomomamanya.* Ayo kuliwoyonga nye kapi ya kara nomakondo gokupanuka. Mwa hepa kuyitara asi kapi ya kuhuka.
8 Singuru naso mwa hepa kusitara asi kapi sa kuhuka morwa sa kara nomakondo gokupanuka nye aso kapi asi liwoyonga. Mwa ha lya yikorama eyi ndi mu yi kwate nsene yina fu.
9 “Eyi yiyo yinamwenyo eyi ya kara momema eyi nomu lya: Kuvhura mu lye nkenye eyi ya kara nonongande.
10 Nye kapisi ngomu lye nkenye eyi ya dira kukara nonongande. Mwa hepa kuyitara asi kapi ya kuhuka.
11 “Kuvhura mu lye nkenye sidira sokukuhuka.
12 Nye kapisi ngomu lye yidira eyi: ekangakodi, ekuvi, ekuvi lyesovagani,
13 siyimbi gomugeha nogu gomusovagani ntani yiyimbi yapeke,
14 makorova gokulisiga-siga,
15 mpo, kakuru, sidira sekefuta,* vakakodi wokulisiga-siga,
16 kakuru gomununu, kakuru gomatwi gomare, sidira esi asi zogo momema,*
17 sidira somurungu gomure,* ekuvi, nkororo,
18 kandjendje, vahakaruu wokulisiga-siga, nduranganga ntani kafukufuku.
19 Yinamwenyo nayinye yoyinunu* eyi ya kara nomavava, mwa hepa kuyitara asi kapi ya kuhuka. Ayo kapisi ngomu yi lye.
20 Nkenye yinamwenyo yokukuhuka eyi ayi tuka, kuvhura ngomu yi lye.
21 “Kapisi ngomu lye nkenye sikorama esi vana gwana aso sina fu. Aso kuvhura mu si gave kovanayirongo ava va tunga moyitata yeni,* ndi kuvhura mu si va randese. Awo kuvhura va si lye. One vantu wokupongoka kwaKarunga gweni Jehova.
“Nokutereka si nyama zosikombogona momasini gazinyaso.
22 “Mwa hepa kugava yiumurongo yombuto ezi ngomu zangura momapya geni nkenye mvhura.
23 Mwa hepa kulira yiumurongo yombuto zeni novhinyu zeni zompe nomagadi geni nonombeli deni donongombe nedi dononzwi noyikombo, komeho zaKarunga gweni Jehova kevango eli nga horowera Karunga edina lyendi, yipo ngomu lironge kutjira Karunga gweni Jehova nkenye apa.
24 “Nye nsene evango eli nga horowera Jehova edina lyendi ngali kara ure none ntani ngayi mu gusa siruwo kukasika ko morwa Jehova ga mu tungika unene ntani kapi mwa kuvhura kusimba yininke nayinye oyo,
25 kuvhura ngomu randese yininke oyo makura ngomu simbe yimaliwa oyo kevango eli nga horowora Karunga gweni Jehova.
26 Yimaliwa oyo kuvhura ngomu yi ruganese mokuranda nkenye eyi muna hara, yi kare asi nongombe, nonzwi, yikombo, vhinyu ntani marovhu gapeke ndi nkenye eyi muna hara. Makura ngomu yi lye komeho zaKarunga gweni Jehova mu hafe kumwe nomapata geni.
27 Kapisi ngomu divare kupakera mbili Varevhi ava va tunga moyitata yeni, yeeyi awo kapi va gwana upingwa ngwendi nyone.
28 “Kouhura wankenye mvhura zautatu, mwa hepa kureta yiumurongo yomuzangu gweni gomomvhura zautatu mu gu tware moyitata yeni.
29 Makura Varevhi ava va dira kugwana upingwa ngwendi nyone, vanayirongo, nonsigwe ntani vafisavayavawo ava va tunga moyitata yeni ngava wize va ya lye dogoro tava kuta, yipo Karunga gweni Jehova nga mu tungike mwanayinye eyi ngomu rugana.
Nonkango dokonhi
^ Ndi “mu kurure nohuki dopoyipara yeni.”
^ Ndi “aso kutakina nondya daso yikando yivali.”
^ Sikorama esi sa fana ngwendi ndimba, aso kwa tunga momamanya ntani kapi sa kara nomusira.
^ MoRuingilisa asi gull.
^ MoRuingilisa asi swan.
^ MoRuingilisa asi pelican.
^ Ndi “yimbumburu.”
^ MoRuhebeli asi “momarungavero geni.”
