Deuteronomium 16:1-22
16 “Mwa hepa kudiworoka asi kwedi kwaAbibu* mulyo ntani ngomu danene Karunga gweni Jehova sipito soPaska mokwedi oko, yeeyi Karunga gweni Jehova kwa mu gusire moEgipite masiku mokwedi kwaAbibu.
2 Mwa hepa kugava simuna sonzambo zoPaska kwaKarunga gweni Jehova kevango eli nga horowera Jehova edina lyendi.
3 Kapisi ngomu lye nzambo ozo kumwe noyininke yokuhaha ano mazuva ntambali ngomu lye mboroto zokudira yihaheso ndi mboroto zomaudigu, yeeyi one kwa gendererere kutunda moEgipite. Ngomu rugane yininke eyi yipo ngomu diworoke ezuva eli mwa tundire moEgipite eparu lyeni nalinye.
4 Momazuva nagenye ntambali mosirongo seni kapisi nga mu kare yininke yokuhaha eyi va duva, ndi mu sige nyama ezi ngomu zamba kongurova mezuva lyokuhova zi rare dogoro ngurangura ezuva lyokukwama ko.
5 Kapisi ngomu gave nzambo zoPaska mwankenye sitata esi ana kumupa Karunga gweni Jehova.
6 Nye one mwa hepa kuyiruganena kevango eli nga horowera Karunga gweni Jehova edina lyendi. Ngomu gave nzambo zoPaska komeho li ka toke ezuva, posiruwo esi mwa tundire moEgipite.
7 Ngomu zi terekere mu zi lire kevango eli nga horowora Karunga gweni Jehova, ano kongurangura kuvhura ngomu tengure konotende deni.
8 Ngomu lye mboroto zokudira yihaheso mazuva ntazimwe, ano mezuva lyauntambali ngomu ponge mu karere Karunga gweni Jehova. Kapisi ngomu rugane nkenye yirugana.
9 “Mwa hepa kuvarura yivike ntambali kutunda apa ngomu tameka kuteza mbuto zeni momapya.
10 Konyima, ngomu danene sipito soyivike Karunga gweni Jehova nononzambo demeharo lyeni. Mwa hepa kudigava kuliza nomu ga mu tungika Karunga gweni Jehova.
11 Ngomu hafe komeho zaKarunga gweni Jehova kevango eli nga horowera Karunga gweni Jehova edina lyendi kumwe novana veni wovagara nava wovakadi novapika veni wovagara nava wovakadi noVarevhi ava va tunga moyitata yeni* novanayirongo nononsigwe ntani novafisavayavawo ava va tunga mokatji keni.
12 Diworokeni asi one kwa kere vapika moEgipite, yipo nye, sikiseni mo nompangera edi.
13 “Mwa hepa kudana sipito soyikorogo* mazuva ntambali, apa ngomu pongaika mbuto zoporupare nomagadi geni ntani novhinyu zeni.
14 Ngomu hafe posipito oso kumwe novana veni wovagara nava wovakadi novapika veni wovagara nava wovakadi noVarevhi novanayirongo nononsigwe ntani novafisavayavawo ava va tunga moyitata yeni.
15 Ngomu danene Karunga gweni Jehova sipito oso mazuva ntambali kevango eli nga horowora Jehova, yeeyi Karunga gweni Jehova nga tungika muzangu gweni nagunye nanayinye eyi ngomu rugana ntani one ngomu hafa.
16 “Vagara navenye va hepa kuza komeho zaKarunga gweni Jehova yikando eyi yitatu momvhura, kevango eli nga horowora: posipito sonomboroto dokudira yihaheso, posipito soyivike ntani posipito soyikorogo.* Kwato ogu nga za komeho zaJehova mawoko-woko.
17 Nkenye ogu ga hepa kureta uhwi kuliza nomu ga mu tungika Karunga gweni Jehova.
18 “Mwa hepa kuhorowora vapanguli ntani vapitisili vankenye rudi moyitata* nayinye eyi ana kumupa Karunga gweni Jehova. Awo va hepa kupangura vantu mouhunga.
19 Mwa ha fukira nsene tomu pangura ndi mu kare nompongo ndi mu tambure uhwi,* yeeyi awo kuvhura kuninkisa muntu gonondunge ndi muntu gomuhungami a dire kupangura pauhunga.
20 Mwa hepa kurugana youhunga, yipo ngomu twikire kuparuka ntani ngomu guse sirongo esi ana kumupa Karunga gweni Jehova.
21 “Kapisi ngomu tapeke sitji pepi nosizambero saKarunga gweni Jehova, yipo mu si karere.
22 “Kapisi ngomu liruganene emanya lyokupongoka, Karunga gweni Jehova kwa yi nyenga.
Nonkango dokonhi
^ Tara App. B15.
^ MoRuhebeli asi “momarungavero geni.”
^ Ndi “mataratara”
^ Ndi “mataratara.”
^ MoRuhebeli asi “momarungavero geni nagenye.”
^ Ndi “yimaliwa.”
