Deuteronomium 2:1-37
2 “Makura yiyo twa tengwire tu pite nzira zEfuta lyEgeha, tu ze momburundu ngwendi moomu ga tanterere nge Jehova. Ose kwa gendere mazuva gomanzi tu kunduruke Ndundu zaSeire.
2 Konyima, Jehova kwa tanterere nge asi:
3 ‘One kwa likunduruka ndundu ezi siruwo sosire, ngesi pirukeni mu ze koMuzogo,
4 ntani tantera Vaisraeli asi: “One ngomu pita pomururani gosirongo saSeire omu va tunga vekoro lyeni womoruvharo rwaEsau. Awo ngava mu tjira ntani mwa hepa kutakamesa.
5 Kapisi ngomu va homokere,* yeeyi ame kapi ngani mu pa sirongo sawo nampili kavega kokugwaneka mpadi. Ame kwa pa Esau Ndundu zaSeire zi kare upingwa wendi.
6 Mwa hepa kufutira nondya edi ngomu lya nomema aga ngomu nwa.
7 Yeeyi Karunga gweni Jehova ga mu tungika mwanayinye eyi mwa rugana. Age ga mu mona omu mwa genda momburundu ezi zonene. Karunga gweni Jehova kwa kara kumwe none nomvhura nadinye edi 40 ntani kwato eyi mwa hepere.”’
8 Yiyo twa pitire vekoro lyetu womoruvharo rwaEsau ava va tunga moSeire. Ose kapi twa pitire nzira zaAraba nezi zokoErate ntani zaEsiyoni-gebere.
“Kutunda opo, tatu piti nzira zomburundu zaMowaba.
9 Makura Jehova ta tantere nge asi: ‘Mwa ha homokera Vamowaba ndi mu va rwanese, yeeyi ame kapi ngani mu pa sirongo sawo mu si pinge. Ame kwa pa womoruvharo rwaRoto sitata saAra ngoupingwa wawo.
10 (Vaemimu yiwo va tungire mo nare, awo kwa kere wovanzi ntani nonkondo. Awo hena kwa kere wovare ngwendi womoruvharo rwaAnaki.
11 Varefa nawo ngava va tara ngwendi womoruvharo rwaAnaki, ano Vamowaba ngava tumbura Varefa asi Vaemimu.
12 Vaholi yiwo va tungire nare moSeire, nye womoruvharo rwaEsau kwa va tjidire mo ntani kwa va dipagere makura tava tungu mosirongo sawo, ngwendi moomu ngava rugana Vaisraeli sirongo esi nga va pa Jehova.)
13 Zendeni mu taguruke Muramba gwaSeredi.’ Makura yiyo twa tagurukire Muramba gwaSeredi.
14 Ose kwa tu gusire nomvhura 38 tu tunde moKadesi-baraneya dogoro tu ka taguruke Muramba gwaSeredi, dogoro vagara navenye ava ngava ru yita tava fu po navenye ngwendi moomu ga yi va tanterere Jehova.
15 Jehova kwa ruganesere nonkondo dendi* ava zonagure po dogoro navenye tava fu.
16 “Konyima zapa va fire vagara navenye ava ngava ru yita,
17 Jehova kwa tanterere nge hena asi:
18 ‘Neina tomu pitakana mukunda gwaMowaba ndi sitata saAra.
19 Apa ngomu kara pepi noVaamoni, kapisi ngomu va homokere ndi mu va hadagure, yeeyi ame kapi ngani mu pa sirongo soVaamoni mu si pinge. Ame kwa si pa womoruvharo rwaRoto yipo va si pinge.
20 Sirongo esi naso ngava si tara nare asi sirongo soVarefa. (Varefa yiwo va tungire mo nare, ano Vaamoni ngava tumbura Varefa asi Vasamusimu.
21 Awo kwa kere wovanzi ntani nonkondo. Awo hena kwa kere wovare ngwendi womoruvharo rwaAnaki; nye Jehova kwa va zonagwire po komeho zoVaamoni. Vaamoni kwa va tjidire mo makura tava tungu mosirongo sawo.
22 Eyi yiyo ga ruganenene womoruvharo rwaEsau ava va tunga moSeire. Age kwa zonagwire Vaholi komeho zawo, makura ta ninki womoruvharo rwaEsau va guse sirongo sawo. Awo kwa tunga mo dogoro ngesi.
23 Ano Vaavhimu kwa tungire momukunda gwaGasa dogoro Vakafotolimu ava tundire moKafotolimu,* tava wiza va ya va zonagure po, makura tava tungu momukunda gwawo.)
24 “‘Katukeni mu taguruke Muramba gwaArunoni. Ame kwa gava momawoko geni Sihoni goMuamoli gomoHesiboni. Tamekeni kugusa sirongo sendi ntani mu rwiseni.
25 Kutunda ezuva lyanaina, ame ngani ninka vantu navenye ava va kara pevhu va mu tjire apa ngava zuvha mbudi zokumuhamena. Awo ngava kara nosinka ntani ngava mu tjira.’*
26 “Makura yipo na tumine vantu va tunde momburundu zaKedemoti va ze kwahompa Sihoni gomoHesiboni, va ka mu tantere nonkango edi dombili asi:
27 ‘Pulisira nge ni pite mosirongo soge. Ame ngani genda tupu monzira ntani kapi ngani zapuka ni ze korulyo ndi korumoho.
28 Ame ngani lya tupu nondya nokunwa mema aga ngo randesa nge. Pulisira nge tupu ni pite mo
29 dogoro ngani ka rute mukuro gwaJorodana ni ze mosirongo esi ana kutupa Karunga gwetu Jehova. Eyi yiyo va rugene womoruvharo rwaEsau ava va tunga moSeire ntani Vamowaba ava va tunga moAra.’
30 Nye Sihoni hompa gwaHesiboni kapi ga tu pulisilire tu pite mo mosirongo sendi, yeeyi Karunga gweni Jehova kwa kukutikire mutjima gwaSihoni yipo a mu gave momawoko geni ngwendi moomu yina horoka.
31 “Makura Jehova yiyo ga tanterere nge asi: ‘Ame nina ku pe Sihoni ntani nosirongo sendi. Gusa sirongo sendi.’
32 Apa ga wizire Sihoni kumwe novantu vendi va ya tu rwise poJahasi,
33 Karunga gwetu Jehova yipo ga mu geve momawoko getu, makura ose tatu mu fundu kumwe novana vendi ntani novantu vendi navenye.
34 Ose kwa kwete yitata yendi nayinye posiruwo oso, tatu yi zonagura po nayinye kukwatera mo vagara novakadi ntani novanona. Kwato ogu twa sigire a paruke.
35 Ose kwa gusire tupu yimuna yawo nemona nalinye lyomoyitata eyi twa ka kwete.
36 Ose kwa zonagwire po yitata nayinye kutundilira kositata saAroere esi sa kara konontere doMuramba gwaArunoni (kukwatera mo sitata esi sa kara momuramba) dogoro koGiliyata. Karunga gwetu Jehova kwa yi geve nayinye momawoko getu.
37 Nye one kapi mwa hederere pepi nosirongo soVaamoni, Muramba nagunye gwaJaboko ntani noyitata eyi ya kara momukunda gonondundu ndi nkenye evango eli ga dira kutupulisira Karunga gwetu Jehova.
Nonkango dokonhi
^ Ndi “Kapisi ngomu va hadagure.”
^ MoRuhebeli asi “kuwoko kwendi.”
^ Kwa tamba Kereta.
^ Ndi “ngava zuvha kukora oku a zuvhu mukadi ogu ana kuhampuruka.”
