Deuteronomium 19:1-21
19 “Karunga gweni Jehova nga zonagura nomuhoko domosirongo esi ana kumupa Jehova. Apa ngomu funda nomuhoko odo nokutunga moyitata yawo nomomambo gawo,
2 ngomu horowore yitata yitatu eyi ya kara mosirongo esi ana kumupa Karunga gweni Jehova.
3 Ngomu gaunune sirongo esi ana kumupa Karunga gweni Jehova momaruha gatatu ntani ngomu wapaike yitaura, yipo muntu ogu nga dipaga mukwawo nga dukire mwasimwe soyitata oyo.
4 “Eyi yiyo na rugana muntu ogu ana dipaga mukwawo yipo va dire kumudipaga: Nsene age kuna dipaga mukwawo momponyo ntani kapi ga mu nyenga,
5 pasihonena, age kuna zi namukwawo mowiza a ka tjave yitare, ano apa ana zerura ekuva a tete sitji makura mutwe gekuva yiyo guna zupuka ko gu ka toone mukwawo makura yiyo ana fu, muntu ogo ga hepa kudukira mwasimwe soyitata oyo, yipo a paruke.
6 Nye nsene sitata oso si kara ure, muntu ogo ana hara kumutengwida kuwoko kuvhura nga mu tjide dogoro a ka mu gwane morwa ana handuka makura a mu dipage. Nye age kapi ana wapere kumudipaga morwa kapi ga nyenga mukwawo.
7 Eyi yiyo nina kumutanterera mu horowore yitata yitatu.
8 “Karunga gweni Jehova nga nenepeka sirongo seni ngwendi moomu ga tumbwidira ozinyakurweni ntani nga mu pa sirongo esi ga va tumbwidira.
9 Nye mokuninka asi yi horoke yininke eyi, mwa hepa kusikisa mo nompangera nadinye edi nina kumutantera naina. Eyi kutanta asi mwa hepa kuhara Karunga gweni Jehova nokumulimburukwa nkenye apa. Apa ngava nenepeka sirongo seni, ngomu gwede ko hena yitata yitatu yorugami.
10 Makura mosirongo esi ana kumupa Karunga gweni Jehova kapi ngava dipagera mo muntu ga hana unzoni ntani kapi ngomu kara nousima wedipago.
11 “Nye nsene muntu kwa nyenga mukwawo ntani age kwa papara mpito yipo a mu homokere makura a mu remeke a fe, ano konyima muntu ogo a dukire kositata simwe sorugami,
12 masimbi gomositata sawo ga hepa kukamusimba kositata sorugami, va ka mu gave komuntu ogu ana hara kumutengwida kuwoko yipo a mu dipage.
13 Kapisi ngomu mu fire nkenda, yipo ngomu dire kukara nousima wedipago moIsraeli ntani yipo ngayi mu gende po nawa.
14 “Apa ngomu pinga sirongo esi ana kumupa Karunga gweni Jehova, kapisi ngomu rundurure yidiviso yonomururani dovakweni eyi va tulire ko ozinyakurweni.
15 “Muntu kapi tava vhuru kumugwana unzoni nsene mbangi zimwe tupu zina kutanta asi muntu ogo ga lipuka ndi ga zona, nye ntudi pa kare nombangi mbali ndi ntatu ntani nava mu gwana unzoni.
16 Nsene muntu a gava umbangi woyimpempa ntani a rundire mukwawo asi ga tura nzo,
17 vantu owo vavali va hepa kuza komeho zaJehova ntani komeho zovapristeli novapanguli woposiruwo oso.
18 Vapanguli ngava konakona ukaro owo, ano nsene muntu ogo kwa gava umbangi woyimpempa ntani kwa rundira mukwawo,
19 age va hepa kumutengeka ngwendi moomu ga here va tengeke mukwawo. Mwa hepa kugusa mo yininke yoyidona mokatji keni.
20 Apa ngava yi zuvha vantu, awo ngava kara nowoma ntani kapi ngava rugana hena udona ngwendi wowo mokatji keni.
21 Kapisi ngomu fire muntu ogo nkenda, momwenyo mu pite mwenyo, eho neho, ezego nezego, ewoko newoko ntani mpadi nompadi.
