Deuteronomium 17:1-20
17 “Kapisi ngomu zambe kwaKarunga gweni Jehova nzwi ndi ntwedu ezi za kara nourema, yeeyi Karunga gweni Jehova kwa yi nyenga.
2 “Nsene mugara ndi mukadi ogu nga tunga moyitata eyi ana kumupa Karunga gweni Jehova, a rugana yininke yoyidona kosipara saJehova makura a teze po egwanekero* lyaKarunga,
3 pokukarera nokutongamena yikarunga yapeke ndi ezuva ndi kwedi ndi nombungururu, yininke eyi na dira kumupangera,
4 apa ngomu yi zuvha, mwa hepa kuyikonakona nawa. Ano nsene asi yininke oyo yoyidona kwa horoka moIsraeli,
5 mwa hepa kupwagesa mugara ndi mukadi ogu ga rugana yininke yoyidona ponze zositata. Muntu ogo va hepa kumudipaga nomamanya.
6 Age ngava mu dipaga tupu nsene pwa kara nombangi mbali ndi ntatu. Nye kapisi va mu dipage nsene mbangi zimwe tupu zina kara po.
7 Nombangi odo yido nadi hova kumuzuguma mamanya va mu dipage, ano konyima ntani nava kwama ko vantu vapeke. Mwa hepa kugusa mo yininke yoyidona mokatji keni.
8 “Nsene moyitata yeni mu horoka udigu ou muna kudira kuvhura kupangura, pasihonena, muntu ana dipaga mukwawo ndi gumwe ana reta mukwawo kompanguro ndi ana lihameke moyirugana yonyanya ndi maudigu hena gapeke, mwa hepa kuza kevango eli nga horowora Jehova.
9 Mwa hepa kutwara udigu owo kovapristeli woVarevhi ntani komupanguli goposiruwo oso, makura awo ngava mu tantera eyi ngomu rugana.
10 Makura ngomu rugane eyi ngava ka mu tantera vantu ava va kara kevango eli nga horowora Jehova. Ngomu rugane nayinye kuliza nomu ngava yi mu tantera.
11 Mwa hepa kusikisa mo veta ezi ngava mu pa ntani neyi ngava mu tantera. Ngomu sikise mo nayinye eyi ngava mu tantera.
12 Muntu ogu nga linenepeka, a dire kupurakena komupristeli ogu a ruganene Karunga gweni Jehova ndi komupanguli, va hepa kumudipaga. Mwa hepa kugusa mo yininke yoyidona moIsraeli.
13 Apa ngava yi zuvha vantu navenye , ngava kara nowoma ntani kapi ngava linenepeka hena.
14 “Apa ngomu za mu ka tunge mosirongo esi ana kumupa Karunga gweni Jehova, nsene ngomu tanta asi: ‘Tu horoworeni hompa a tu pangere ngwendi nomuhoko dapeke edi da tu kundurukida,’
15 nsene yiyo muna hara, ngomu horowore hompa ogu nga horowora Karunga gweni Jehova ntani ngomu horowore hompa mokatji koVaisraeli vakweni. Kapisi ngomu horowore hompa gomunayirongo.
16 Nye hompa ogo, kapisi nga lipongaikire nonkambe dononzi ndi a tantere vantu va tengure koEgipite va ka simbe ko nonkambe dimwe, morwa Jehova kwa mu tantera one Vaisraeli asi: ‘Kapisi ngomu tengure koEgipite.’
17 Age hena kapisi nga kware vakadi wovanzi, yipo ngava dire kumupukisa ntani kapisi nga lipongaikire ngorodo ndi siliveli zonzi.
18 Apa nga tameka kupangera, age ga hepa kutjangurura mobuke* zendi Veta, ezi va pungura vapristeli woVarevhi.
19 “Age ga hepa kukara nobuke ozo ntani ga hepa kuziresa nkenye ezuva eparu lyendi nalinye, yipo nga lironge kutjira Karunga gwendi Jehova ntani a sikise mo nayinye eyi va tjanga moVeta.
20 Eyi ngayi mu vatera a dire kulinenepeka a pitakane Vaisraeli vakwawo ntani a sikise mo nompangera nadinye daKarunga, makura nga pangere novana vendi siruwo sosire mokatji koVaisraeli.
