Deuteronomium 20:1-20
20 “Nsene ngomu za mu ka rwe yita nononkore deni makura mu dimburure asi vana kara nononkambe, turukara ntani novakwayita wovanzi kupitakana veni, kapisi ngomu va tjire, yeeyi Karunga gweni Jehova ogu ga mu gusa mosirongo saEgipite nga kara none.
2 Komeho mu ze moyita, mupristeli nga ze komeho zovakwayita ava uyungise.
3 Age nga va tantere asi: ‘Purakeneni one Vaisraeli, one kuna kuza mu ka rwise nonkore deni. Kapisi mu tukuke ntani kapisi mu va tjire ndi mu va kankame,
4 yeeyi Karunga gweni Jehova kuna kuza kumwe none koyita a ka rwise nonkore deni, yipo a mu popere.’
5 “Vapitisili nawo ngava tantere vakwayita asi: ‘Nsene mokatji keni pweli ogu ga dika embo ntani kapi ga tunga mo simpe, ga hepa kutengura kembo lyendi. Nsene kapi ana kuyirugana, age kuvhura nga ka fire moyita makura mugara gwapeke nga tunge membo lyendi.
6 Ano nsene pweli mokatji keni ogu ga kara nosikunino somandjembere nye kapi ga lya enyango lyamo, a tengure kembo lyendi. Nsene kapi ana kuyirugana, kuvhura nga fire moyita makura mugara gwapeke nga lye enyango lyendi.
7 Ntani nsene mokatji keni pweli ogu ga vandekera mukadi nye kapi ga mu kwara, a tengure kembo lyendi. Nsene kapi ana kuyirugana, kuvhura nga fire moyita makura mukadi ogo nga mu kware po mugara gwapeke.’
8 Vapitisili ngava tantere hena vakwayita asi: ‘Nsene pweli mokatji keni ogu ana kara nowoma ntani kuna kukankama, a tengure kembo lyendi, yipo a dire kuninkisa vakwawo nawo va kare nowoma.’
9 Apa ngava mana vapitisili kuuyungisa vakwayita, ngava horowore vapitisili ava ngava pitisira vakwayita.
10 “Nsene ngomu homokera sitata mu rwanese vantu vamo, mwa hepa kuvatantera eyi nava rugana yipo mu dire kuvahomokera.
11 Nsene va rugana eyi ngomu va tantera makura va mu zegwilire mavero gositata sawo, vantu navenye ava ngomu gwama mo ngava kara vapika veni ntani ngava mu ruganena.
12 Nye nsene kapi ngava rugana eyi ngomu va tantera makura ngava tokore kumurwisa, ngomu kundurukide sitata sawo.
13 Karunga gweni Jehova nga gava sitata oso momawoko geni ano ngomu dipage vagara navenye ava va tunga mo norufuro.
14 Nye ngomu guse vakadi, vanona, yimuna ntani nayinye eyi ya kara mositata nemona lyamo nalinye ntani one ngomu gusa yininke nayinye yononkore deni eyi nga mu pa Karunga gweni Jehova.
15 “Eyi yiyo ngomu rugana yitata nayinye eyi ya kara ure none, eyi ya dira kuhamena konomuhoko edi dopopepi.
16 Nye mwa hepa kudipaga vantu navenye ava va tunga moyitata eyi ana kumupa Karunga gweni Jehova noyimuna yawo nayinye.*
17 Ngomu dipage nomuhoko edi nadinye ngwendi moomu ga mu pangera Karunga gweni Jehova; Vaheti, Vaamoli, Vakanani, Vaperesi, Vahevhi ntani noVajebusi.
18 Ngomu yi rugane yipo ngava dire kumuronga yirugana yawo yoyidona eyi ava ruganene yikarunga yawo, va mu ninkise mu zone kwaKarunga gweni Jehova.
19 “Nsene ngomu kundurukida sitata yipo mu si homokere ntani one kwa si rwanesa mazuva gomanzi, kapisi ngomu tete yitji yawo nekuva. Kuvhura ngomu lye enyango lyayo nye kapisi ngomu yi tete. Kapisi ngomu homokere yitji ngwendi moomu omu homokere vantu.
20 Nye yitji eyi ayi dili kuyima enyango kuvhura mu yi tete, yipo mu yi ruganese moyita dogoro mu funde sitata esi sina kumurwanesa.
Nonkango dokonhi
^ Ndi “nkenye eyi ayi hesere.”
