Deuteronomium 15:1-23
15 “Kouhura wankenye mvhura zauntambali, mwa hepa kugusira po vakweni makongo gawo.
2 Ngesi yimo ngomu yi rugana: Nkenye ogu ga korotesa musinda gwendi ga hepa kumugusira po eyi ga mu korota. Age kapisi a pure musinda gwendi ndi Muisraeli mukwawo a mu fute, yeeyi vantu ngava va divisa yipo va gusire po vakwawo makongo mokufumadeka Jehova.
3 Kuvhura ngomu pure vanayirongo va fute makongo gawo, nye mwa hepa kugusira po Vaisraeli vakweni nkenye eyi va mu korota.
4 Kwato ogu nga kara noruhepo mokatji keni, yeeyi Jehova nga mu tungika mosirongo esi ana kumupa Karunga gweni Jehova ngoupingwa.
5 Nye eyi ngayi horoka tupu nsene mu purakena kezwi lyaKarunga gweni Jehova nokusikisa mo nompangera dendi nadinye edi nina kumupa naina.
6 Karunga gweni Jehova nga mu tungika ngwendi moomu ga mu tumbwidira. One ngomu korotesa yimaliwa nomuhoko dononzi nye one kapi ngomu korota. One ngomu pangera nomuhoko dononzi, nye ado kapi ngadi mu pangera.
7 “Nsene Muisraeli mukweni ru mu gwana ruhepo ntani age kwa tunga mositata simwe somosirongo esi ana kumupa Karunga gweni Jehova, kapisi ngomu kukutike nomutjima deni ndi mu zumine Muisraeli mukweni goruhepo.
8 Nye one mwa hepa kukara nougavi ntani mwa hepa kumukorotesa nkenye eyi ana hepa ndi ana dili kukara nayo.
9 Takameseni yipo ngomu dire kugazara monomutjima deni asi: ‘Mvhura zauntambali zokugusira po makongo ntaantani zi sike,’ makura yi mu kondere kugava koVaisraeli vakweni woruhepo. Nsene va mu tanta kwaJehova, one ngomu kara nounzoni.
10 Mwa hepa kumuvatera nomutjima nagunye nye kapisi komusininiko. Eyi yiyo nga mu tungikira Karunga gweni Jehova mwankenye eyi ngomu rugana.
11 Mosirongo seni nga mu kara nkenye apa vantu woruhepo, eyi yiyo nina kumutanterera asi: ‘Mwa hepa kukara nougavi kovantu woruhepo ava va tunga mosirongo seni.’
12 “Nsene ngo randa Muhebeli mukweni gomugara ndi gomukadi ntani age ga kuruganena nomvhura ntazimwe, momvhura zauntambali wa hepa kumumangurura a ze.
13 Ntani nsene to mu mangurura, kapisi o mu sige a ze mawoko-woko.
14 Wa hepa kumupa ko yikombo nononzwi doge, nombuto zoge ntani nomagadi goge novhinyu zoge. Nove wa hepa kumupa kuliza nomu ga ku tungika Karunga goge Jehova.
15 Diworokeni asi one kwa kere vapika mosirongo saEgipite makura yiyo ga mu zowere Karunga gweni Jehova. Eyi yiyo nina kumutanterera mu rugane yininke eyi.
16 “Nye nsene a ku tantera asi kapi ana hara kukusiga, morwa age ga kuhara nepata lyoge ntani age kwa hafera kukuruganena,
17 ngomu tware kevero o ka tomone etwi lyendi nontungo, ano age nga kara mupika goge eparu lyendi mudima. Mupika goge gomukadi nage wa hepa kumurugana monkedi zokulifana.
18 Wa ha lizuvha udona apa ngomu mangurura, yeeyi yininke eyi ga kuruganena monomvhura ntazimwe ayo ya pitakana yikando yivali neyi na rugana murugani ogu ava futu ntani Jehova ga kutungika mwanayinye eyi ga kuruganena.
19 “Mwa hepa kupongora nombeli donongombe* deni ntani nedi doyikombo nononzwi kwaKarunga gweni Jehova. Kapisi ngomu ruganese nombeli donongombe deni ndi mu kurure nombeli dononzwi deni.
20 Ngomu di lire kumwe nomapata geni komeho zaJehova nkenye mvhura kevango eli nga horowora Jehova.
21 Nye nsene asi nombeli odo kuhunyangera ndi kwa twika ndi kwa kara nourema wapeke, kapisi ngomu di zambe kwaKarunga gweni Jehova.
22 Mwa hepa kudilira moyitata yeni* kumwe novantu wokukuhuka nava wokudira kukuhuka, ngwendi moomu omu li mpara ndi mpengu.
23 Nye kapisi ngomu lye honde zado, azo mwa hepa kuzitjisira pevhu ngwendi mema.
