Deuteronomium 18:1-22
18 “Vapristeli woVarevhi norudi narunye roVarevhi kapi ngava gwana upingwa mokatji koVaisraeli vakwawo. Awo ngava lya nonzambo daJehova dokuhwika edi da hamena kwaKarunga.
2 Awo kapi ngava va pa upingwa mokatji koVaisraeli vakwawo, Jehova yige upingwa wawo ngwendi moomu ga yi va tantera.
3 “Eyi yiyo ngava gava vantu kovapristeli: Nkenye ogu nga gava nzambo zongombe ndi zonzwi, ga hepa kugava epepe nompanda ntani noyipumba kovapristeli.
4 Mwa hepa kuvapa hena muzangu gweni gokuhova, vhinyu zeni zompe, magadi geni ntani nonohuki edi ngomu hova kukurura kononzwi deni.
5 Karunga gweni Jehova kwa horowora Revhi novana vendi mokatji komarudi geni, yipo nga ruganene Jehova nkenye apa.
6 “Nsene Murevhi a tunda mositata seni simwe omu ga tunga morwa ana hara kuza kevango eli ga horowora Jehova,*
7 age kuvhura a ka ruganene Karunga gwendi Jehova ngwendi Varevhi vakwawo ava ava rugana komeho zaJehova kevango olyo.
8 Nampili ngomu ga gwana yimaliwa morwa upingwa wendi ou ga randesa, age nga gwana nondya ngwendi vakwawo.
9 “Apa ngomu za mosirongo esi ana kumupa Karunga gweni Jehova, kapisi ngomu honene yirugana yoyidona eyi adi rugana nomuhoko odo.
10 Kapisi ngomu pitise vana veni wogara ndi wovakadi momundiro ndi mu zanekede ndi mu lihameke moumpure ndi mu papare yidiviso ndi mu lihameke mourodi,
11 ndi mu roge vakweni ndi mu ze kovantu ava ava uyunga novadimu ndi kogu a pumbu ndi a uyunga novafe.
12 Yeeyi Jehova kwa nyenga vantu ava ava rugana yininke eyi yokunyata ntani eyi yiyo ana kutjidira Karunga gweni Jehova nomuhoko edi komeho zeni.
13 Mwa hepa kukuhuka kosipara saKarunga gweni Jehova.
14 “Yeeyi nomuhoko edi muna kutjida mosirongo kupurakena konompure nava ava zanekeda, nye Karunga gweni Jehova kapi ga mu pulisira mu rugane yininke yokufana ngesi.
15 Karunga gweni Jehova nga horowora mokatji keni muporofete ngwendi nyame. Mwa hepa kumupurakena.
16 Jehova nga rugana yininke eyi morwa apa mwa pongere momukunda gwaHoreba, one kwa tente asi: ‘Kapi tuna hara kupurakena kezwi lyaKarunga gwetu Jehova ndi tu mone mundiro gomunene, yeeyi kuvhura tu fe.’
17 Makura Jehova yipo ga tanterere nge asi: ‘Name nina yi kwatesa ko eyi vana tanta.
18 Ame ngani horowora muporofete mokatji kawo ngwendi nyove. Ame ngani mu tantera eyi nga uyunga ntani age nga va tantera nayinye eyi ngani mu tantera.
19 Ame ngani futisa muntu ogu nga dira kupurakena kononkango dange edi nga uyunga muporofete ogo.
20 “‘Nkenye muporofete ogu nga uyunga kupitira medina lyange yininke eyi na dira kumutantera ndi a uyunge kupitira medina lyoyikarunga yapeke, va hepa kumudipaga.
21 Nye nsene kuna kulipura asi: “Ngapi omu ngatu yi diva asi Jehova kapisi yige ana yi mu tantere?”
22 Muporofete ogu nga uyunga kupitira medina lyaJehova makura nonkango dendi di dire kusika mo, ayo ngayi likida asi Jehova kapisi yige ana mu tantere nonkango odo. Muporofete ogo kwa uyunga yamwene, yipo nye, kapisi ngomu mu tjire.’
Nonkango dokonhi
^ Kwa tamba kevango eli ga horowora Jehova oku nava mu karera.
